អភិបាលរងខេត្ត៣ផ្សេងគ្នា ត្រូវបានប្រកាសផ្ទេរមកកាន់ជាអភិបាលរងខេត្តកំពង់ស្ពឺ

អភិបាលរងខេត្តចំនួន៣ខេត្តផ្សេងគ្នា ត្រូវបានប្រមុខរាជរដ្ឋាភិបាល សម្ដេចធិបតី ហ៊ុន ម៉ាណែត សម្រេចផ្ទេរភារកិច្ចទៅកាន់ជាអភិបាលរងខេត្តកំពង់ស្ពឺវិញ ក្រោមការដឹកនាំរបស់អភិបាលខេត្តកំពង់ស្ពឺថ្មី លោក ជាម ច័ន្ទសោភ័ណ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមអនុក្រឹត្យរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានសម្រេចផ្ទេរភារកិច្ចមន្ត្រីរាជការចំនួន៣រូប គឺមាន៖ ១) លោក តូច ប៉ូលីវ៉ា ឋានន្តរស័ក្តិឧត្តមមន្ត្រី ថ្នាក់លេខ៣ ពីអភិបាលរងខេត្តស្វាយរៀង ទៅឱ្យកាន់ជាអភិបាលរងខេត្តកំពង់ស្ពឺ ២) លោក ជាវ វិជ្ជាក់ ឋានន្តរស័ក្តិឧត្តមមន្ត្រី ថ្នាក់លេខ៣ ពីអភិបាលរងខេត្តព្រះសីហនុ ទៅឱ្យកាន់ជាអភិបាលរងខេត្តកំពង់ស្ពឺ និង៣) លោក សុខ សន្ធី ឋានន្តរស័ក្តិឧត្តមមន្ត្រី ថ្នាក់លេខ៤ ពីអភិបាលរងខេត្តកោះកុង ទៅឱ្យកាន់តំណែងជាអភិបាលរងខេត្តកំពង់ស្ពឺ។

ពិធីប្រកាសចូលកាន់មុខតំណែងអភិបាលរងខេត្តកំពង់ស្ពឺខាងលើនេះ ត្រូវបានរៀបចំឡើងនាព្រឹកថ្ងៃទី២៦ ខែកក្កដា ឆ្នាំ ២០២៤ ក្រោមអធិបតីលោក ប៊ុន ហុន រដ្ឋលេខាធិការក្រសួងមហាផ្ទៃ លោក យឹម សុខុម ប្រធានក្រុមប្រឹក្សាខេត្ត និងលោកបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ៕