ប៉ូលិសថៃស្លៀកឈុតឆ្អឹងខ្មោចដើម្បីបន្លំខ្លួនចាប់ជនល្មើស

ប៉ូលិសថៃបានស្លៀកឈុតឆ្អឹងខ្មោច ដើម្បីបន្លំខ្លួនចាប់ខ្លួនបុរសម្នាក់មានឈ្មោះថា Wanchai Saeng-udom អាយុ ៣២ ឆ្នាំ បន្ទាប់ពីបានលួចរបស់របរផ្សេងៗដូចជា iPad ចំនួន ៥ គ្រឿង និងកុំព្យូទ័រយួរដៃមួយគ្រឿងពីភោជនីយដ្ឋានមួយកន្លែងក្នុងទីក្រុងបាងកក ។

ជនសង្ស័យឈ្មោះ Wancha បានភៀសខ្លួនចេញពីកន្លែងកើតហេតុកាលពីយប់ថ្ងៃទី២០ ខែតុលា ហើយដីកាចាប់ខ្លួនបានចេញនៅថ្ងៃទី២៦ ខែតុលា ។ ក្រោយការស៊ើបអង្កេតមួយរយៈ ប៉ូលិសទទួលបានព័ត៌មានថា Wanchai និងមិត្តស្រីនាំគ្នាទៅមើលកុនរឿងរន្ធត់ Death Whispering: Tee Yod ថ្ងៃទី៣១ ខែតុលា ក្នុងឱកាសបុណ្យ Halloween ។

ដូច្នេះប៉ូលិសមានគំនិតស្លៀកពាក់ឈុតឆ្អឹងខ្មោច និងពាក់របាំងមុខ ដើម្បីបន្លំជាបុគ្គលិកចាំចាប់ Wanchai ។ ជាង ៣ ម៉ោងក្រោយ Wanchai និងមិត្តស្រីបានបង្ហាញខ្លួននៅរោងកុន ហើយប៉ូលិសនាំគ្នាធ្វើជាថតរូប រួចព័ទ្ធចាប់ជនល្មើសដោយជោគជ័យ ។

លុះចាប់បាន Wanchai ក៏បានសារភាពដែរថា រូបគេលាឈប់ពីភោជនីយដ្ឋានមួយនោះហើយ ហើយការលួចរបស់របរទាំងនោះ គឺដើម្បីបញ្ចេញកំហឹង ។ គាត់ព្យាយាមលក់របស់ដែលលួចបានដែរ ប៉ុន្តែត្រូវគេបោកប្រាស់អស់ពីខ្លួនរលីង ។

មែនទែនទៅ Wanchai មានប្រវត្តិបទល្មើសព្រហ្មទណ្ឌជាច្រើន រួមទាំងការជួញដូរគ្រឿងញៀន ល្បែងស៊ីសង និងចោរកម្ម ជាពិសេសទើបតែចេញពីគុកទៀត ៕

ប្រែសម្រួល៖ វារី

ប្រភព៖ asianone

ចុចអាន៖ បុរស ២ នាក់ស្លៀកពាក់ជាគូស្នេហ៍ Taylor Swift ក្នុងឱកាសបុណ្យ Halloween