វី គីរីរម្យ តំបន់អេកូទេសចរណ៍ គ្រោងបង្កើត Mini Mart ដើម្បីសម្រួលដល់ភ្ញៀវទេសចរ

វី គីរីរម្យ (vKirirom Pine Resort)​ ដែលជាតំបន់អេកូទេសចរណ៍ លាតសន្ធឹងលើផ្ទៃដីជាង ២០០ ហិកតា ស្ថិតនៅឧទ្យានជាតិគីរីរម្យ ក្នុងទឹកដីខេត្តកំពង់ស្ពឺ គ្រោងនឹងបង្កើតមីនីម៉ាត(Mini Mart) ដើម្បីបង្កលក្ខណៈងាយស្រួលដល់ភ្ញៀវទេសចរក្នុងការទិញទំនិញ ជាពិសេសរួមចំណែកដល់បរិស្ថានក្នុងការកាត់បន្ថយប្រើប្រាស់ប្លាស្ទិក។

ជារឿយៗ នៅមាត់ច្រកចូលរមណីយដ្ឋាន វី គីរីរម្យ មានការលក់ដូរជាហូរហែ និងប្រើប្រាស់ថង់ប្លាស្ទិកសម្រាប់ខ្ចប់ចំណីអាហារជាច្រើនយកទៅកំពូលភ្នំនេះ ដោយបន្សល់ទុកនូវសំរាមជាច្រើនពីមួយថ្ងៃទៅមួយថ្ងៃ។ ដើម្បីកាត់បន្ថយបរិមាណសំរាម និងប្លាស្ទិក ក្រុមហ៊ុនគ្រោងនឹងបង្កើតមីនីម៉ាតមួយសម្រាប់សម្រួលដល់ភ្ញៀវទេសចរ។

លោក ឡាយ សារ៉ា ប្រធានផ្នែក ការិយាល័យជួរមុខ​ និងផ្នែកទំនាក់ទំនងអតិថិជននៃរមណីយដ្ឋាន វី គីរីរម្យ បានថ្លែងប្រាប់កម្ពុជាថ្មីថា តាមផែនការក្រុមហ៊ុនមានចក្ខុវិស័យពង្រីកតំបន់ទេសចរណ៍បន្តទៀត ដើម្បីឆ្លើយតបទៅនឹងតម្រូវការជាក់ស្តែង។ ជាពិសេសដើម្បីបង្កលក្ខណៈងាយស្រួលដល់ភ្ញៀវទេសចរជាតិ អន្តរជាតិមកលេងកម្សាន្ត ក្រុមហ៊ុនមានផែនការនឹងបង្កើតមីនីម៉ាត សម្រាប់លក់ទំនិញក្នុងតម្លៃសមរម្យ។ លោកមានប្រសាសន៍ថា៖«ជាទូទៅក្នុងជំហានទី១ ក្នុងគម្រោងគោលដៅចង់បើកជាមីនីម៉ាត លក់ជូនសម្រាប់ភ្ញៀវដែលមកស្នាក់នៅ ឬប្រជាពលរដ្ឋរស់នៅជុំវិញនេះ អាចចូលម៉ាត ដូចផ្សារទំនើបបាន ដោយសារតំបន់នេះនៅឆ្ងាយពីទីក្រុង ដូច្នេះភ្ញៀវទេសចរណ៍គាត់អាចទិញទំនិញនៅទីនេះដោយមិនចាំបាច់ខ្ចប់ចំណីមក »។

លោកបានគូសរំលេចថា គម្រោងបង្កើតម៉ាតនេះ ក៏ដើម្បីកាត់បន្ថយការចោលសំរាម និងប្លាស្ទិក បានមួយចំនួន និងបម្រើទៅដល់ប្រជាពលរដ្ឋនៅក្នុងមូលដ្ឋានដែលមានតម្រូវការប្រើប្រាស់ប្រចាំថ្ងៃ។ យ៉ាងណាមិញ លោកមិនទាន់បង្ហើបប្រាប់ពីកាលបរិច្ឆេទនៃការបើកម៉ាតនេះនៅឡើយទេ។

ក្រឡេកទៅមើលតាមដងផ្លូវទៅកាន់ រមណីយដ្ឋាន វី គីរីរម្យ ដោយសារឆ្ងាយពីទីប្រជុំជន វាជាទិសដៅទេសចរណ៍មួយ ដែលអ្នកនឹងបានឃើញធម្មជាតិស្រស់ស្អាត ហើយនៅពេលដែលឡើងដល់លើកំពូលភ្នំ នឹងទទួលបាននូវអារម្មណ៍ស្រស់ថ្លា ឭសំឡេងសត្វស្លាប និងសំឡេងទឹកធ្លាក់ពីចម្ងាយគួរឱ្យចង់ទៅលេងកម្សាន្ត។ បន្ថែមពីនេះ ភ្ញៀវទេសចរ ក៏អាចប្រាស្រ័យទំនាក់ទំនងសង្គម ឬបំពេញការងារពីចម្ងាយបានយ៉ាងរហ័ស ដោយសារនៅរមណីយដ្ឋាននេះបានបំពាក់នូវប្រព័ន្ធ អ៊ិនធើណិត នៅជុំវិញ។

វី គីរីរម្យ​ បានអភិវឌ្ឍន៍ខ្លួនយ៉ាងយ៉ាប់រហ័ស ដោយដំបូងឡើយមានមិនដល់ ១០ បន្ទប់ស្នាក់នៅផង កាលពីបើកដំណើរក្នុងអំឡុងឆ្នាំ ២០១៣។ ក្រោយទទួលបានការគាំទ្រជាបន្តបន្ទាប់ បច្ចុប្បន្ន រមណីយដ្ឋាននេះមានផ្ទះស្នាក់នៅជាច្រើនប្រភេទជាង ១០០ បន្ទប់ និងមានការបោះតង់ផ្ទាល់ដីជាង ១០០ តង់ ដែលអាចទទួលបានភ្ញៀវរហូតដល់ ៦០០ទៅ ៧០០ នាក់។ បន្ទប់ស្នាក់នៅមានច្រើនប្រភេទ ជាប្រភេទវីឡា លក្ខណៈគ្រួសារ បឹងកាឡូ តង់​ប្រណិត និងប្រភេទស្នាក់នៅផ្សេងៗទៀត។

បើតាមលោក សារ៉ា ភ្ញៀវទេសចរដែលទៅលេងកម្សាន្តនៅទីនោះជាង​៨០ % ភ្ញៀវទេសចរជាតិ និងភ្ញៀវទេសចរបទេសក្នុងស្រុកប្រមាណ ២០ % ។​ លោកបន្ថែមថា ទោះបីបច្ចុប្បន្ននេះ ជារដូវភ្ញៀវតិច (Low Season) ប៉ុន្តែរមណីយដ្ឋានមួយនេះនៅតែមានភ្ញៀវទៅលេងកម្សាន្តមិនដាច់ឡើយ ជាពិសេសនៅចុងសប្តាហ៍តែម្តង។

លោក សារ៉ា ជាបុគ្គលិកបម្រើការងារនៅទីនេះអស់រយៈជាង ៧ឆ្នាំ បានបង្ហាញចំណាប់អារម្មណ៍ថា វត្តមានរមណីយដ្ឋាននេះ រួមចំណែកបង្កើនចំណូលសេដ្ឋកិច្ចមូលដ្ឋាន កាត់បន្ថយអត្រាអត់ការងារធ្វើ ជាពិសេសចូលរួមអភិរក្សបរិស្ថាន និងព្រៃឈើ។ លោកថ្លែងថា៖« ពីមុនប្រជាជនចូលព្រៃតាមរយៈការបរបាញ់សត្វ កាប់ឈើ ឬបោចវល្លិ ដែលធ្វើឱ្យប៉ះពាល់ដល់បរិស្ថាន។ ប៉ុន្តែនៅពេលដែលក្រុមហ៊ុននេះមកវិនិយោគ គឺបានពន្យល់ពលរដ្ឋឱ្យចៀសវាងអំពើកាប់ឈើខុសច្បាប់ ងាកមកធ្វើការជាមួយយើង អាចថែរក្សាបរិស្ថានបានច្រើន»៕

អត្ថបទ៖ ឡាយ សាមាន