ព័ត៌មានជាតិ

កម្ពុជា-ឥណ្ឌូណេស៊ី បើកទំព័រកិច្ចសហប្រតិបត្តិការ ផ្ដោតលើពាណិជ្ជកម្មកាបូននិងថាមពលបៃតង

បានផុស

២ years មុន

នៅ

ថ្ងៃសុក្រ ២៦ មករា ២០២៤

ដោយ

ដើម្បីឆ្លើយតបនឹងការប្រែប្រួលអាកាសធាតុពាណិជ្ជកម្មកាបូននិងថាមពលបៃតង ស្ថានទូតឥណ្ឌូណេស៊ីប្រចាំនៅកម្ពុជា និងក្រសួងបរិស្ថានបានសម្រេចបើកទំព័រនៃកិច្ចសហប្រតិបត្តិការទ្វេភាគីរវាងឥណ្ឌូណេស៊ី-កម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងជំនួបនៅទីស្តីការក្រសួងបរិស្ថាន លោក សានតូ ដាមូស៊ូម៉ាតូ ឯកអគ្គរដ្ឋទូតឥណ្ឌូណេស៊ីប្រចាំនៅកម្ពុជាបានថ្លែងអបអរចំពោះសមិទ្ធផលការងារដែលក្រសួងបរិស្ថានសម្រេចបានដោយជោគជ័យនូវភារកិច្ចក្នុងរយៈពេល ១០០ ថ្ងៃ។

ដើម្បីបន្តរឹតចំណងមិត្តភាពរវាង កម្ពុជា-ឥណ្ឌូណេស៊ី ឲ្យកាន់តែមានភាពស្អិតរមួតទ្វេឡើង ឯកអគ្គរដ្ឋទូតក៏បានបង្ហាញពីគោលបំណងក្នុងកិច្ចសហប្រតិបត្តិការទ្វេភាគី ដែលផ្ដោតសំខាន់លើកិច្ចគាំពារបរិស្ថាន ជីវៈចម្រុះ និងសេដ្ឋកិច្ចបៃតង ដោយរាប់បញ្ចូលឥណទានកាបូន ពាណិជ្ជកម្មកាបូន និងថាមពលបៃតងឆ្លើយតបនឹងការប្រែប្រួលអាកាសធាតុ។

ជាការឆ្លើយតប លោកអ៊ាង សុផល្លែត រដ្ឋមន្រ្តីក្រសួងបរិស្ថានបានជម្រាបជូនដល់ឯកអគ្គរដ្ឋទូតអំពីយុទ្ធសាស្រ្តចក្រាក្នុងវិស័យបរិស្ថានឆ្នាំ២០២៣-២០២៨ ដែលឈរលើយុទ្ធសាស្រ្តគន្លឹះនេះកម្ពុជាចង់សម្រេចបានភាពស្អាត ភាពបៃតង និងចីរភាព។

ជាមួយគ្នានេះ លោករដ្ឋមន្រ្តីបានបន្តថា កម្ពុជា-ឥណ្ឌូណេស៊ី នឹងធ្វើការជាមួយគ្នាយ៉ាងជិតស្និទ្ធ ដើម្បីសម្អាតប្រទេសទាំងពីរឲ្យទទួលបានភាពស្អាត មិនមានការបំពុលដោយសំណល់ប្លាស្ទិក និងមានភាពបៃតង តាមរយៈការបង្កើនគម្របព្រៃឈើឈានឆ្ពោះទៅជាប្រទេសអព្យាក្រឹតកាបូនឆ្លើយតបនឹងការប្រែប្រួលអាកាសធាតុ ដើម្បីពង្រឹងការវិនិយោគបៃតងក្រោមកិច្ចសហប្រតិបត្តិការទ្វេភាគីដ៏រឹងមាំនេះ។

គួររម្លឹកជូនថា ទំនាក់ទំនងការទូតរវាងឥណ្ឌូនេស៊ី និងកម្ពុជាអស់រយៈពេល ៦៥ឆ្នាំមកនេះ បាននាំមកនូវផលប្រយោជន៍ជាច្រើន តាមរយៈការវិនិយោគ ការនាំចេញនាំចូលផលិតផល ការផ្លាស់ប្តូរទំនិញកសិកម្ម ឧស្សាហកម្មសម្រាប់ប្រជាពលរដ្ឋនៃប្រទេសទាំងពីរ ៕