តម្លៃប្រេងពិភពលោកងើបឡើងវិញ ដោយសារតែកើនតម្រូវការនៅ ចិន

តម្លៃប្រេង​ពិ​ភពលោកបានកើនឡើងខ្ពស់វិញនៅចន្ទនេះ ដោយសារតែការពង្រីកឱនភាពផ្គត់ផ្គង់នៅក្នុងត្រីមាសទី ៤ រួមជាមួយសុទិដ្ឋិនិយមនៃការងើបឡើងវិញនូវតម្រូវការក្នុងប្រទេសចិនដែលជាប្រទេសនាំចូលប្រេងឆៅលំដាប់កំពូលរបស់ពិភពលោក ។

ប្រេងឆៅអាមេរិកម៉ាក Brent បានឡើងថ្លៃ ៣៩ សេន ឬ ០.៤ ភាគរយ ដល់តម្លៃ​ ៩៤.៣២ ដុល្លារក្នុងមួយបារ៉ែល ខណៈក្រុមហ៊ុនប្រេងឆៅ West Texas Intermediate (WTI) មានតម្លៃ ៩១.៣០ ដុល្លារក្នុងមួយបារ៉ែល កើនឡើង ៥៣ សេន ឬ ០.៦ ភាគរយ ។

តម្លៃប្រេង Brent និង WTI បានឡើងថ្លៃ ៣ សប្តាហ៍ជាប់ៗគ្នា​ឈានដល់កម្រិតខ្ពស់បំផុត ចាប់តាំងពីខែវិច្ឆិកា ហើយកំពុងឆ្ពោះទៅរកការឡើងថ្លៃប្រចាំត្រីមាសដ៏ធំបំផុតរបស់ពួកគេ ចាប់តាំងពីសង្គ្រាមលុកលុយរបស់រុស្ស៊ីលើអ៊ុយក្រែនក្នុងខែកុម្ភៈ ឆ្នាំ ២០២២ ។

ពាក់ព័ន្ធនឹងបញ្ហានេះដែរ អ្នកវិភាគមកពីធនាគារ ANZ របស់អង់គ្លេសបាននិយាយថា ការកាត់បន្ថយទិន្នផលរបស់អារ៉ាប៊ីសាអូឌីត និងរុស្ស៊ី អាចជំរុញទីផ្សារទៅជាឱនភាព ២ លានបារ៉ែលក្នុងមួយថ្ងៃនៅក្នុងត្រីមាសទី ៤ ហើយក៏អាចធ្វើឲ្យទីផ្សារប្រឈមនឹងការឡើងថ្លៃបន្ថែមទៀតផងដែរនៅឆ្នាំ ២០២៤ ។

បច្ចុប្បន្ន កំណើនតម្រូវការប្រេងពិភពលោកកំពុងស្ថិតនៅលើផ្លូវដែលឈានដល់ ២.១ លានបារ៉ែលក្នុងមួយថ្ងៃ ស្របតាមការព្យាករណ៍របស់ទីភ្នាក់ងារថាមពលបរមាណូអន្តរជាតិ (IAEA) និងអង្គការនៃប្រទេសនាំចេញប្រេង (OPEC) ៕

ប្រែសម្រួល៖ នាង រតនៈ

ប្រភព៖​ Yahoo