សម្ដេចនាយករដ្ឋមន្ត្រី ប្រាប់ឱ្យគ្រូពេទ្យបន្តពង្រឹងក្រមសីលធម៌ និងជំនាញប្រកបដោយទំនួលខុសត្រូវ

អញ្ជើញជាអធិបតីក្នុងពិធីសម្ពោធមន្ទីរពេទ្យតេជោសែនកោះធំ នាព្រឹកថ្ងៃទី១៣ ខែមីនា ឆ្នាំ២០២៤នេះ សម្ដេចធិបតី នាយករដ្ឋមន្ត្រីនៃកម្ពុជា បានប្រាប់ឱ្យក្រុមគ្រូពេទ្យទាំងអស់ ត្រូវបន្តពង្រឹងក្រមសីលធម៌ និងជំនាញវិជ្ជាជីវៈរបស់ខ្លួន ប្រកបដោយទំនួលខុសត្រូវ ក្នុងការផ្ដល់សេវាព្យាបាលអ្នកជំងឺ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការថ្លែងជំរុញឱ្យមានការពង្រឹងលើក្រមសីលធម៌ និងសមត្ថភាពរបស់ក្រុមគ្រូពេទ្យកម្ពុជានេះ គឺខណៈពេលបច្ចុប្បន្ននេះ ក្រមសីលធម៌របស់គ្រូពេទ្យមួយចំនួនហាក់នៅមានកម្រិតនៅឡើយ ហើយតែងរងការរិះគន់ពីសំណាក់មជ្ឈដ្ឋានប្រជាពលរដ្ឋលើសមត្ថភាពរបស់គ្រូពេទ្យកម្ពុជា។

ជាការឆ្លើយតបនឹងបញ្ហានេះ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា មែនទែនទៅ គ្រូពេទ្យរបស់កម្ពុជានៅទូទាំងប្រទេសបានខិតខំយកចិត្តទុកដាក់លើការព្យាបាលប្រជាពលរដ្ឋរាប់សិបលាននាក់ឱ្យជាសះស្បើយ រួមទាំងដំណាក់កាលកូវីដ១៩ ក្រុមគ្រូពេទ្យកម្ពុជាបានខិតខំប្រឹងប្រែងខ្លាំងណាស់ក្នុងការជួយសង្គ្រោះអ្នកជំងឺ រហូតកម្ពុជាអាចគ្រប់គ្រងការរាតត្បាតកូវីដ១៩ បានយ៉ាងល្អប្រសើរបំផុត ស្ទើរតែ១០០ភាគរយ។ ក្នុងន័យនេះ សម្ដេចធិបតី បានស្នើដល់ប្រជាពលរដ្ឋ គប្បីជឿទុកចិត្តលើសមត្ថភាពរបស់ក្រុមគ្រូពេទ្យនៅក្នុងប្រទេស។

តែយ៉ាងណាមិញ ជាមួយនឹងការស្នើឱ្យពលរដ្ឋមានទំនុកចិត្តលើគ្រូពេទ្យ សម្ដេចនាយករដ្ឋមន្ត្រី ក៏បានជំរុញឱ្យក្រុមគ្រូពេទ្យទាំងអស់របស់កម្ពុជា ដែលជាសេនាទេវតា ត្រូវតែបន្តខិតខំយកចិត្តទុកដាក់ទៅលើការពង្រឹងនូវក្រមសីលធម៌ ពង្រឹងនូវអាជីព និងជំនាញ ក៏ដូចជាការទទួលខុសត្រូវរបស់ខ្លួនឱ្យបានខ្ពស់បន្ថែមទៀតក្នុងវិជ្ជាជីវៈជាគ្រូពេទ្យ។

ទន្ទឹមនេះ សម្ដេច ក៏បានណែនាំឱ្យក្រសួងសុខាភិបាល ត្រូវជួយពីក្រោមដល់គ្រូពេទ្យ មិនថា រដ្ឋ ឬឯកជន ដើម្បីឱ្យក្រុមគ្រូពេទ្យទាំងអស់មានលទ្ធភាពបង្កើនគុណវុឌ្ឍិ សមត្ថភាព និងការទទួលខុសត្រូវ ពិសេសការចូលរួមរបស់ក្រុមគ្រូពេទ្យក្នុងការព្យាបាលប្រជាពលរដ្ឋ ដែលជាកិច្ចការដ៏សំខាន់ និងចាំបាច់បំផុត៕