លោក ជុំ កុសល ថា នៅកម្ពុជា មិនរើសអើង និងហាមឃាត់អ្នកស្រឡាញ់ភេទដូចគ្នាឡើយ

រដ្ឋលេខាធិការក្រសួងព័ត៌មាន លោក ជុំ កុសល បានសរសេរសំណេរនៅលើសង្គមហ្វេសប៊ុកនៅថ្ងៃទី៣១ ខែតុលានេះថា នៅកម្ពុជាមិនបានរើសអើងអ្នកស្រឡាញ់ភេទដូចគ្នា ឬហាមប្រាមពួកគេនោះទេ គ្រាន់តែមិនមានច្បាប់ឱ្យរៀបការជាមួយគ្នាប៉ុណ្ណោះ។

លោកលើកឡើងបែបនេះ បន្ទាប់ពីមានការរិះគន់យ៉ាងខ្លាំងចំពោះនាយក្រឹមដែលជាតារាកំប្លែងនៅកម្ពុជាចំពោះរឿងលោកនិយាយប៉ះពាល់យ៉ាងខ្លាំងដល់អ្នកស្រឡាញ់ភេទដូចគ្នា រហូតធ្វើឱ្យអង្គការក្រៅរដ្ឋាភិបាល និងប្រជាជនកម្ពុជាប្រតិកម្មចំពោះរឿងនេះ។

រដ្ឋលេខាធិការរូបនេះបានសង្កត់ធ្ងន់ថា៖ “ពួកគាត់ (ភេទទីបី ) មិនមែនជាក្រុមមនុស្សដែលបង្កឧបសគ្គណាមួយដល់សង្គមទេ។ ផ្ទុយទៅវិញតាមការសង្កេតជាក់ស្តែង ពួកគាត់ភាគច្រើនគឺមានសមត្ថភាពប្រកបមុខរបររកប្រាក់តាមចំណេះជំនាញដែលមានរៀងៗខ្លួនបានយ៉ាងល្អថែមទៀតផង ព្រោះពួកគាត់យល់ច្បាស់អំពីកត្តាធម្មជាតិខ្លួនឯងដែលកើតមកមានមនោរម្មណ៍បែបហ្នឹងមិនអាចកែបាន ដូច្នេះដើម្បីបញ្ចៀសភាពរើសអើង ស្អប់ខ្ពើម ពីមជ្ឈដ្ឋានគ្រួសារ ,មិត្តភក្តិ , សង្គម” ។ លោក ជុំ កុសល បន្ថែមថា អ្នកស្រឡាញ់ភេទដូចគ្នា អាចចាប់យកជំនាញតាមអ្វីដែលខ្លួនស្រឡាញ់ និងអាចកំណត់គោលដៅជីវិតបានល្អផងដែរ។

ជុំវិញបញ្ហានេះ សម្រាប់រូបលោកផ្ទាល់មិនមានអ្វីក្រៅពីអាណិត និងលើកទឹកចិត្តដល់ពួកគេឡើយ ព្រោះមនុស្សម្នាក់ៗកើតមកមិនអាចកំណត់ភេទដោយខ្លួនឯងទេ គឺអាស្រ័យលើធម្មជាតិ ហើយក៏គ្មាននរណាម្នាក់ចង់ធ្វើអ្វីដែលខុសពីរូបរាងខ្លួនឯងបែបនេះដែរ។ លោកបន្តថា ចំពោះកត្តាបន្តពូជវិញ បើនិយាយក្នុងសម័យទំនើបនេះគឺមានគ្រប់បែបយ៉ាង ពួកគេចង់បង្កើតកូនប៉ុន្មានក៏បាន ហើយបានសុទ្ធតែកូនល្អៗទៀតផង ដូច្នេះ សូមឈប់បារម្ភរឿងខ្វះធនធានមនុស្សទៀត ត្រូវដឹងថាទៅអនាគតគេនឹងនាំគ្នានិយាយអំពីមូលធនមនុស្សវិញហើយ។ នេះបើតាមលោក ជុំ កុសល។

សូមជម្រាបថា បន្ទាប់ពីមានរឿងនេះកើតឡើង គណ:កម្មាធិការសិទ្ធិមនុស្សកម្ពុជា ក៏បានហៅនាយក្រឹម និងលោក ណុប ដាណេ សម្របសម្រួលគ្នាដែលទទួលបានលទ្ធផលវិជ្ជមាន ដើម្បីភាពសុខសាន្តនៅក្នុងសង្គមជាតិ៕