ថៃ ជាប់ជាប្រទេសមានកម្រិត IQ លំដាប់ទី ៥ នៅអាស៊ាន និង ៦៤ លើពិភព​លោក តែចាញ់ កម្ពុជា

យោងតាមទិន្នន័យពីរបាយការណ៍របស់ World Statistics បានឲ្យដឹងថា ប្រទេសដែលមានកម្រិតវៃឆ្លាត ឬ IQ ខ្លាំងជាងគេលំដាប់កំពូលនៅលើពិភពលោកបានទៅលើជប៉ុន មានពិន្ទុសរុប ១០៦.៤៨ ខណៈថៃជាប់ចំណាត់ថ្នាក់ទី ៦៤ ហើយគិតក្នុងតំបន់អាស៊ាន ប្រទេសនេះស្ថិតក្នុងលំដាប់ទី ៥ តាមពីក្រោយដោយ សិង្ហបុរី កម្ពុជា មីយ៉ាន់ម៉ា និងវៀតណាម ។

យោងតាមការចេញផ្សាយដោយសារព័ត៌មាន The Nation នៅថ្ងៃទី១៩ ខែកុម្ភៈនេះបានឲ្យដឹងថា ចំណែកប្រទេស និងដែនដីមានកម្រិត IQ ខ្ពស់តោងពីក្រោយជប៉ុននោះគឺ កោះតៃវ៉ាន់ មានពិន្ទុសរុបចំនួន ១០៦.៤៧ ខណៈប្រទេសសិង្ហបុរីដែលឈរនៅលំដាប់ទី ៣ នៅលើពិភពលោកមានលំដាប់ពិន្ទុចំនួន ១០៥.៨៩ ។

ទន្ទឹមនោះ សិង្ហបុរីជាប្រទេសមានកម្រិត IQ លំដាប់កំពូលក្នុងតំបន់អាស៊ាន បន្ទាប់មកគឺព្រះរាជាណាចក្រកម្ពុជាស្ថិតនៅលេខ ២ ដែលមានកម្រិត IQ ជាមធ្យម ៩៩.៧៥ និងទទួលបានចំណាត់ថ្នាក់ទី ១៥ នៅទូទាំងពិភពលោក ។ ចំណែកប្រទេសមីយ៉ាន់ម៉ាជាប់ចំណាត់ថ្នាក់ទី ៥២ នៅលើពិភពលោកដែលមានកម្រិត IQ ជាមធ្យម ៩១.១៨ ខណៈវៀតណាមជាប់លេខរៀងទី ៦០ ជាមួយនឹងកម្រិត IQ ជាមធ្យម ៨៩.៦ ។

រីឯប្រទេសចិនមានប្រជាជនដែលមានកម្រិត IQ ជាមធ្យមចំនួន ១០៤.១ ស្ថិតនៅលំដាប់ទី ៥ នៅទូទាំងពិភពលោក ខណៈជនជាតិអាមេរិកមាន IQ ជាមធ្យម ៩៧.៤ ជាប់ចំណាត់ថ្នាក់ទី ២៩ ខណៈថៃដែលឈរនៅលេខរៀងទី ៦៤ មានកម្រិត IQ ចំនួន ៨៨.៨៧ ។

ចំណែកពាក់ព័ន្ធនឹងកត្តាដែលជំរុញឲ្យប្រទេសទាំងនោះមានកម្រិត IQ ខ្ពស់បែបនេះគឺដោយសារតែ កត្តាហ្សែន លក្ខខណ្ឌសេដ្ឋកិច្ចរឹងមាំ ការអប់រំ សុខភាព និងកត្តាផ្សេងៗទៀតដូចជា ទិដ្ឋភាពវប្បធម៌សង្គម បរិស្ថាន និងការចិញ្ចឹមបីបាច់ថែរក្សាពីសំណាក់ឪពុកម្ដាយជាដើម ៕

ដោយ ៖ សុខ ជីវ័ន្ត

ចុចអាន ៖ នាយករដ្ឋមន្ត្រី ថៃ បញ្ជាក់ច្បាស់ៗពីថ្ងៃដោះលែងលោក ថាក់ស៊ីន ឲ្យមានសេរីភាព