Update៖ ករណីអគ្គិភ័យឆេះឃ្លាំងនៅខណ្ឌព្រែកព្នៅខូចខាតអស់មួយខ្នង និងសម្ភារៈមួយចំនួន

អគ្គិភ័យដែលឆេះឃ្លាំងស្កុកសម្ភារៈមួយកន្លែងនៅខណ្ឌព្រែកព្នៅ កាលពីព្រឹកថ្ងៃទី១៤មិថុនានេះ ត្រូវបានកម្លាំងសមត្ថកិច្ចជួយអន្តរាគមន៍ តែត្រូវខូចខាតទាំងស្រុង និងសម្ភារៈមួយចំនួន ខណៈដែលសមត្ថកិច្ចថា បណ្ដាលមកពីឆ្លងចរន្តអគ្គិសនី។

បើតាមសមត្ថកិច្ច ឃ្លាំងដែលត្រូវអគ្គិភ័យឆាបឆេះជាឃ្លាំងស្តុកសម្ភារៈ ស្លាក ផ្ទាំងប៉ាណូ សង់ពីគ្រោងដែក ប្រក់ស័ង្កសី ទំហំ១២ម៉ែត្រ គុណ ៣០ម៉ែត្រ មានម្ចាស់ឈ្មោះ ជា សុគន្ធ ភេទប្រុស អាយុ៤៥ឆ្នាំ និងអ្នកគ្រប់គ្រងឈ្មោះ សាម ភក្តី ។

តាមសមត្ថកិច្ចបានឱ្យដឹងថា ទីតាំងឃ្លាំងនេះជារបស់ក្រុមហ៊ុនដំឡើងស្លាកហុីហោ ផ្ទាំងប៉ាណូ ផ្សាយពាណិជ្ជកម្ម និងមាន៣ខ្នង ហើយមុនកើតហេតុ ខណៈដែលឃ្លាំងខាងក្រោយបិទទ្វារ ម្ចាស់រៀបចេញទៅខេត្ត ហើយក្រុមជាងក៏កំពុងធ្វើការងារនៅឃ្លាំងខាងមុខ ស្រាប់ឆ្លងចរន្ដចេញពីបន្ទប់សម្រាក ឆេះខ្សែរាលចូលដល់ក្នុងឃ្លាំងស្តុក ផ្នែកខាងក្រោយ ដែលមានគ្រឿងឈើ ក្តាកុងប្លាកេផង ភ្លើងឆេះកាន់តែខ្លាំងឡើង បង្កឱ្យផ្អើលឆោឡោ ដល់កម្លាំងអាជ្ញាធរសមត្ថកិច្ច រថយន្តពន្លត់អគ្គិភ័យ របស់ស្នងការក្រុងភ្នំពេញ និងរថយន្តការិយាល័យ បង្ការនិងពន្លត់អគ្គិភ័យចំនួន១១គ្រឿងចេញទៅជាបន្តបន្ទាប់ ទើបគ្រប់គ្រងស្ថានការណ៍បាន។

សូមបញ្ជាក់ថា ករណីអគ្គិភ័យនេះបានកើតឡើងកាលពីវេលាម៉ោង១០និង១៥នាទី ថ្ងៃទី១៤មិថុនា ក្នុងភូមិបែកបក សង្កាត់គោករកា ខណ្ឌព្រែកព្នៅ រាជធានីភ្នំពេញ។ ករណីនេះដែរបានបណ្ដាលឲ្យឆេះខូចខាតម៉ូតូចំនួន២គ្រឿង និងសម្ភារៈមួយចំនួន តែមិនបណ្ដាលឲ្យមានគ្រោះថ្នាក់ដល់មនុស្សឡើយ៕

អត្ថបទ៖ សុខា