សម្ដេចធិបតី ប្រកាសឱ្យនាំចូលរថយន្តដោយមិនកំណត់ឆ្នាំ តែត្រូវពង្រឹងការពិនិត្យបច្ចេកទេស

ប្រមុខរាជរដ្ឋាភិបាល សម្ដេចធិបតី ហ៊ុន ម៉ាណែត បានប្រកាសអនុញ្ញាតឱ្យនាំចូលរថយន្តពីបរទេសដោយមិនកំណត់ឆ្នាំ តែត្រូវពង្រឹងការត្រួតពិនិត្យលើប្រព័ន្ធបច្ចេកទេសរថយន្តឱ្យបានត្រឹមត្រូវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកាសរបស់សម្ដេចធិបតីបែបនេះ ក្រោយមានការស្នើសុំលើការកំណត់ឆ្នាំនៃការនាំចូលរថយន្តពីបរទេស។ បើតាមការថ្លែងឱ្យដឹងរបស់សម្ដេចធិបតី ដំបូងឡើយក្រុមការងារអន្តរក្រសួង គ្រោងស្នើឱ្យកំណត់ឆ្នាំ ដោយហាមមិនឱ្យនាំចូល រថយន្តចាស់ចូលមកកម្ពុជាមិនឱ្យលើសអាយុ១០ឆ្នាំ ដើម្បីធានាដល់បរិស្ថាន ក៏ដូចជាបញ្ចៀសការនាំរថយន្តចាស់ៗចូល មកប្រើប្រាស់នៅក្នុងប្រទេសកម្ពុជា។ ប៉ុន្តែសំណើរនេះ ត្រូវបានសម្ដេចធិបតី ហ៊ុន ម៉ាណែត បដិសេធ។

ថ្លែងក្នុងពិធីបើកការដ្ឋានសាងសង់ស្ពានអាកាសភ្លោះ ស្ថិតនៅចំណុច​ប្រសព្វមហាវិថីសម្តេចតេជោ ហ៊ុន សែន និងផ្លូវជាតិលេខ២ ព្រំប្រទល់រវាង​រាជធានី​ភ្នំពេញ និងខេត្តកណ្តាល នាព្រឹកថ្ងៃទី១៧ ខែមិថុនា ឆ្នាំ២០២៤នេះ សម្ដេចធិបតី ហ៊ុន ម៉ាណែត ប្រកាសដូច្នេះថា «ខ្ញុំយល់ពីការថែទាំបរិស្ថាន យើងមិនចង់ឱ្យយករថយន្តចាស់ពិបាក ខុសបច្ចេកទេស អាចគ្រោះថ្នាក់ កាត់អីផ្សេងៗ អ៊ីចឹងខ្ញុំថា មិនបាច់ដាក់កំណត់ឆ្នាំទេ ប៉ុន្តែពង្រឹងការត្រួតពិនិត្យបច្ចេកទេសរថយន្តឱ្យបានច្បាស់ នេះទើបត្រឹមត្រូវ…គឺគ្មានកំណត់ទេ»។

សម្ដេចធិបតី បញ្ជាក់ថា រាជរដ្ឋាភិបាលលើកទឹកចិត្តដល់រោងចក្រផលិតរថយន្តនៅក្នុងស្រុក ហើយក៏ជំរុញឱ្យមានការប្រកួតប្រជែងក្នុងការនាំចូលរថយន្តមួយទឹកពីបរទេសចូលមកប្រើប្រាស់នៅក្នុងប្រទេសផងដែរ ជាពិសេសការធានាតម្លៃសមរម្យ ដើម្បីអនុញ្ញាតឱ្យប្រជាពលរដ្ឋអាចទិញរថយន្តទាំងនោះមកប្រើប្រាស់បាន៕