ព័ត៌មានជាតិ

ទិន្នផលពោតរបស់សហគមន៍កសិករ ក្រុងស្ទឹងត្រែងថមថយចុះ ដោយសារអាកាសធាតុក្តៅ

បានផុស

២ years មុន

នៅ

ថ្ងៃចន្ទ ២៩ មេសា ២០២៤

ដោយ

សហគមន៍កសិករដាំពោតនៅភូមិកំផាន់ សង្កាត់សាមគ្គី ក្រុងស្ទឹងត្រែង ខេត្តស្ទឹងត្រែង បានព្យាយាមដាំពោតធ្វើជាភូមិមួយផលិតផលមួយ តែនៅឆ្នាំនេះដំណាំពោតរងផលប៉ះពាល់ពីអាកាសធាតុក្តៅខ្លាំងបង្កឱ្យផលពោត ត្រូវខាតបង់ដោយសារតែផ្លែ វាដាក់គ្រាប់មិនបានពេញល្អ ហើយគ្មានអ្នកបញ្ជាទិញ។

លោក អន ជួន មេភូមិខាំផាន់ប្រាប់ថា៖ ដំណាំពោតកសិករនៅឆ្នាំនេះ ជួបប្រទះអាកាសធាតុប្រែប្រួល បានបង្កឱ្យពោតដាក់គ្រាប់មិនបានពេញល្អ ធ្វើឱ្យកសិករខាតបង់ថវិកាប្រមាណជាង២០% ក្នុងចំការនីមួយៗ ទោះបីបងប្អូនខិតខំប្រើមធ្យោបាយថែទាំ បូមទឹកដាក់ យ៉ាងណាក៏ដោយក៏មិនអាចជួយស្រោចស្រង់បានដែរ។

លោកបន្តថា៖ ការដាំដុះបច្ចុប្បន្នកសិករអនុវត្តតាមបច្ចេកទេស ទាំងការថែទាំ និងការជ្រើសរើសពូជ បានត្រឹមត្រូវហើយ តែឆ្នាំនេះអាកាសអាតុក្តៅហួសការស្មាន បង្កឱ្យដំណាំពោតថយគុណភាព។

«ឆ្នាំនេះវាក្តៅពេកទឹកមិនគ្រប់គ្រាន់ផ្លែវាមានខ្លះអញ្ចឹងមិនអាចបំពេញគ្រាប់ប៉ុន្តែយើងចង់ទប់និងធាតុអាកាសអត់បានទេវាអាចថយចុះប្រមាណ ១៥ ទៅ២០%គុណភាព វាបើដូចរាល់ឆ្នាំអត់អីទេគឺពោតសាច់ពេញៗព្រោះធាតុអាកាសត្រជាក់អត់ដូចឆ្នាំនេះក្តៅខ្លាំង»។ លោក អន ជួន បន្ថែម។

លោក ឈាវ សុគុណថែល រស់នៅភូមិខាំផាន់ បានបញ្ជាក់ថា៖ កសិករប្រមាណជាង៧០គ្រួសារនៅក្នុងភូមិនេះបានព្យាយាមដាំពោតប្រចាំរដូវកាល ដើម្បីផ្គត់ផ្គង់ទៅកាន់ទីផ្សារប្រយោជន៍រួមគ្នាថែរក្សាឱ្យបានកេរ្តិ៍ឈ្មោះភូមិមួយមានផលិតផលមួយ គឺពោតសហគមន៍ភូមិខាំផាន់។

លោកបន្ថែមថា៖ ដំណាំពោតនៅជុំទី៣នេះ ស្ទើរតែបាត់បង់ ផលិតផលមួយភូមិមួយ ព្រោះរងផលប៉ះពាល់ពីការប្រែប្រួលអាកាសធាតុ ធ្វើឲ្យកសិករខាតបង់ដើមទុនទៅលើការចំណាយទិញប្រេងបូមទឹក។

លោកស្រី ឆៃ ចិត្រា អ្នកស្ងោរពោតលក់ នៅក្រុងស្ទឹងត្រែង បានឲ្យទទួលស្គាល់ថា៖ បច្ចុប្បន្នពោត និងបន្លែផ្សេងៗ ដែលនាំចេញពីភូមិខាំផាន់នេះ ស្រួលលក់ដូរជាងពោតនិងបន្លែនាំចូលមកពីបណ្តាតំបន់នានា ព្រោះអាតិថិជនបានស្គាល់ប្រភពច្បាស់លាស់ និងមានរសជាតិឆ្ងាញ់ផង។

លោកស្រីថា៖ ពោតឆៅក្នុងមួយផ្លែមានតម្លៃចាប់ពី ៥០០ ទៅ៧០០រៀល ពេលស្ងោរឆ្អិនមួយតម្លៃ ១០០០ រៀលតែប៉ុណ្ណោះ។

នៅភូមិខាំផាន់សង្កាត់សាមគ្គីមានប្រជាពលរដ្ឋរស់នៅជាង ២០០ គ្រួសារ បានប្រកបមុខរបរដាំដំណាំរួមផ្សំ ជាពិសេសដំណាំពោត នៅតាមជួរដងទន្លេមេគង្គ ដែលមានផ្ទៃដីលាតសន្ធឹងជាង៨គីឡូម៉ែត្រ ហើយបច្ចុប្បន្នដំណាំពោតជាង១៥ ហិកតា កំពុងរងការថមថយទិន្នផលដោយសារតែអាកាសធាតុក្តៅហួសកម្រិត៕