ព័ត៌មានជាតិ

ឯកឧត្ដម ហ៊ុន ម៉ានី ៖ ផ្លែផ្កា និងការពិតដែលកើតចេញពីទំនាក់ទំនងកម្ពុជា-ចិន ៦៦ ឆ្នាំ បានផ្តល់ផលប្រយោជន៍ជាក់ស្ដែងដល់ពលរដ្ឋកម្ពុជា

បានផុស

១ year មុន

នៅ

ថ្ងៃអង្គារ ១៦ កក្កដា ២០២៤

ដោយ

ឯកឧត្ដម ហ៊ុន ម៉ានី សង្កត់ធ្ងន់ថា ផ្លែផ្កា និងការពិតដែលកើតចេញពីទំនាក់ទំនងរវាងប្រទេសកម្ពុជា-ចិន រយៈពេល ៦៦ ឆ្នាំ បានផ្តល់ផលប្រយោជន៍ជាក់ស្ដែងដល់ប្រជាពលរដ្ឋកម្ពុជា តាមរយៈហេដ្ឋារចនាសម្ព័ន្ធជាច្រើនកើតឡើងជាបន្តបន្ទាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការសង្កត់ធ្ងន់នេះ ក្នុងឱកាស ឯកឧត្ដម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ តំណាងដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និង លោក ឆាង ជាន អគ្គទីប្រឹក្សាស្ថានទូតចិន បានអញ្ជើញជាអធិបតីភាព ក្នុងពិធីសម្ពោធដាក់ឲ្យប្រើប្រាស់ជាផ្លូវការ អគារសិក្សា ២ ខ្នង នៃសាលារៀន ខ្មែរ-ចិន ហួ ខៀវ ខេត្តកំពង់ស្ពឺ កាលពីព្រឹកថ្ងៃទី ១៦ ខែកក្កដា ឆ្នាំ ២០២៤។

នាឱកាសនោះ ឯកឧត្ដម ហ៊ុន ម៉ានី បានពាំនាំនូវសេចក្ដីនឹករលឹក និងការផ្ដាំផ្ញើសាកសួរសុខទុក្ខពីសំណាក់ សម្តេចធិបតី នាយករដ្ឋមន្ត្រី ជូនចំពោះប្រជាពលរដ្ឋ និងសិស្សានុសិស្ស ដែលបានមកចូលរួមក្នុងពិធីសម្ពោធនេះ។

ទន្ទឹមនោះ ឯកឧត្ដម ហ៊ុន ម៉ានី បានចូលរួមអបអរសាទរជាមួយប្រជាពលរដ្ឋខេត្តកំពង់ស្ពឺ ជាពិសេសអ្នកសង្កាត់ស្វាយក្រវ៉ាន់ នូវសមិទ្ធផលថ្មី ដែលនឹងចូលរួមបម្រើដល់វិស័យអប់រំ លើជំនាញភាសាចិន ដល់ កុមារ និងយុវជន នៅក្នុងខេត្ត។

ជាមួយគ្នានេះ ឯកឧត្ដម ហ៊ុន ម៉ានី បានរំលេចនូវទំនាក់ទំនងល្អរវាងព្រះរាជាណាចក្រកម្ពុជា និងសាធារណរដ្ឋប្រជាមានិតចិន ដែលមានលក្ខណៈយូរលង់ណាស់មកហើយ។

ឯកឧត្ដម ហ៊ុន ម៉ានី ក៏បានសង្កត់ធ្ងន់ថា «ផ្លែផ្កា និងការពិតដែលកើតចេញពីទំនាក់ទំនង ៦៦ ឆ្នាំ បានផ្តល់ផលប្រយោជន៍ជាក់ស្ដែងដល់ប្រជាពលរដ្ឋកម្ពុជា តាមរយៈហេដ្ឋារចនាសម្ព័ន្ធជាច្រើនដែលបានកើតឡើងជាបន្តបន្ទាប់»។

ពិធីសម្ពោធនេះដែរ លោក ជាម ចន្ទសោភ័ណ អភិបាល នៃគណៈអភិបាលខេត្តកំពង់ស្ពឺ ក៏បានមានប្រសាសន៍ដែរថា សមិទ្ធផលនៅក្នុងសាលាចិន ហួ ខៀវ កើតចេញពីការសាមគ្គីរួបរួមរបស់សប្បុរសជនក្នុង និងក្រៅខេត្ត តាមរយៈសមាគមខ្មែរ-ចិន សាខាខេត្តកំពង់ស្ពឺ។

ក្នុងនាមស្ថានទូតចិន លោក ឆាង ជាន បានលើកឡើងអំពីកិច្ចសហប្រតិបត្តិការល្អរវាងរដ្ឋាភិបាល នៃប្រទេសទាំង ២ កម្ពុជា-ចិន ដែលកំពុងឈានទៅរកទំនាក់ទំនងមិត្តភាពត្បូងពេជ្រ កាន់តែស៊ីជម្រៅជាងមុន។

ដោយឡែក តាមរយៈការជំរុញពីរដ្ឋាភិបាល នៃប្រទេសទាំង ២ ជាពិសេសការចូលរួមចំណែកពីសមាគមខ្មែរ-ចិន ធនធានមនុស្សក្នុងវិស័យអប់រំភាសាចិន កំពុងមានការរីកលូតលាស់គួរជាទីកត់សម្គាល់ ដែលកំពុងក្លាយជាកម្លាំងចលករសេដ្ឋកិច្ចដ៏សំខាន់មួយ។

គួរជម្រាបថា ពិធីសម្ពោធខាងលើនេះ ក៏មានការអញ្ជើញចូលរួមពីសំណាក់ ឯកឧត្ដម លោកជំទាវ សមាជិក-សមាជិកាព្រឹទ្ធសភា រដ្ឋសភា ក្រុមការងាររាជរដ្ឋាភិបាល ឯកឧត្ដមប្រធានក្រុមប្រឹក្សាខេត្ត អភិបាល នៃគណៈអភិបាលខេត្ត មន្ត្រីរាជការ មន្ទីរ-អង្គភាពជុំវិញខេត្ត លោកគ្រូ អ្នកគ្រូ សិស្សានុសិស្ស ប្រជាពលរដ្ឋ ព្រមទាំងសប្បុរសជនខ្មែរ-ចិន ប្រមាណ ៧០០ នាក់ ផងដែរ៕