ឃាត់ខ្លួនបានម្នាក់ ករណីព្រួតវាយយុវតីម្នាក់ក្នុងបន្ទប់ផ្ទះសំណាក់

នារីជាជនដៃដល់ម្នាក់ក្នុងចំណោមក្ខពួក៤នាក់ ត្រូវបានកម្លាំងនគរបាលព្រហ្មទណ្ឌកំរិតស្រាលនៃស្នងការដ្ឋានរាជធានីភ្នំពេញ សហការជាមួយកម្លាំងនគរបាលនៃអធិការដ្ឋាននគរបាលខណ្ឌមានជ័យ ធ្វើការស្រាវជ្រាវឃាត់ខ្លួនបានហើយ ពាក់ព័ន្ធករណីព្រួតវាយយុវតីម្នាក់ក្នុងបន្ទប់ផ្ទះសំណាក់ និងបញ្ជូនមកការិយាល័យដើម្បីសាកសួរចាត់ការតាមនីតិវិធី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការឃាត់ខ្លួននេះបានធ្វើឡើងកាលពីថ្ងៃ២៤ ខែកញ្ញា ឆ្នាំ២០២៣ វេលាម៉ោង១២និង០០នាទី នៅចំណុចមុខផ្សារព្រែកតូច ឃុំព្រែកតាគង់ ស្រុកស្អាង ខេត្តកណ្តាល។ សមត្ថកិច្ចបានឲ្យដឹងថា ជនសង្ស័យមានឈ្មោះ គ្រុយ ស្រីលាភ ភេទស្រី អាយុ១៧ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅផ្ទះជួល ផ្លូវបេតុង ភូមិត្នោតជ្រុំ សង្កាត់បឹងទំពុន២ ខណ្ឌមានជ័យ រាជធានីភ្នំពេញ។

យោងតាមរបាយការណ៍របស់ស្នងការដ្ឋាននគរបាលរាជធានីភ្នំពេញ បានឲ្យដឹងថា ករណីហិង្សានេះបានកើតឡើងកាលពីថ្ងៃទី១២ ខែកញ្ញា ឆ្នាំ២០២៣ វេលាម៉ោង០៦និង០០នាទី នៅចំណុចផ្ទះសំណាក់លេខ៣៤២ ផ្លូវលេខ២៧១ ភូមិ៥ សង្កាត់ស្ទឹងមានជ័យ២ ខណ្ឌមានជ័យ រាជធានីភ្នំពេញ ដែលបង្កដោយជនសង្ស័យ៤នាក់។

គួររំលឹកថា កាលពីយប់ថ្ងៃទី២០ ខែកញ្ញា ឆ្នាំ២០២៣ លោកឧត្តមសេនីយ៍ទោ ជួន ណារិន្ទ អគ្គស្នងការរងនគរបាលជាតិ និងជាស្នងការនៃស្នងការដ្ឋាននគរបាលរាជធានីភ្នំពេញ បានបញ្ជាកម្លាំងជំនាញស្រាវជ្រាវជាបន្ទាន់ ករណីហិង្សារវាងស្រ្តីមួយក្រុមព្រួតវាយទាត់ធាក់ទៅលើស្រ្តីម្នាក់ទៀតដែលកំពុងដេកដួលក្នុងបន្ទប់ដើម្បីមានវិធានការតាមផ្លូវច្បាប់។

បើតាមលោកស្នងការរាជធានីភ្នំពេញ ករណីនេះដោយមិនអាចលើកលែងបានទេ ហើយក៏អំពាវនាវប្រជាពលរដ្ឋជួយសហការផ្តល់ព័ត៌មានជូនសមត្ថកិច្ចដើម្បីស្វែងរកទីតាំងដែលមានអំពើហិង្សានោះ។

យោងតាមគណនីហ្វេសប៊ុកមួយឈ្មោះ Bro Seth ដែលបង្ហោះចែកចាយនៅបណ្ដាញសង្គមដោយមានភ្ជាប់រូបភាពស្ត្រីមួយក្រុមព្រួតវាយលើស្ត្រីម្នាក់នៅក្នុងបន្ទប់ និងសរសេររៀបរាប់ថា «ករណីព្រួតវាយទៅលើនារីម្នាក់ ហើយត្រូវបានជនសង្ស័យគំរាមកុំឲ្យប្រាប់ម្ដាយឳពុក ករណីខាងលើកើតឡើងនៅថ្ងៃទី១២ ខែកញ្ញា ឆ្នាំ២០២៣ វេលាម៉ោង៤យប់ ដែលស្ថិតនៅខណ្ឌមានជ័យ រាជធានីភ្នំពេញ»៕