ក្រុមហ៊ុនទូរស័ព្ទចល័ត អ៊ុយក្រែន បញ្ចេញថវិកា ៩០ លានដុល្លារដោះស្រាយ​បញ្ហាពីការវាយប្រហាររបស់ រុស្ស៊ី

ប្រតិបត្តិករសេវាទូរស័ព្ទចល័តឈានមុខគេរបស់អ៊ុយក្រែន Kyivstar បានត្រៀមថវិកាចំនួន ៩០ លានដុល្លារដើម្បីដោះស្រាយបញ្ហាពីការវាយប្រហារតាមអ៊ីនធឺណិតរបស់រុស្ស៊ីលើសេវាកម្មក្រុមហ៊ុននេះកាលពីខែធ្នូ ឆ្នាំ២០២៣ ដែលបានប៉ះពាល់យ៉ាងធ្ងន់ធ្ងរដល់កំណើនរបស់ខ្លួន ។ នេះបើយោងតាមការចេញផ្សាយរបស់សារព័ត៌មាន CNA កាលពីថ្ងៃទី២១ ខែឧសភាកន្លងទៅ ។

កាលពីខែធ្នូរមានការវាយប្រហារតាមអ៊ីនធឺណិតដ៏ធំបំផុតលើហេដ្ឋារចនាសម្ព័ន្ធទូរគមនាគមន៍នៅលើពិភពលោក ហើយក៏បានប៉ះពាល់ដល់ក្រុមហ៊ុន Kyivstar ផងដែរ ដោយបំផ្លាញហេដ្ឋារចនាសម្ព័ន្ធ និងរំខានដល់សញ្ញាទូរស័ព្ទរបស់ប្រជាជនអ៊ុយក្រែនរាប់លាននាក់ ។

បើទោះបីជាគ្មានការអះអាងទទួលខុសត្រូវពីខាងរុស្ស៊ីក៏ដោយ ប៉ុន្តែប្រធានចារកម្មតាមអ៊ីនធឺណិតរបស់អ៊ុយក្រែនបានជឿជាក់ថា ការវាយប្រហារនេះត្រូវបានធ្វើឡើងដោយអង្គភាពស៊ើបការណ៍សម្ងាត់យោធារុស្ស៊ី Sandworm ។

យោងតាមនាយកប្រតិបត្តិក្រុមហ៊ុន Kyivstar លោក Oleksandr Komarov បានប្រាប់ទីភ្នាក់ងារព័ត៌មាន Interfax-Ukraine ថា ក្រុមហ៊ុនបានបែងចែកប្រាក់ ៩០.៧៦ លានដុល្លារដើម្បីដោះស្រាយ បន្ទាប់ពីការវាយប្រហារ ដើម្បីជួសជុលការខូចខាត ក៏ដូចជាការពង្រឹងប្រព័ន្ធ និងការផ្ដល់សំណងដល់អតិថិជន ។

គួរបញ្ជាក់ថា Kyivstar ដែលគ្រប់គ្រងដោយប្រតិបត្តិករទូរគមនាគមន៍ចល័តបានចុះបញ្ជីបុត្រសម្ព័ន្ធនៅទីក្រុង Amsterdam ជាមួយក្រុមហ៊ុន Veon មានអតិថិជនប្រើប្រាស់ទូរស័ព្ទចំនួន ២៤.៣ លាននាក់ និងមានអតិថិជនប្រើប្រាស់អ៊ីនធឺណិតតាមផ្ទះច្រើនជាង ១.១ លាននាក់ ខណៈការវាយប្រហារតាមអ៊ីនធឺណិតដែលសង្ស័យថាជាស្នាដៃរបស់រុស្ស៊ីកាលពីខែធ្នូបានធ្វើឲ្យបាត់ចំណូលប្រចាំឆ្នាំប្រហែលដល់ទៅ ៩៥ លានដុល្លារ ៕

អត្ថបទ៖ ប៊ុន សុភាព