ជីវិតកម្សាន្ដ

មហាជនកូរ៉េ ប្រតិកម្មនឹង CEO ផលិតកម្មមួយ ដែលវាយដំសមាជិកក្រោមទ្រនំ

បានផុស

២ years មុន

នៅ

ថ្ងៃពុធ ១៩ មិថុនា ២០២៤

ដោយ

សមាជិកក្រុមតារាចម្រៀងបច្ចុប្បន្នម្នាក់បានរាយការណ៍ទៅប៉ូលិសថា ពួកគេត្រូវបានអ្នកតំណាងភ្នាក់ងាររបស់ពួកគេរំលោភសិទ្ធមនុស្សដោយជំរុញឲ្យមានការស៊ើបអង្កេត។ ស្របពេលដែលស្ថានីយ៍ប៉ូលិស Seoul Gangnam បានទទួលរបាយការណ៍មួយនៅម៉ោងប្រហែល ៤:៣០ នាទីព្រឹក ថ្ងៃទី ១១ ខែមិថុនា ដោយនិយាយថា តំណាងភ្នាក់ងារកំពុងវាយដំសមាជិក។

ប៉ូលិសបានទៅកាន់អន្តេវាសិកដ្ឋានរបស់ក្រុម idol ហើយកំពុងធ្វើការស៊ើបអង្កេតលើតំណាងភ្នាក់ងារ ដោយចោទប្រកាន់ពីបទរំលោភសិទ្ធរបស់សមាជិកក្រុម ដោយវត្ថុមុតស្រួចប្រវែងប្រហែល ៩០ សង់ទីម៉ែត្រ (៣៥.៤ អ៊ីញ) ។

ក្នុងនោះមានសេចក្តីរាយការណ៍ថា តំណាងភ្នាក់ងារបានវាយដំសមាជិកព្រោះតែពួកគេបានធ្វើឲ្យអន្តេវាសិកដ្ឋានកខ្វក់ ហើយក្នុងចំណោមសមាជិកដែលរងការវាយដំនោះក៏មានអនីតិជនផងដែរ។ គេក៏រាយការណ៍ដែរថា តំណាងរូបនោះស្រវឹងស្រា នៅអំឡុងពេលប្រើហិង្សាលើក្មេង។

ប៉ូលិសក៏បានកក់តំណាងភ្នាក់ងារដោយចោទប្រកាន់ពីបទបង្ករបួសស្នាមពិសេស និងកំពុងស៊ើបអង្កេតពីកាលៈទេសៈលម្អិតនៃឧបទ្ទវហេតុនេះ។ នាពេលនេះអ្នកលេងអ៊ីនធឺណិតកូរ៉េជាច្រើនបានសម្រុកបញ្ចេញមតិទាំងកំហឹង ខណៈដែលពួកគេបានដឹងថា ទីភ្នាក់ងារនោះប្រើអំពើរឃោឃៅលើសមាជិកក្រុមច្រៀងក្រោមទ្រនំរបស់ខ្លួន។

មហាជនបានបញ្ចេញមតិផ្សេងៗគ្នាថា តើភ្នាក់ងារនោះឆ្កួតមែនទេ? ហេតុអ្វីបានជាគាត់វាយមនុស្ស?, ទោះម៉េចក៏ដោយ ពួកយើងសង្ឃឹមថា គ្រប់គ្នានឹងមានសុវត្ថិភាព, ក្នុងនាមជានាយកប្រតិបត្តិមួយរូប គួរតែផ្ដល់គំរូដល់ក្មេង ប៉ុន្តែបែរជាប្រើហឹង្សាលើពួកគេទៅវិញ។

លើសពីនេះទៀតដែរ មហាជនក្នុងប្រទេសកូរ៉េខាងត្បូងជាច្រើនបានបញ្ចាក់ថា សូមឲ្យបើកបង្ហាញស្លាកសញ្ញានោះជាសាធារណៈ ដើម្បីឲ្យពួកគេបានដឹងថាជាភ្នាក់ងារមួយណា។ ជាពិសេសរឿងនេះប៉ះពាល់ដល់អារម្មណ៍ឪពុកម្ដាយ ដែលខំទុកចិត្តឲ្យកូនៗទៅមើលថែ បែរជាវាយដំក្មេងដូចសត្វធាតុទោវិញ។

ទោះបីជាយ៉ាងណាក៏ដោយ មកដល់ពេលនេះមិនទាន់មានសញ្ញាណាមួយបញ្ចាក់ថា តើទីភ្នាក់ងារនោះឈ្មោះអ្វីនោះទេ ខណៈដែលនេះវាគ្រាន់តែជាពាក្យចចាមអារ៉ាមថាមានសមាជិកម្នាក់មកប្ដឹងប៉ូលិស។ ទស្សនិកជនមានតែរង់ចាំចំណាត់ការពីប៉ូលិសថា តើស្លាកសញ្ញាមួយណាហ៊ានប្រើហឹង្សាលើក្មេងដោយគ្មាញញើតបែបនេះ៕

អត្ថបទ៖ សាង ស្រីល័ក្ខ

ចុចអាន៖Rosé សម្រេចចុះហត្ថលេខាផ្លូវការ ជាមួយ The Black Label