ព័ត៌មានជាតិ

ទឹកអូរត្រែង ឡើងពណ៌ខ្មៅ ដោយសារសហគ្រាសកែច្នៃផ្លែស្វាយ បង្ហូរទឹកកខ្វក់ចូល

បានផុស

១ ខែ មុន

នៅ

ថ្ងៃសៅរ៍ ៤ ឧសភា ២០២៤

ដោយ

ចាប់តាំងពីល្ងាចថ្ងៃទី ៣ រហូតមកដល់ព្រឹកថ្ងៃទី ៤ ខែឧសភា ឆ្នាំ ២០២៤ នេះ ទឹកអូរត្រែង បានប្រែពណ៌ខុសពីធម្មតា ហើយម្យ៉ាងទៀតដែលនេះជារដូវប្រាំងផងគឺទឹកមាននៅបាតអូរបណ្ដាលឲ្យពណ៌ឡើងខ្មៅ និងមានពុលត្រីថែមទៀតផង។

គួរបញ្ជាក់ថា អូរនេះមានប្រភពចេញពីព្រំប្រទល់ខេត្តប៉ៃលិន និងហូរកាត់ភូមិជាច្រើនក្នុងស្រុករតនៈមណ្ឌល ខេត្តបាត់ដំបង កន្លងមកប្រជាពលរដ្ឋរស់នៅតាមបណ្ដោយអូរតែងតែយកទឹកនេះទៅប្រើប្រាស់ ឬក៏ឲ្យសត្វពាហនៈផឹកផងដែរ។

លុះនៅពេលថ្មីៗ នេះ ស្រាប់តែទឹកអូរឡើងពណ៌ខ្មៅ ថែមទាំងមានត្រីពុល ដែលធ្វើឲ្យប្រជាពលរដ្ឋចុះដួសយកត្រីដើម្បីទុកបរិភោគ គេមិនទាន់ដឹងថា តើទឹកនេះមានសារធាតុគីមីដែរឬយ៉ាងណានោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈទូរសព្ទនៅព្រឹកនេះដែរ លោក ផេង សិទ្ធី អភិបាលរង នៃគណៈអភិបាលខេត្តបាត់ដំបង ដែលបានដឹកនាំក្រុមការងារ និងសហការជាមួយលោក គុយ វ៉ាន់ណូ អភិបាលស្រុករតនៈមណ្ឌល បានបញ្ជាក់ថា ក្រុមការងាររបស់លោកបានចុះទៅដល់ទីតាំងសហគ្រាសកែច្នៃផ្លែស្វាយទាំងពីរទីតាំងហើយ ដែលទីតាំងទីមួយ នៅក្នុងភូមិស្វាយស និងទីតាំងទីពីរ ក្នុងភូមិតាគ្រក់ ឃុំត្រែង ស្រុករតនៈមណ្ឌល ដើម្បីពិនិត្យទៅលើទឹកទាំងនេះ។

លោកអភិបាលរងខេត្ត បានបញ្ជាក់ថា ក្រោយពីបានចុះទៅពិនិត្យគឺសហគ្រាសទាំងពីរកន្លែងនេះបានប្រើប្រាស់ទឹកដើម្បីលាងសម្អាតផ្លែស្វាយផង និងលាងសម្អាតសាច់ស្វាយផង ក្នុងការនាំចេញយកទៅក្រៅប្រទេស ឯកាកសំណល់សំបក និងគ្រាប់ស្វាយ ត្រូវបានម្ចាស់សហគ្រាសឲ្យកម្លាំងដឹកយកទៅចាក់ចោលនៅជើងភ្នំវែងដែលគ្មានមនុស្សរស់នៅគឺស្ថិតក្នុងភូមិតាក្រក់។ ដូច្នេះទឹកដែលលាងស្វាយទាំងនោះ ត្រូវបានគេបង្ហូរចូលទៅអាងស្តុក ប៉ុន្តែនៅពេលនេះគឺទឹកអាងស្តុកបានហូរហៀរអាចធ្លាក់ចូលទៅក្នុងអូរ ម្យ៉ាងទៀតកម្មករបានយករថយន្ត ត្រាក់ទ័រ ដែលមានប្រឡាក់មកលាងសំអាត ដោយបង្ហូរទឹកទាំងនោះចូលទៅក្នុងអូរ ទើបបង្កឲ្យទឹកអូរឡើងពណ៌ខ្មៅតែម្ដង។

លោកបានបន្ថែមថា នៅពេលនេះក្រុមការងាររបស់លោកបានធ្វើការណែនាំដល់ម្ចាស់សហគ្រាសទាំងពីរកន្លែងនេះហើយ ដោយមិនអនុញ្ញាតឲ្យមានការបង្ហូរចូលទៅក្នុងអូរបែបនេះតទៅទៀតនោះទេ ព្រោះបើមិនដូច្នេះទេ លោកនឹងមានវិធានការទៅតាមផ្លូវច្បាប់ ឬក៏អាចផ្អាកទីតាំងមិនឲ្យដំណើរការតទៅទៀត ដោយម្ចាស់ទីតាំងទាំងពីរបានទទួលយកសំណើ និងការណែនាំទាំងនេះរួចហើយ៕

អត្ថបទ ៖ សោ និយមរ័ត្ន