ថៃ ចាត់វិធានការក្តៅ លើជនបរទេសដែលសុំទាន លើដីខ្លួន

តាមការចុះផ្សាយរបស់ Bangkok Post នៅថ្ងៃពុធទី១២ខែមិថុនា, ប្រទេសថៃ បានប្រកាសចាត់វិធានការក្តៅ ដោយចាប់បញ្ជូនជនបរទេសដែលមកសុំទានលើដីខ្លួន ឲ្យវិលត្រឡប់ទៅប្រទេសកំណើតរបស់ពួកគេវិញ។ យ៉ាងណា អ្នកសុំទានជាជនជាតិថៃ នឹងត្រូវចាប់បញ្ជូនទៅមណ្ឌលអប់រំនិងបណ្តុះបណ្តាលរបស់ក្រសួងអភិវឌ្ឍសង្គម និងសន្តិសុខមនុស្ស ដើម្បីឲ្យពួកគេចេះចំណេះជំនាញ អាចរកការងារធ្វើបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វិធានការនេះ ត្រូវបានប្រកាសដោយលោករដ្ឋមន្ត្រី Varawut Silpa-archa ជាមួយគោលបំណងកាត់បន្ថយចំនួនអ្នកសុំទាននៅតាមដងផ្លូវ ដែលបង្កភាពអាណាធិបតេយ្យ។

ស្របពេលជាមួយគ្នានោះដែរ លោកអំពាវនាវឲ្យប្រជាពលរដ្ឋគ្រប់រូប ឈប់ឲ្យលុយអ្នកសុំទាន ព្រោះថាការធ្វើបែបនេះហាក់បីដូចជាជួយលើកទឹកចិត្តដល់ពួកគេ ហើយនាំឲ្យចំនួនអ្នកសុំទានកាន់តែកើនឡើងថែមទៀតផង។

ពាក់ព័ន្ធបញ្ហានេះដែរ លោកថា ក្រសួងរបស់លោកនឹងធ្វើការជាមួយប៉ូលិស រដ្ឋបាលក្រុងបាងកក និងស្ថាប័នពាក់ព័ន្ធនានា ដើម្បីទប់ស្កាត់ការសុំទាននៅតាមដងផ្លូវ ពោលគឺមួយខែចេញយុទ្ធនាការបោសសម្អាត៥ដង។

តាមច្បាប់គ្រប់គ្រងអ្នកសុំទាន BE 2559 ឆ្នាំ២០១៦ចែងថា អ្នកសុំទាន អាចត្រូវដាក់ទណ្ឌកម្មជាប់ពន្ធនាគាររហូតដល់មួយខែ និង/ឬពិន័យជាប្រាក់រហូតដល់ ១០ ០០០បាត (២៧២ដុល្លារ)។

ទោះបីជាយ៉ាងណាក៏ដោយ មានអ្នកសុំទានខ្លះធ្លាប់ទទួលការពិន័យប៉ុន្តែនៅតែចេញមកសុំទានតាមដងផ្លូវដដែល ព្រោះថា ពួកគេអាចរកចំណូលបានលើសការពិន័យទៅទៀត ពោលអ្នកខ្លះ មួយខែ អាចរកបានដល់ទៅ ១០០ ០០០បាត (២ ៧២០ដុល្លារ) ឯណោះ។

តាមការបញ្ជាក់ពីក្រសួង ក្នុងរយៈពេល១០ឆ្នាំចុងក្រោយនេះ ថៃ ចាប់បានអ្នកសុំទានប្រហែល ៧ ០០០នាក់ ខណៈ ៣០%ក្នុងនោះ គឺជនបរទេស៕

អត្ថបទ៖ សុខ សុវណ្ណ

ចុចអាន៖ បុរសឥណ្ឌា ដើរសុំទាន រហូតក្លាយជាមហាសេដ្ឋី មានទ្រពសម្បត្តិជិត ១លានដុល្លារ