Barcelona បញ្ជាក់ពីអនាគតរបស់ Lewandowski ក្រោយធ្វើមិនសូវបានល្អ

ក្នុងរដូវកាលនេះខ្សែប្រយុទ្ធ Robert Lewandowski បាន​បង្ហាញទម្រង់លេងមិនសូវបានល្អទេ ជាហេតុធ្វើឲ្យមានពាក្យចចាមអារ៉ាម​ពាក់​ព័ន្ធ​នឹងការចាកចេញពីក្លិប FC Barcelona។ ជុំវិញ​ករណី​នេះ ក្លិបយក្សនៅក្នុងតំបន់កាតាឡានក៏បានសម្រេចពីអនាគតថា កីឡាករសញ្ជាតិប៉ូឡូញ​រូបនេះ​នឹង​​បន្ត​ស្នាក់​នៅ​មួយរដូវកាលទៀត។

អតីតខ្សែប្រយុទ្ធក្លិប Bayern Munich ម្ចាស់អាវលេខ៩ Robert Lewandowski បានមកដល់ទឹកដី Camp Nou កាលពីរដូវកាលមុន​ដោយ​បាន​ជួយ​ Barcelona ឈ្នះពានរង្វាន់ La Liga។ រូប​គេ​បានឈ្នះពាន​ស្បែកជើងមាសរដូវកាលមុន ដោយរក​បាន​២៣​គ្រាប់​។ ពេលនោះអ្នកគាំទ្រ Barcelona ចាត់ទុក​រូបគេជាសមាជិកដ៏សំខាន់ម្នាក់។

ទោះបីជាមួយរយៈពេលចុងក្រោយនេះ រូបគេខកខានក្នុងការរកគ្រាប់បាល់ស៊ុតបញ្ចូលទី និងអាយុកាន់តែច្រើនក៏ដោយ ប៉ុន្តែ Barcelona នៅតែរំពឹងថា នឹងរក្សាតារាឆ្នើមជនជាតិប៉ូឡូញយ៉ាងហោចណាស់មួយរដូវកាលទៀត។ បច្ចុប្បន្ន​ម្ចាស់​​ជើង​ឯក​អេស្ប៉ាញេរដូវកាលមុន មិនមានគម្រោង​​ផ្តាច់​ទំនាក់​ទំនង​ជាមួយ Lewandowski ទេ។ លើសពីនេះទៅទៀតកីឡាករ​ក៏បានបង្ហាញពីចេតនារក្នុងការបន្តនៅអេស្ប៉ាញ​​ដែល​មានលទ្ធភាព​ឈាន​ដល់ឆ្នាំ២០២៦។

យ៉ាង​ណា​មិញ ទម្រង់​លេង​ដ៏​អស្ចារ្យ​របស់​គេ​ក្នុង​រដូវ​កាល​ដំបូង​ហាក់​ដូច​ជា​រសាត់​បាត់​​​ក្នុង​រដូវ​កាល​នេះ។ ខ្សែប្រយុទ្ធ​វ័យ​៣៥​ឆ្នាំ​រកបានត្រឹម៨គ្រាប់ប៉ុណ្ណោះ ក្នុងការបង្ហាញខ្លួន២០លើក​គ្រប់​កម្មវិធី​ប្រកួត​ក្នុង​​រដូវកាលនេះ។ ការប្រកួត​ក្នុង​លីគ​៩លើកចុងក្រោយ រូប​គេ​បានបរាជ័យក្នុងការ​រក​គ្រាប់​៧លើក៕

ប្រែសម្រួល៖ ផា រតនា
ប្រភព៖ sportskeeda