អ៊ីស្រាអែល-ប៉ាឡេស្ទីន តឹងសរសៃ ក ដាក់គ្នានៅក្រុមប្រឹក្សាសន្តិសុខ UN

អ្នកការទូតកំពូលរបស់អ៊ីស្រាអែល និងអាជ្ញាធរប៉ាឡេស្ទីនបានចោទប្រកាន់គ្នាទៅវិញទៅមកយ៉ាងតឹងសរសៃ ក នៅឯក្រុមប្រឹក្សាសន្តិសុខអង្គការសហប្រជាជាតិ ស្របពេលដែលការប្រយុទ្ធរវាងអ៊ីស្រាអែល និងក្រុមប្រដាប់អាវុធហាម៉ាស់នៅតែបន្តក្ដៅគគុក ។

ក្នុងសម័យប្រជុំថ្នាក់រដ្ឋមន្ត្រីនៅទីក្រុងញូវយ៉កកាលពីថ្ងៃអង្គារ អគ្គលេខាធិការអង្គការសហប្រជាជាតិ លោក Antonio Guterres បានរំលឹកឡើងវិញនូវការអំពាវនាវរបស់លោកសម្រាប់ “បទឈប់បាញ់មនុស្សធម៌ជាបន្ទាន់” ដើម្បីធានាបាននូវភាពងាយស្រួល និងសុវត្ថិភាពជាងមុននៃការផ្តល់ជំនួយទៅកាន់តំបន់ហ្គាហ្សាស្ទ្រីប ក៏ដូចជាដើម្បីជួយសម្រួលដល់ការដោះលែងចំណាប់ខ្មាំងដែលចាប់ឃុំខ្លួនដោយក្រុមសកម្មប្រយុទ្ធហាម៉ាស់ផងដែរ ។

ពាក់ព័ន្ធនឹងបញ្ហានេះ រដ្ឋមន្ត្រីការបរទេសរបស់អាជ្ញាធរប៉ាឡេស្ទីន លោក Riyad al-Maliki បានចោទប្រកាន់កងកម្លាំងអ៊ីស្រាអែលថា បានកំណត់គោលដៅលើជនស៊ីវិលនៅក្នុងការវាយប្រហារ “អមនុស្សធម៌ ខុសច្បាប់ និងមិនរើសមុខ” ។

លោក Maliki បាននិយាយទាំងកំហឹង និងញ័រមាត់ថា “សកម្មភាពរបស់អ៊ីស្រាអែលស្មើនឹងការដាក់ទណ្ឌកម្មជារួម” ។ លោក​បាន​បន្ថែម​ថា គ្មាន​អ្វី​អាច​បង្ហាញ​ពី​ភាពត្រឹមត្រូវ​លើ​ការ​សម្លាប់​ជន​ស៊ីវិល​អ៊ីស្រាអែល ឬ​ប៉ាឡេស្ទីន​ឡើយ ។

ជាការឆ្លើយតប រដ្ឋមន្ត្រីការបរទេសអ៊ីស្រាអែល លោក Eli Cohen ដែលត្រូវបានអមដំណើរដោយក្រុមគ្រួសារនៃចំណាប់ខ្មាំងអ៊ីស្រាអែល បានហៅការវាយឆ្មក់ដ៏សាហាវពីសំណាក់ក្រុមហាម៉ាស់កាលពីដើមខែនេះថាជា “ការសម្លាប់រង្គាល” មិនធ្លាប់មានក្នុងប្រវត្តិសាស្ត្រ ។

លោក Cohen បាននិយាយថា “យើងនឹងរួបរួមគ្នាកម្ចាត់ក្រុមណាស៊ីហាម៉ាស់ថ្មី ហើយយើងត្រូវតែរួបរួមគ្នាឈរនៅពីក្រោយអ៊ីស្រាអែលដើម្បីកាច់បំបាក់ធ្មុងក្រុមហាម៉ាស់ ។ លោក​បាន​បន្ថែម​ថា ការកម្ទេច​ក្រុម​ហាម៉ាស់​ជា​សិទ្ធិ និង​កាតព្វកិច្ច​របស់​អ៊ីស្រាអែល” ។

គួរបញ្ជាក់ថា ភាពតានតឹងថ្មីដែលបានផ្ទុះឡើងនៅមជ្ឈិមបូព៌ាបានអូសបន្លាយពេលដល់សប្ដាហ៍ទី ២ ហើយ បន្ទាប់ពីក្រុមហាម៉ាស់បានបើកការវាយប្រហារមកលើទឹកដីអ៊ីស្រាអែលចេញពីតំបន់ហ្គាហ្សាស្ទ្រីបកាលពីព្រឹកព្រលឹមថ្ងៃទី៧ ខែតុលា ដោយបានសម្លាប់មនុស្សជាង ១,៥០០ នាក់ ដែលភាគច្រើនជាជនស៊ីវិល ។

ចំណែកនៅតំបន់ហ្គាហ្សាវិញ ក្រសួងសុខាភិបាលដែលគ្រប់គ្រងដោយក្រុមហាម៉ាស់បាននិយាយថា ការឆ្លើយតបរបស់អ៊ីស្រាអែលបានសម្លាប់មនុស្សជាង ៥,៨០០ នាក់ ហើយក្នុងនោះមានក្រុមសកម្មប្រយុទ្ធហាម៉ាស់ជាង ១,៥០០ នាក់នៅក្នុងទឹកដីអ៊ីស្រាអែល ខណៈប្រជាជន ២.៣ លាននាក់កំពុងខ្វះជំនួយមនុស្សធម៌ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ អាល្លឺម៉ង់ ថា ជម្លោះ អ៊ីស្រាអែល-ប៉ាឡេស្ទីន គឺធ្វើតេស្តសហគមន៍អន្តរជាតិ