កាហ្វេ​ការពារ​ជំងឺ​គ្រប់​ប្រភេទ តើ​គួរ​ផឹក​ប៉ុន្មាន​ក្នុង​មួយថ្ងៃ?

កាហ្វេគឺជាកម្លាំងប្រចាំថ្ងៃដែលមិនអាចខ្វះបានរបស់មនុស្សរាប់លាននាក់ជុំវិញពិភពលោក។ វាមិនត្រឹមតែជាប្រភពថាមពលដ៏អស្ចារ្យប៉ុណ្ណោះទេ ប៉ុន្តែថែមទាំងផ្តល់នូវអត្ថប្រយោជន៍សុខភាពជាច្រើន ដែលបញ្ជាក់ដោយការស្រាវជ្រាវវិទ្យាសាស្ត្រ។

អត្ថប្រយោជន៍សុខភាពនៃការផឹកកាហ្វេ

យោងទៅតាម Hopkins Medicine ប្រសិនបើអ្នកផឹកកាហ្វេក្នុងបរិមាណមធ្យម អ្នកអាចទទួលបានអត្ថប្រយោជន៍ដូចខាងក្រោម៖

រស់នៅបានយូរ​ ការសិក្សាថ្មីៗបានរកឃើញថា អ្នកដែលផឹកកាហ្វេជាប្រចាំ មានហានិភ័យទាបនៃការស្លាប់ដោយសារជំងឺសរសៃឈាមបេះដូង ជំងឺដាច់សរសៃឈាមខួរក្បាល ជំងឺទឹកនោមផ្អែម និងជំងឺតម្រងនោមជាងអ្នកមិនផឹកកាហ្វេ។

កាត់បន្ថយហានិភ័យនៃជំងឺទឹកនោមផ្អែមប្រភេទទី ២ ការសិក្សាជាច្រើនបានរកឃើញថា អ្នកដែលផឹកកាហ្វេជាប្រចាំ មានហានិភ័យនៃជំងឺទឹកនោមផ្អែមប្រភេទទី២ ទាបជាងអ្នកដែលមិនផឹកកាហ្វេ។ មូលហេតុគឺដោយសារតែជាតិកាហ្វេអ៊ីន (សារធាតុសកម្មសំខាន់នៅក្នុងកាហ្វេ) អាចកាត់បន្ថយភាពប្រែប្រួលអាំងស៊ុយលីន។ នេះមានន័យថាកោសិកានឹងមិនស្រូបយកជាតិស្ករច្រើនពីឈាម បន្ទាប់ពីយើងញ៉ាំ / ផឹក។

ការពារជំងឺខ្សោយបេះដូង ការ​ផឹក​កាហ្វេ​ជា​រៀង​រាល់​ថ្ងៃ​ក៏​អាច​ការពារ​ជំងឺ​ខ្សោយ​បេះដូង​បាន​ដែរ។ នេះគឺជាស្ថានភាពដែលកើតឡើងនៅពេលដែលមុខងារបូមរបស់បេះដូងចុះខ្សោយ។

ការពារជំងឺផាកឃីនសុន ជាតិកាហ្វេអ៊ីនមិនត្រឹមតែជួយកាត់បន្ថយហានិភ័យនៃជំងឺផាកឃីនសុនប៉ុណ្ណោះទេ ថែមទាំងអាចជួយអ្នកដែលមានជំងឺនេះគ្រប់គ្រងសកម្មភាពរបស់ពួកគេបានប្រសើរជាងមុន។

ការពារថ្លើម ទាំងកាហ្វេធម្មតា និងគ្មានជាតិកាហ្វេអ៊ីន មានឥទ្ធិពលការពារថ្លើម។ ការស្រាវជ្រាវបង្ហាញថា អ្នកដែលផឹកកាហ្វេជាប្រចាំ មានកម្រិតអង់ស៊ីមថ្លើមដែលមានសុខភាពល្អជាងអ្នកដែលមិនផឹកកាហ្វេ។ អង់ស៊ីមថ្លើមជួយឲ្យថ្លើមសំយោគ និងបំប្លែងសារធាតុចិញ្ចឹមដូចជា lipid កាបូអ៊ីដ្រាត ប្រូតេអ៊ីន។

ការការពារជំងឺមហារីក​ កាហ្វេអាចកាត់បន្ថយការបំបែកនៃ DNA នៅក្នុងកោសិកា។ ប្រសិនបើកោសិកាមិនអាចជួសជុលខ្លួនឯងបានទេ នេះអាចនាំទៅដល់ការបង្កើតដុំសាច់ និងមហារីក។ ការសិក្សាមួយចំនួនបង្ហាញថា ការផឹកកាហ្វេជាប្រចាំអាចកាត់បន្ថយហានិភ័យនៃជំងឺមហារីកថ្លើម និងមហារីកពោះវៀនធំ។

ពង្រឹងមុខងារខួរក្បាល ជាតិកាហ្វេអ៊ីនបង្កើនសារធាតុ serotonin និង acetylcholine រំញោច និងជួយរក្សាលំនឹងរបាំងឈាម-ខួរក្បាល។ របាំងឈាម-ខួរក្បាល គឺជាស្រទាប់កោសិកាដែលគ្របដណ្ដប់លើសរសៃឈាមក្នុងខួរក្បាល ដែលគ្រប់គ្រងការបញ្ចូលម៉ូលេគុលពីឈាមទៅក្នុងខួរក្បាល។

លើសពីនេះ សារធាតុ polyphenols នៅក្នុងកាហ្វេក៏អាចការពារការខូចខាតជាលិកាដែលបណ្តាលមកពីរ៉ាឌីកាល់សេរី និងការពារការស្ទះសរសៃឈាមខួរក្បាល។

ការផឹកកាហ្វេជាទៀងទាត់ក៏ជួយកាត់បន្ថយហានិភ័យនៃជំងឺភ្លេចភ្លាំង (ជំងឺបាត់បង់ការចងចាំ), កាត់បន្ថយហានិភ័យនៃជំងឺដាច់សរសៃឈាមខួរក្បាល, អ្នក​ដែល​មាន​ទម្លាប់​ផឹក​កាហ្វេ​ជា​រៀង​រាល់​ថ្ងៃ មាន​ហានិភ័យ​ជំងឺ​ដាច់​សរសៃ​ឈាម​ខួរក្បាល​ទាប​ជាង​អ្នក​ដែល​មិន​មាន​ទម្លាប់​នេះ។

តើអ្នកគួរផឹកកាហ្វេប៉ុន្មានក្នុងមួយថ្ងៃ?

រដ្ឋបាលចំណីអាហារ និងឱសថអាមេរិកបានណែនាំថា សម្រាប់មនុស្សដែលមានសុខភាពល្អ បរិមាណជាតិកាហ្វេអ៊ីនអតិបរមាដែលអាចប្រើប្រាស់ប្រចាំថ្ងៃគឺ ៤០០mg (ស្មើនឹងកាហ្វេប្រហែល ៤ ពែង)។

ប្រសិនបើអ្នកទទួលទានលើសពីកម្រិតនៃជាតិកាហ្វេអ៊ីនខាងលើ អ្នកអាចជួបប្រទះនូវផលរំខានដូចជា គេងមិនលក់ ថប់បារម្ភ ពិបាកគេង ប្រកាច់ រាគ និងចង្វាក់បេះដូងលោតញាប់។ ចំពោះស្ត្រីមានផ្ទៃពោះ ឬបំបៅដោះកូន បរិមាណជាតិកាហ្វេអ៊ីនដែលទទួលទានក្នុងមួយថ្ងៃមិនគួរលើសពី ២០០mg។ ជាពិសេស ដើម្បីទទួលបានអត្ថប្រយោជន៍សុខភាពពីការផឹកកាហ្វេ បន្ថែមពីលើការផឹកក្នុងកម្រិតត្រឹមត្រូវ មនុស្សត្រូវគ្រប់គ្រងបរិមាណជាតិផ្អែមដែលពួកគេបន្ថែមទៅក្នុងពែងកាហ្វេនីមួយៗ។ ការបំពានជាតិផ្អែមមិនត្រឹមតែបាត់បង់ឥទ្ធិពលដ៏មានតម្លៃនៃកាហ្វេប៉ុណ្ណោះទេ ប៉ុន្តែថែមទាំងធ្វើ ឲ្យអ្នកត្រូវអញ្ជើញជំងឺជាច្រើនចូលទៅក្នុងខ្លួនថែមទៀតផង៕

អត្ថបទ៖ សាង ស្រីល័ក្ខ

ចុចអាន៖អាហារ ៤ ប្រភេទ ជួយស្តារសរសៃឈាមឲ្យមានសុខភាពល្អ មិនបាច់ប្រើថ្នាំ