ក្រៅពីសូរ្យគ្រាសមហាកម្រ នៅមានព្រឹត្តិការណ៍តារាសាស្រ្ត ៣ទៀត កើតឡើងក្នុងខែមេសានេះ

ត្បិតតែគ្រប់គ្នាកំពុងចាប់អារម្មណ៍ខ្លាំងទៅលើសូរ្យគ្រាសមហាកម្រនៅសហរដ្ឋអាមេរិក កាណាដា និងម៉ិកស៊ិក នៅថ្ងៃទី៨ខាងមុខក៏ពិតមែន ប៉ុន្តែជាក់ស្តែង ក្នុងខែមេសា មិនមែនមានត្រឹមបាតុភូតនេះឡើយ ពោលគឺនៅមានព្រឹត្តិការណ៍តារាសាស្រ្តចំនួន៣ទៀត ដែលភពផែនដីនឹងជួបប្រទះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមគេហទំព័រ Popsci ចុះផ្សាយនៅថ្ងៃព្រហស្បតិ៍ទី៤ខែមេសា, ក្រៅពីបាតុភូតសូរ្យគ្រាសមហាកម្រនៅតំបន់អាមេរិកខាងជើង ព្រឹត្តិការណ៍តារាសាស្រ្ត៣ទៀត មានដូចជា៖

១. ផ្កាយដុះកន្ទុយបិសាច (ថ្ងៃទី២១ខែមេសា)

ដោយបង្ហាញខ្លួនដំបូងនៅអឌ្ឍគោលខាងជើងក្នុងខែមីនា ផ្កាយដុះកន្ទុយ Comet 12P/Pons-Brooks ឬគេឲ្យឈ្មោះថា “ផ្កាយដុះកន្ទុយបិសាច” នឹងឈានដល់ចំណុចជិតបំផុតទៅនឹងព្រះអាទិត្យនៅថ្ងៃទី២១ខែមេសា។ ក្នុងអំឡុងពេលនោះ មនុស្សអាចអាចមើលឃើញដោយភ្នែកទទេ ប្រសិនបើមេឃងងឹត។ មិនមែនត្រឹមអឌ្ឍគោលខាងជើងទេ អ្នករស់នៅអឌ្ឍគោលខាងត្បូងក៏អាចមើលឃើញបាតុភូតនេះផងដែរ។

២. ភ្លៀងទេពច្យុត Lyrids (ថ្ងៃទី២១ដល់២៣ខែមេសា)

ភ្លៀងទេពច្យុត Lyrids ប្រចាំឆ្នាំនឹងចាប់ផ្តើមជាផ្លូវការនៅថ្ងៃទី១៥ខែមេសា ហើយត្រូវគេព្យាករថា នឹងឡើងដល់ចំណុចកំពូលនៅរាត្រីថ្ងៃទី២១ខែមេសា។ យ៉ាងណា ឆ្នាំនេះ ភ្លៀងទេពច្យុត ហាក់មើលមិនច្បាស់ខ្លាំងឡើយ ដោយសារតែចាំងពន្លឺព្រះចន្ទ ធ្វើឲ្យមេឃភ្លឺ។ តាមការបញ្ជាក់ពីក្រុមអ្នកវិទ្យាសាស្រ្ត, នឹងមានទេពច្យុតប្រហែល១០០បង្ហាញខ្លួនពេលវាឈានដល់កម្រិតកំពូល ហើយគេអាចមើលឃើញនៅអឌ្ឍគោលខាងជើង និងខាងត្បូង ប៉ុន្តែនៅអឌ្ឍគោលខាងជើង មើលឃើញខ្លាំងជាង។

៣. ព្រះចន្ទពេញវង់ពណ៌ផ្កាឈូក (ថ្ងៃទី២៣ខែមេសា)

ព្រះចន្ទពេញវង់លើកដំបូងនៃនិទាឃរដូវនៅអឌ្ឍគោលខាងជើង នឹងជះពន្លឺភ្លឺបំផុតនៅម៉ោង ៧:៤៩ យប់នៅថ្ងៃទី២៣ខែមេសា។ បានជាគេហៅថាជាព្រះចន្ទពេញវង់ពណ៌ផ្កាឈូកព្រោះ ពេលនោះ​ ជាដើមនិទាឃរដូវដែលផ្កាព្រៃ Phlox subulata នៅភាគខាងកើតទ្វីបអាមេរិកខាងជើងរីកស្គុសស្គាយ៕

អត្ថបទ៖ សុខ សុវណ្ណ