សម្តេចធិបតី ហ៊ុន ម៉ាណែត៖ ពេលវេលា​ជាមួយកូន​ៗ មានតម្លៃលើសសម្ភារៈ​ដែលយើងផ្តល់ឱ្យពួកគាត់

ស្ថិតក្នុងសម្លៀកបំពាក់កីឡាដ៏សាមញ្ញដើរហាត់ប្រាណជាមួយកូនស្រី សម្តេច ហ៊ុន ម៉ាណែត បានសរសេរលើទំព័រ​ផេកផ្លូវការដូច្នេះថា«ឪពុកម្តាយគ្រប់រូបអាចយល់ពីអារម្មណ៍មួយនេះ»។

ពេលវេលាពិតជាដើរលឿនណាស់ ហើយកូនៗរបស់យើងម្នាក់ៗ ពួកគេក៏ធំលឿនដែរ… តែមួយភ្លែត ពួកគេនឹងរីក​ធំធាត់ទាំងរូបកាយ បញ្ញាញាណ ហើយឯករាជ្យភាពនិងការទទួលខុសត្រូវរបស់ពួកគេក៏កើនឡើងដែរ ជាពិសេសពេល​ដែលពួកគេត្រូវមានភាពម្ចាស់ការក្នុងការរស់នៅដោយខ្លួនឯង និងមានគ្រួសាររៀងៗខ្លួន។ ពេលនោះ ពេលវេលា​នៅជាមួយឪពុកម្តាយ ក៏មិនមានច្រើនដូចដែលកាលពីពួកគេនៅក្មេងដែរ។ ហេតុដូច្នេះ ទោះជារវល់យ៉ាងណា គួរព្យាយាមចំណាយពេលវេលា ជាមួយកូនៗឱ្យបានច្រើន។ នេះគឺជាសារដាស់តឿនរបស់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា។

សម្តេច បានបន្តថា ពេលវេលាជាមួយកូនៗ មានតម្លៃលើសសម្ភារៈដែលយើងផ្តល់ឱ្យពួកគាត់។ សម្ភារៈបាត់​អាចទិញវិញបាន ប៉ុន្តែពេលវេលាដែលកន្លងហួសហើយ មិនអាចត្រឡប់ក្រោយវិញបានទេ។ រីករាយថ្ងៃអាទិត្យ មិត្តទាំងអស់គ្នា៕