ព័ត៌មានជាតិ

ឯកឧត្ដម ហ៊ុន ម៉ានី ៖ ទោះលទ្ធផលប្រកួតបែបណា អត្តពលិកទាំងអស់ តែងមានប្រជាជនកម្ពុជា នៅជាមួយគាំទ្រ លើកទឹកចិត្តគ្រប់ពេល

បានផុស

៣ years មុន

នៅ

ថ្ងៃព្រហស្បតិ៍ ១៩ តុលា ២០២៣

ដោយ

ឯកឧត្ដម ហ៊ុន ម៉ានី ប្រធានប្រតិភូកីឡាប៉ារ៉ាឡាំពិកកម្ពុជា លើកឡើងថា ទោះបីជាលទ្ធផល នៃការប្រកួតយ៉ាងណាក៏ដោយ អត្តពលិកទាំងអស់ តែងតែមានប្រជាជនកម្ពុជា នៅជាមួយគ្នាគាំទ្រ និងលើកទឹកចិត្តគ្រប់ពេលវេលា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងនេះ ក្នុងឱកាស ឯកឧត្ដម ហ៊ុន ម៉ានី ប្រធានប្រតិភូកីឡាប៉ារ៉ាឡាំពិកកម្ពុជា ប្រកាសជូនពរ និង លើកទឹកចិត្តដល់ ក្រុមអត្តពលិកប៉ារ៉ាឡាំពិកកម្ពុជា ដែលនឹងចាប់ផ្ដើមការប្រកួតក្នុងកម្មវិធីការប្រកួតកីឡាអាស៊ីប៉ារ៉ាហ្គេម ASIAN Para Games លើកទី ៤ នៅទីក្រុងហាន់ចូវ ប្រទេសចិន នៅព្រឹកថ្ងៃទី ១៩ ខែតុលា ឆ្នាំ ២០២៣ នេះ។

ឯកឧត្ដម ហ៊ុន ម៉ានី មានប្រសាសន៍ថា ព្រឹកនេះ ក្រុមអត្តពលិកប៉ារ៉ាឡាំពិកកម្ពុជា នឹងចាប់ផ្ដើមការប្រកួតនៅក្នុងកម្មវិធីការប្រកួតកីឡាអាស៊ីប៉ារ៉ាហ្គេម ASIAN Para Games លើកទី ៤ នាទីក្រុងហាន់ចូវ ប្រទេសចិន។ ក្នុងនាម ឯកឧត្ដម និងសហការី នៃគណៈកម្មាធិការជាតិប៉ារ៉ាឡាំពិកកម្ពុជា សូមជូនពរដល់អត្តពលិកទាំងអស់ ទទួលបានជោគជ័យលើបេសកកម្មតំណាងឲ្យព្រះរាជាណាចក្រកម្ពុជា។

ជាមួយនោះ ឯកឧត្ដម ហ៊ុន ម៉ានី បានអរគុណដល់គ្រូបង្វឹក ក្រុមការងារ និងអត្តពលិកទាំងអស់ សម្រាប់ការខិតខំប្រឹងប្រែងកន្លងមក ទាំងការសម្របសម្រួលការងារ ការបង្វឹកបង្រៀន ក៏ដូចជាការប្រឹងប្រែងហ្វឹកហាត់ក្នុងគោលដៅដើម្បីទទួលបានលទ្ធផលល្អ។ ឯកឧត្ដម លើកឡើងថា «ទោះបីជាលទ្ធផល នៃការប្រកួតយ៉ាងណាក៏ដោយ សូមចងចាំថា អ្នកទាំងអស់គ្នាដែលជាអត្តពលិកទាំងអស់ តែងតែមានប្រជាជនកម្ពុជា នៅជាមួយគ្នាគាំទ្រ បង្ហាញភាសាបេះដូងសម្រាប់កម្ពុជា និងលើកទឹកចិត្តគ្រប់ពេលវេលា ក្នុងស្មារតីលើសពីការប្រកួត #BeyondTheGames»។

គួរជម្រាបថា កម្ពុជា បានបញ្ជូនប្រតិភូ និងអត្តពលិកកីឡាជនពិការកម្ពុជា ៦ ប្រភេទកីឡា ដោយក្នុងនោះ កីឡាប្រភេទជាក្រុមមានចំនួន ២ គឺក្រុមបាល់ទះអង្គុយ បុរស ៨ នាក់ និងកីឡាបាល់បោះជិះរទេះនារី ១២ នាក់ និង ប្រភេទកីឡា ៤ ប្រភេទផ្សេងទៀត អត្តពលិកម្នាក់ៗ ចូលរួមក្នុងកម្មវិធីការប្រកួតកីឡាអាស៊ីប៉ារ៉ាហ្គេម ASIAN Para Games លើកទី ៤ នៅទីក្រុងហាន់ចូវ ប្រទេសចិន៕

អត្ថបទ ៖ ពិសី