ជីវិតកម្សាន្ដ

តាចេក អះអាងថា ជីវិតពិតពេលនេះជួបការលំបាកខ្លាំង មិនមែនសម្ដែងទេ

បានផុស

២ years មុន

នៅ

ថ្ងៃសុក្រ ៥ កក្កដា ២០២៤

ដោយ

ក្រោយធ្លាយដំណឹងយ៉ាងភ្ញាក់ផ្អើលធ្លាក់ខ្លួនដើរសំលៀងកាំបិតតាមផ្ទះ តារាកំប្លែងលោក ឈុំ ប៊ុនឈឿន ហៅ នាយចេក បានចេញមកអះអាងប្រាប់អ្នកគាំទ្រថា បច្ចុប្បន្នជីវិតរបស់លោកកំពុងមានការខ្វះខាត និងជួបការលំបាកខ្លាំង ពោល ពុំមែនសម្ដែងទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចេញមុខបញ្ជាក់ពីសំណាក់តារាកំប្លែងវ័យ ៧០ ឆ្នាំ លោកតា ចេក ពេលនេះ បន្ទាប់ពីមានការចែករំលែកជុំវិញការធ្លាក់ខ្លួនសំលៀងកាំបិត ខណៈមានមតិមួយចំនួនបានលើកឡើងថា លោកតា ចេក សម្តែងដើម្បីយកការចាប់អារម្មណ៍ឲ្យមហាជនអាណិត។ រីឯខ្លះទៀត ក៏បង្ហាញពីការអាណិតអាសូរចំពោះតាចេកផងដែរ។

តារាកំប្លែង តាចេក រៀបរាប់ឲ្យដឹងថា «ខ្ញុំបាទ តាចេក សូមថ្លែងអំណរអគុណដល់បងប្អូនកូនក្មួយដែលមានចិត្តសប្បុរសធម៌បានជួយដល់ខ្ញុំបាទតាមរយៈ ABA និងតាមលេខទូរស័ព្ទ បងប្អូនខ្លះក៏បានអញ្ជើញមកសួរសុខទុក្ខដល់ផ្ទះ ក៏គាត់បានដឹងថា ជីវិតពិតរបស់ខ្ញុំក្នុងពេលនេះជួបការលំបាកយ៉ាងណាហើយពីជីវិតពិត មិនមែនសម្ដែងដូចមតិដែលបាននិយាយទេ»។

លោកតាចេក បានបញ្ជាក់ថា លោកក៏សូមអគុណលើកម្រាមដៃទាំងដប់ សូមជូនពរដល់សប្បុរសធម៌ និងក្មួយៗ ជួបប្រទះសេចក្ដីសុខចម្រុងចម្រើន ជួបសំណាងល្អ ទេវតាតាមឃុំគ្រងមានអាយុយឺនយូរគ្រប់ក្រុមគ្រួសារ។

គួរបញ្ជាក់ថា កាលពីថ្មីៗ នេះ មានការបង្ហោះភ្ជាប់វីដេអូ បានរៀបរាប់ថា «សូមជួយស៊ែរឲ្យបានដល់ថ្នាក់ដឹកនាំផង ដែលជាម្លប់ដល់កូនចៅ ខ្ញុំបានជួបលោកអ៊ំ កាលពី ៣ ឆ្នាំមុន លោកអ៊ំលក់ផ្លែឈើនៅភ្នំគិរីរម្យ! ហ៊ឹម… ឥឡូវគាត់ដើរសំលៀងកាំបិតតាមផ្ទះគេ គួរតែបងៗ ខាងសិល្បៈគិតគូរគាត់ផង គាត់ក៏ជាសិល្បៈជើងចាស់មួយរូបដែរ ទឹកមុខបង្ហាញពីទុក្ខ សូមជួយគាត់ផង គាត់អាយុច្រើនហើយ ពេលវេលានៅមានតិចណាស់»។

ជាការកត់សម្គាល់ តារាកំប្លែងជើងចាស់ លោកតា ចេក បច្ចុប្បន្នត្រូវបានទស្សនិកជនដឹងហើយថា នាយជាតារាកំប្លែងជើងចាស់មួយរូបដែលមានប្រវត្តិតស៊ូ និងជួបការលំបាកជាច្រើនសម្រាប់ជីវភាពគ្រួសារប្រចាំថ្ងៃ ពោលខុសប្លែកពីតារារួមជំនាន់ដទៃទៀតមានជីវភាពធូរធារ៕

អត្ថបទ ៖ ចាន់រ៉ា