សម្ដេចតេជោ៖ ថ្ងៃនេះ ឆ្នាំមុន សម្ដេចចេញទៅUN តែឆ្នាំនេះ សម្ដេច ហ៊ុន ម៉ាណែត ចេញដំណើរទៅម្តង

សម្ដេចតេជោ ហ៊ុន សែន អតីតប្រមុខរាជរដ្ឋាភិបាលកម្ពុជា បានរំលឹកថា ថ្ងៃនេះ ឆ្នាំ២០២២ កន្លងទៅ គឺសម្ដេចបានចេញដំណើរទៅអង្គការសហប្រជាជាតិ តែថ្ងៃនេះ ឆ្នាំ២០២៣នេះ នាយករដ្ឋមន្ត្រីថ្មី សម្ដេចធិបតី ហ៊ុន ម៉ាណែត បានចេញដំណើរទៅម្ដង។

តាមរយៈបណ្ដាញសង្គមហ្វេសប៊ុក នៅថ្ងៃនេះ សម្ដេចតេជោ ហ៊ុន សែន បានរៀបរាប់ថា៖ «ឆ្នាំ២០២២កន្លងទៅ ថ្ងៃនេះខ្ញុំចេញដំណើរទៅអង្គការសហប្រជាជាតិ ថ្ងៃនេះនាយករដ្ឋមន្ត្រីថ្មីចេញដំណើរទៅម្តង»។ ក្នុងន័យនេះ សម្ដេចតេជោ បានលើកឡើងដូច្នេះថា៖ «ខ្ញុំធ្លាប់បាននិយាយច្រើនដងណាស់ថា ថ្ងៃនេះខ្ញុំជានាយករដ្ឋមន្ត្រី និងពេលខាងមុខ ខ្ញុំនឹងក្លាយទៅជាឪពុកនាយរដ្ឋមន្ត្រី»។

សម្ដេចតេជោ បានបន្តថា «ក្រុមប្រឆាំងពេបជ្រាយ តែពេលនេះ ប្រហែលគេឃើញការពិតដែលបានកើតរួចទៅហើយ។ ខ្ញុំបានឡើងឋានៈជាឪពុកនាយករដ្ឋមន្ត្រីជិតមួយខែហើយ»។ សម្ដេចតេជោ ចាត់ទុកថា នេះជាអម្រែកបានទម្លាក់ចុះពីស្មាបន្ទាប់ពីប្រឹងរែកអស់រយៈពេលជាង៣៨ឆ្នាំ ឬជាង៤៤ឆ្នាំ ដោយទុកឲ្យអ្នកបន្តវេនរែកតទៅទៀតប្រកបដោយការទទួលខុសត្រូវ។

សម្ដេចតេជោ ក៏បានផ្ញើជូនការនឹករលឹកចំពោះប្រជាពលដែលរស់នៅសហរដ្ឋអាមេរិក និងកាណាដា ដែលនឹងមកទទួល នាយករដ្ឋមន្ត្រីថ្មី ជំនួសឲ្យការទទួលរូបសម្ដេចកាលពីឆ្នាំកន្លងទៅ៕