ព័ត៌មានអន្ដរជាតិ

ថៃ ត្រូវប៉ាន់នាំចេញ ទុរេន ដំឡូង និងសាច់មាន់ក្នុងកិច្ចព្រមព្រៀងពាណិជ្ជកម្មសេរី

បានផុស

២ years មុន

នៅ

ថ្ងៃសៅរ៍ ៣០ មីនា ២០២៤

ដោយ

ពាណិជ្ជកម្មផលិតផលកសិកម្មថៃទៅកាន់ប្រទេសនានាលើពិភពលោក គិតរយៈពេលត្រឹមឆ្នាំ ២០២៣ កន្លងទៅមានកំណើនគួរកត់សម្គាល់ ពោលប្រមាណ ៣.២៥% ឬស្មើនឹង ១.០១ លានលានបាត ប្រហែល ២៧.៧ ពាន់លានដុល្លារ បើធៀបនឹងឆ្នាំ ២០២២ ខណៈការនាំចេញកសិកម្មថៃមានផលលើសក្នុងទំហំទឹកប្រាក់ប្រមាណ ៥២៩ ពាន់លានបាត ឬស្មើ ១៤.៥ ពាន់លានដុល្លារ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពព័ត៌មានពី Khaosod បានឲ្យដឹងថា ទីផ្សារនាំចេញសំខាន់ៗសម្រាប់ផលិតផលកសិកម្មរួមមាន ប្រទេសចិន ជប៉ុន កូរ៉េខាងត្បូង និងអូស្រ្តាលី ហើយទំនិញលំដាប់កំពូលទាំង ៥ របស់ថៃនាំចេញគឺមាន ទុរេន ក្នុងទំហំទឹកប្រាក់ ៣ពាន់លានដុល្លារ ផលិតផលសាច់មាន់សម្រេចទំហំ ១ ពាន់លានដុល្លារ ជ័រកៅស៊ូធម្មជាតិទំហំទឹកប្រាក់ ១ ពាន់លានដុល្លារ ដំឡូងក្នុងទំហំទឹកប្រាក់ ១ ពាន់លានដុល្លារ សាច់មាន់បង្កក និងគ្រឿងក្នុងមាន់ ទំហំទឹកប្រាក់ ៩០០ លានដុល្លារ ។

សម្រាប់តម្លៃទំហំពាណិជ្ជកម្ម និងអត្រាកំណើននៃដៃគូកិច្ចព្រមព្រៀងពាណិជ្ជកម្មសេរី FTA គឺប្រទេសចិនជាទីផ្សារនាំចេញរបស់ថៃនាំមុខគេ ភាគច្រើនជាផលិតផលកសិកម្ម ពិសេសការនាំចេញទុរេន ដំឡូង និងជ័រកៅស៊ូធម្មជាតិ ហើយរំពឹងថា នឹងបន្តកើនឡើងជាបន្តបន្ទាប់ក្នុងប្រតិបត្តិការពាណិជ្ជកម្មខាងមុខទៀត ។

គួររំឭកដែរថា ប្រទេសដែលបានចូលរួមកិច្ចព្រមព្រៀងពាណិជ្ជកម្មសេរីជាមួយប្រទេសថៃ លើកលែងតំបន់អាស៊ានចេញ រួមប្រទេសចិន ជប៉ុន កូរ៉េខាងត្បូង អូស្រ្តាលី នូវែលសេឡង់ ប៉េរូ ឈីលី ឥណ្ឌា និងហុងកុង ខណៈប្រទេសទាំងនេះ ជាដៃគូពាណិជ្ជកម្ម ក៏ដូចទីផ្សារសំខាន់ៗសម្រាប់ការនាំចេញរបស់ប្រទេសថៃ ៕