កន្លែងអភិរក្សមច្ឆាជាតិក្នុងខេត្តបាត់ដំបងមានប៉ុន្មានកន្លែង ហើយ​កន្លែងណាមានផ្ទៃដីធំជាងគេ?

ដែនទឹកបឹងទន្លេសាបនៃដែនអាណាចក្រខេត្តបាត់ដំបង ជា​ដែនមួយ​សម្បូរ​ទៅ​ដោយ​ភោគផលមច្ឆាជាតិ​ចម្រុះតាំងពីសម័យ​ដើម។

បច្ចុប្បន្នដែនបឹងទន្លេសាប​នៅ​ក្នុងខេត្តបាត់ដំបង ត្រូវបានថ្នាក់ជាតិកំណត់​ជា​ទីកន្លែងសម្រាប់អភិរក្សហ្វូងមច្ឆាជាតិក្នុងគោលបំណងជាចម្បងគឺការពារមច្ឆាជាតិពីសំណាក់ក្រុមមនុស្សដែលជាអ្នកនេសាទ ជៀសវាងក្នុងការបំផ្លិចបំផ្លាញតាម​រយះ​ប្រើឧបករណ៍ល្មើសផ្សេងៗឲ្យបានគង់វង់ និងបន្តពូជឲ្យសម្បូរបែបដូចកាលសម័យដើមខណះដែលចំនួនមច្ឆាជាតិមានកម្រិតថយចុះជាបន្តបន្ទាប់គួរឲ្យកត់សម្គាល់។

លោក ជួង សុភា នាយខ័ណ្ឌរដ្ឋបាល ជលផល នៃខេត្តបាត់ដំបង បានឲ្យដឹងថា ក្នុងខេត្តបាត់ដំបង បានបែងចែកដែនទឹកបឹងទន្លេសាបទុកសម្រាប់​ជាកន្លែងអភិរក្សមច្ឆាជាតិមានចំនួន ០៧ កន្លែងលើចំនួនផ្ទៃដីផ្សេងៗគ្នាតាមទីកន្លែងដែលសំខាន់ៗជាទីជម្រកដែលមច្ឆាចម្រុះចូលចិត្តប្រមូលផ្តុំជ្រកកោននិងពងកូន។

កន្លែង​ដែន​អភិរក្ស​ទាំង ០៧ នោះរួមមាន: ១-កន្លែងអភិរក្សព្រែកចំបាប់ញំា​មាន​ទំហំ ៧០៤ហិចតា ,២-កន្លែងអភិរក្សព្រែកត្រសក់​ទាល់ ​ទំហំ ២៥៤ ហិចតា ,៣-កន្លែងអភិរក្ស អតីតឡូតិ៍ នេសាទលេខ ២ ​ទំហំ ៥០.១៣៤ហិចតា ,៤-កន្លែងអភិរក្ស ព្រែកកញ្ជះ ទំហំ ៩២៩ ហិចតា, ៥-កន្លែងអភិរក្សបឹងក្រពើរាល ទំហំ ៧៩ ហិកតា, ៦-កន្លែងអភិរក្ស ព្រែកត្រៃយ៍ភព ទំហំ ៤៥០ ហិចតា និង​ ៧-កន្លែងអភិរក្សពាក់កន្ទេល​ ទំហំ​ ១២ ០០០ ហិកតា។

លោក ជួង សុភា បាន​ឲ្យ​ដឹង​ថា ​មន្ត្រីជលផលបច្ចុប្បន្នមាន​ចំនួន ២៤ រូប ក្នុងនោះជាស្ត្រី ០៥ រូប និងសហគមន៍នេសាទ​មាន ៤៧ គ្របដណ្តប់លើ ០៦ ស្រុក​ ក្នុង​នោះស្រុករតនមណ្ឌលមាន ០១ សហគមន៍នេសាទ មានមន្ត្រី ១ នាក់, ស្រុកបាណន់មាន ២ សហគម មានមន្ត្រី ០១ នាក់, ស្រុកថ្មគោលមាន ០៦ សហគមមានមន្ត្រី ០១ នាក់, ស្រុកឯកភ្នំមាន ២៣ សហគមមានមន្ត្រី ០៥ នាក់, ស្រុកសង្កែមាន ១១ សហគមមានមន្ត្រី ០១ នាក់, និង​ស្រុកមោងឬស្សីមាន ០៤ សហគមមានមន្ត្រី ០១ នាក់។

លោកបញ្ជាក់ថា ក្នុងករណីមានបទល្មើសជាក់ស្តែងទ្រង់ទ្រាយតូច យើងសហការបង្ក្រាបជាមួយសហគមន៍នេសាទនិងអាជ្ញាធរដែនដីឃុំ ហើយករណីបទល្មើសទ្រង់ទ្រាយធំ​សហការជាមួយគណបញ្ជាការឯកភាពរដ្ឋបាលស្រុកនិមួយៗ និងករណីធ្ងន់ធ្ងររាយការណ៍ជូនរដ្ឋបាលខេត្ត-ព្រះរាជអាជ្ញា-រដ្ឋបាលជលផល៕

អត្ថបទ៖ សៅ សារិទ្ធ