សីតុណ្ហភាពហក់ឡើងដល់ជិត៥០អង្សាសេ សម្លាប់មនុស្ស ជាង១០០នាក់ នៅ ម៉ាលី 

សារព័ត៌មាន APA បានរាយការណ៍ថា គិតត្រឹមពេលនេះ មានមនុស្សជាង១០០នាក់ហើយ ត្រូវបាត់បង់ជីវិតនៅក្នុងប្រទេសម៉ាលី ដោយសារតែរលកកម្តៅ ដែលវាយប្រហារ ចាប់តាំងពីដើមខែមេសាមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីសប្តាហ៍មុន ទីក្រុង Kayes ភាគនិរតី បានជួបប្រទះសីតុណ្ហភាពហក់ឡើងខ្ពស់បំផុត ដល់ ៤៨.៥អង្សាសេ ហើយនោះ​ជា​ថ្ងៃ​ក្តៅ​បំផុត​ក្នុង​ប្រវត្តិសាស្ត្រ​ទ្វីបអាហ្រ្វិក។

តាមសេចក្តីរាយការណ៍, មន្ទីរពេទ្យ Gabriel-Toure បានទទួលអ្នកជំងឺដែលធ្លាក់ខ្លួនឈឺដោយសារអាកាសធាតុចំនួន១០២នាក់ ប៉ុន្តែមិនអាចជួយសង្គ្រោះបានឡើយ បណ្តាលឲ្យពួកគេបាត់បង់ជីវិត។

ត្បិតតួលេខផ្លូវការខាងលើមានមនុស្សស្លាប់១០២នាក់ក៏ពិតមែន ប៉ុន្តែប្រភពក្នុងស្រុកមួយបានបង្ហើបថា មនុស្សស្លាប់ក្នុងរយៈពេលត្រឹម៣ថ្ងៃចុងក្រោយ មានរហូតដល់ទៅ២៥០នាក់ឯណោះ។

ស្របពេលជាមួយគ្នានោះដែរ ក្រុមមន្ត្រីបានជំរុញឲ្យប្រជាពលរដ្ឋ ត្រូវស្នាក់នៅក្នុងកន្លែងដែលមានខ្យល់ចេញចូល ហើយត្រូវពង្រឹងវិធានការការពារលើសិស្សសាលា ដោយសារក្មេងៗគឺជាជនងាយរងគ្រោះដូចជាមនុស្សចាស់ដែរ។

គេដឹងថា សីតុណ្ហភាពខ្ពស់គឺបណ្តាលមកពីបាតុភូតអាកាសធាតុ El Nino ដែលបង្កើនសីតុណ្ហភាពមហាសមុទ្រ និងបរិយាកាស។

បាតុភូតធម្មជាតិនេះ តែងតែកើតមានរៀងរាល់២ទៅ៧ឆ្នាំម្តង ហើយទាញបន្ថយកម្រិតភ្លៀងធ្លាក់ ខណៈផលប៉ះពាល់របស់វាត្រូវបានគេចាត់ទុកថាធ្ងន់ធ្ងរគួរសម ពោលគឺវាចោទជាបញ្ហាដល់វិស័យកសិកម្ម ការនាំចេញ និងទេសចរណ៍ ព្រមទាំងវិស័យផ្សេងៗទៀត៕

អត្ថបទ៖ សុខ សុវណ្ណ

ចុចអាន៖ ខែកុម្ភៈឆ្នាំនេះ តំបន់ស្ទើរពេញពិភពលោក ជួបអាកាសក្ដៅបំផុតមិនធ្លាប់មាន