មន្ត្រីបក្សភ្លើងទៀន២រូប ប្រកាសផ្ដាច់ខ្លួន ព្រោះអស់ជំនឿលើថ្នាក់ដឹកនាំ និងបញ្ហាពុករលួយក្នុងជួរបក្ស

មន្ត្រីគណបក្សភ្លឿងទៀន២រូប ប្រកាសផ្ដាច់ខ្លួនចេញពីគណបក្ស ​ព្រោះតែអស់ជំនឿលើថ្នាក់ដឹកនាំបក្សភ្លើងទៀន ក្នុងជួរបក្សមានបញ្ហាពុករលួយ បែកបាក់សាមគ្គី ជាពិសេសព្រោះតែគឺ ទណ្ឌិតក្បត់ជាតិ៣ជំនាន់ សម រង្ស៊ី ប្រឆាំងគម្រោងព្រែកជីកហ្វូណនតេជោ ដែលជាគម្រោងមានប្រយោជន៍សម្រាប់សង្គមសេដ្ឋកិច្ចកម្ពុជា។ នេះបើតាមវីដេអូចំនួន២ ដែលផ្សព្វផ្សាយនៅលើបណ្ដាញតេឡេក្រាមផ្លូវការរបស់សម្ដេចតេជោ ហ៊ុន សែន នារសៀលថ្ងៃទី០៦ ខែមិថុនា នេះ។

បើតាមវីដេអូទី១ ដែលផ្សព្វផ្សាយនោះ គឺមន្ត្រីបក្សភ្លើងទៀនម្នាក់ ឈ្មោះ ភួង ផុន  ជាសមាជិកគណៈកម្មាធិការប្រតិបត្តិគណបក្សភ្លើងទៀនខេត្តកំពង់ស្ពឺ ប្រកាសផ្ដាច់ខ្លួនចេញពីបក្ស ក្រោមហេតុផលលែងជឿលើមេដឹកនាំបក្សប្រឆាំង។ លោក បានស្នើសុំសម្ដេចតេជោ ហ៊ុន សែន ប្រធានគណបក្សប្រជាជនកម្ពុជា ដើម្បីចូលរួមរស់ជីវភាពនយោបាយក្រោមដំបូលបក្ស។

លោក ភួង ផុន ប្រកាសដូច្នេះ «សូមប្រកាសផ្ដាច់ខ្លួនចេញពីគណបក្សប្រឆាំង(បក្សភ្លើងទៀន)  ចាប់ពីពេលនេះតទៅ ដោយអស់ជំនឿជាមួយថ្នាក់ដឹកនាំ ជាពិសេសពេលថ្មីៗនេះ លោក សម រង្ស៊ី បានប្រឆាំងគម្រោងព្រែកជីកហ្វូណន ដែលជាផលប្រយោជន៍របស់ជាតិ ហេតុដូចនេះហើយ បានជាខ្ញុំសូមគោរពស្នើសុំចូលរួមជីវភាពនយោបាយជាមួយគណបក្សប្រជាជនដោយអនុគ្រោះ» ។

ចំណែកឯវីដេអូទី២ លោក ឈឹម សាវី សមាជិកគណៈកម្មាធិការប្រតិបត្តិគណបក្សភ្លើងទៀនខេត្តកំពង់ស្ពឺ ប្រកាសផ្ដាច់ខ្លួនចេញពីបក្ស ក្រោមហេតុផលក្នុងជួរបក្សពុករលួយ បែកបាក់សាមគ្គី និងប្រឆាំងប្រយោជន៍ជាតិ។ មិនខុសពីលោក ភួង ផុន ឡើយ លោក ឈឹម សាវី ក៏ស្នើសុំរួមរស់ជីវភាពនយោបាយជាមួយគណបក្សប្រជាជន។

លោក ឈឹម សាវី ប្រកាសបែបនេះ «ខ្ញុំសូមប្រកាសផ្ដាច់ខ្លួនចេញពីគណបក្សប្រឆាំង(បក្សភ្លើងទៀន) ចាប់ពីពេលនេះតទៅ ដោយខ្ញុំបាទមើលឃើញពីការដឹកនាំរបស់គណបក្សប្រឆាំងពុករលួយ បែកបាក់សាមគ្គី ហើយពេលថ្មីៗនេះ លោក សម រង្ស៉ី បានប្រកាសប្រឆាំងគម្រោងព្រែកជីកហ្វូណនតេជោ ដែលជាការប្រឆាំងផលប្រយោជន៍របស់ជាតិ និងប្រជាពលរដ្ឋយ៉ាងធ្ងន់ធ្ងរ។ ខ្ញុំសូមគោរពស្នើសុំសម្ដេចតេជោ ចូលរួមជីវភាពនយោបាយជាមួយគណបក្សប្រជាជនកម្ពុជា ចាប់ពីពេលនេះតទៅ»។

ជាការកត់សម្គាល់ មួយរយៈចុងក្រោយក្រុមសមាជិកបក្សភ្លើងទៀន ប្រកាសផ្ដាច់ខ្លួនជាច្រើនរាប់ភ្លេច នៅក្រោមហេតុផលក្នុងជួរបក្សមានបញ្ហាពុករលួយ បែកបាក់សាមគ្គី និងប្រឆាំងប្រយោជន៍ជាតិជាដើម៕