ថៃ កំពុងរៀបឯកសារ ស្នើដាក់បញ្ចូលឈុតសម្លៀកបំពាក់ប្រពៃណី ទៅក្នុងបញ្ជីបេតិកភណ្ឌ អង្គការយូណេស្កូ

បន្ទាប់ពីទទួលជោគជ័យជាមួយការដាក់បញ្ចូលពិធីបុណ្យសង្ក្រាន្ត ពេលនេះ ក្រសួងវប្បធម៌ថៃ កំពុងរៀបចំឯកសារស្នើដល់អង្គការយូណេស្កូ ដើម្បីដាក់បញ្ចូលឈុតសម្លៀកបំពាក់ប្រពៃណី ទៅក្នុងបញ្ជីបេតិកភណ្ឌវប្បធម៌អរូបី។ នេះបើតាមការបញ្ជាក់នៅថ្ងៃព្រហស្បតិ៍ទី២១ខែធ្នូ ពីអគ្គនាយកនៃនាយកដ្ឋានផ្សព្វផ្សាយវប្បធម៌ថៃលោក Kowit Pakamart។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្រាប់ដំណើរការបញ្ជូនសំណើទៅកាន់អង្គការអប់រំ វិទ្យាសាស្ត្រ និងវប្បធម៌របស់ UN,នាយកដ្ឋានថៃ បានបើកកិច្ចពិភាក្សាជាមួយបុគ្គលទាំងឡាយណាដែលជាប់ពាក់ព័ន្ធក្នុងគម្រោងនេះ ដើម្បីចងក្រងព័ត៌មានអំពីឈុតសម្លៀកបំពាក់ប្រពៃណីថៃ។

លោក Kowit និយាយថា ឈុតសម្លៀកបំពាក់ប្រពៃណីរបស់ថៃ គឺមិនដូចរបស់ជាតិសាសន៍ដទៃទេ ពោលគឺសម្រាប់ទាំងការរចនា និងវត្ថុធាតុដើមយកមកផលិតគឺមានតែមួយគត់ ហើយវាបង្ហាញពីសិល្បៈហត្ថកម្មដែលឆ្លុះបញ្ចាំងពីតំបន់ផ្សេងៗ។ លោកបន្តថា ការស្លៀកពាក់បែបប្រពៃណីរបស់ថៃ ក៏ជាបទដ្ឋានសង្គមសម្រាប់ប្រជាជនថៃផងដែរ ដើម្បីបង្ហាញថា ពួកគេស្រឡាញ់ប្រពៃណី និងវប្បធម៌របស់ពួកគេ។

សម្រាប់ស្ត្រី ឈុតសម្លៀកបំពាក់ប្រពៃណី គឺមានប្រាំបីប្រភេទសំខាន់ៗ ចំណែកបុរស សម្លៀកបំពាក់ប្រពៃណីនេះ មានបីប្រភេទធំៗ សម្រាប់ពាក់ក្នុងឱកាសផ្សេងៗ។

ព្រះមហាក្សត្រិយានី Sirikit បានផ្តួចផ្តើមស្រាវជ្រាវលើការស្លៀកពាក់របស់នារីថៃ តាមសម័យកាលផ្សេងៗគ្នា ដើម្បីរចនាម៉ូដសម្រាប់គ្រងពេលអមព្រះមហាក្សត្រ Bhumibol Adulyadej ក្នុងព្រះរាជដំណើរបំពេញទស្សនកិច្ចនៅសហរដ្ឋអាមេរិកនិងអឺរ៉ុប កាលពី៦០ឆ្នាំមុន។

គួបញ្ជាក់ជាថ្មី នៅដើមខែធ្នូ អង្គការយូណេស្កូ បានប្រកាសចេញពីប្រទេសបុតស្វាណា ដើម្បីដាក់បញ្ចូលពិធីបុណ្យសង្ក្រាន្តចូលឆ្នាំថ្មីរបស់ថៃ បន្ទាប់ពីថៃ ស្នើដាក់បញ្ចូលព្រឹត្តិការណ៍មួយនេះកាលពីឆ្នាំ ២០២០ មកម្ល៉េះ។

ក្រោពីការដាក់បញ្ចូលពិធីបុណ្យសង្ក្រាន្តក្នុងបញ្ជីបេតិកភណ្ឌវប្បធម៌អរូបី, មុននេះ ស្ថាប័ន UN ក៏បានទទួលស្គាល់ល្ខោន Khon នៅឆ្នាំ២០១៨, ការម៉ាស្សាបែបថៃក្នុងឆ្នាំ២០១៩ និងរបាំណូរ៉ានៅឆ្នាំ២០២១ផងដែរ៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ អង្គការ យូណេស្កូ ប្រកាសដាក់បញ្ចូលពិធីបុណ្យសង្ក្រាន្ត ថៃ ទៅក្នុងបញ្ជី​​បេតិកភណ្ឌពិភពលោកជាផ្លូវការ