មនុស្ស ៨នាក់ស្លាប់ និងរាប់សិបនាក់ កប់បាត់ក្នុងដី ក្នុងហេតុការណ៍បាក់ស្រុត នៅប្រទេសចិន

នៅព្រឹកព្រលឹមថ្ងៃច័ន្ទ ទី២២ ខែមករា នេះ មានមនុស្សរាប់សិបនាក់ត្រូវបានកប់បាត់ក្នុងដី និង ៨ នាក់បានរកឃើញ “ស្លាប់” នៅក្នុងហេតុការណ៍របាក់ដី ក្នុងតំបន់ Zhenxiong ខេត្ត Yunnan ដែលជាតំបន់ព្រៃភ្នំដាច់ស្រយាល នៃភាគនិរតីប្រទេសចិន។

ប្រព័ន្ធផ្សព្វផ្សាយរដ្ឋប៉េកាំង CCTV បាននិយាយថា ហេតុការណ៍ដ៏រន្ធត់នេះបានបណ្ដាលឱ្យខូចខាតផ្ទះសម្បែងប្រជាជនចំនួន ១៨ខ្នង និងបង្កឱ្យមានការជម្លៀសមនុស្សជាង ២០០ នាក់ ចេញពីតំបន់គ្រោះថ្នាក់ ។

យោងតាមរបាយការណ៍ពីប្រភពខាងលើ បានឱ្យដឹងទៀតថា មនុស្សចំនួន ៨ នាក់ត្រូវបានបញ្ជាក់ថា “បានស្លាប់” ហើយក្រុមសង្គ្រោះចំនួនពីររយនាក់ត្រូវបានបញ្ជូនទៅកន្លែងកើតហេតុ ព្រមទាំងមានដូចជាម៉ាស៊ីនពន្លត់អគ្គីភ័យរាប់សិបគ្រឿង និងឧបករណ៍ផ្សេងៗទៀតផងដែរ។

សូមបញ្ជាក់ថា÷ គ្រោះធម្មជាតិបាក់ដីគឺជារឿងធម្មតានៅក្នុងខេត្ត Yunnan ដែលជាតំបន់ដាច់ស្រយាល និងជាតំបន់ក្រីក្របំផុតនៃប្រទេសចិន ។ វាជាតំបន់ជួរភ្នំដ៏ចោត ដែលគេស្គាល់ថា ជាតំបន់ខ្ពង់រាបហិម៉ាឡៃ ៕

ប្រែសម្រួលដោយ÷ ប៉ោ កុសល