ទោះមានអ្នកស្លាប់ច្រើនបំផុតដោយសារកូវីដ តែប្រធានាធិបតីប្រេស៊ីលបែរជានិយាយបែបនេះទៅវិញ

បន្ទាប់ពីការស្លាប់ដោយសារជំងឺកូវីដ ១៩ ជាកំណត់ត្រារយៈពេល ២ ថ្ងៃជាប់គ្នាក្នុងប្រទេសប្រេស៊ីល លោកប្រធានាធិបតី Jair Bolsonaro កាលពីថ្ងៃព្រហស្បតិ៍ ទី៤ ខែមីនា បានប្រាប់ប្រជាជនប្រេស៊ីលឲ្យ ឈប់ “យំរហេមរហាម” នៅក្នុងសុន្ទរកថាចុងក្រោយរបស់លោកដែលនៅតែមិនគោរពវិធានការណ៍រក្សាគម្លាត និងនិយាយមើលងាយពីភាពធ្ងន់ធ្ងរនៃជំងឺរាតត្បាតនេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Bolsonaro បានប្រាប់ហ្វូងមនុស្សនៅក្នុងព្រឹត្តិការណ៍មួយថា “ការរអ៊ូរទាំ និងយំរហេមរហាមគឺគ្រប់គ្រាន់ហើយ ។ តើយើងនឹងយំដល់ពេលណាទៀត? ។ តើអ្នកនឹងស្នាក់នៅផ្ទះ និងបិទអ្វីៗទាំងអស់បានយូរប៉ុណ្ណា? គ្មាននរណាម្នាក់អាចទ្រាំបានទៀតទេ។ យើងសោកស្តាយចំពោះការស្លាប់នេះម្តងទៀត ប៉ុន្តែយើងត្រូវការដំណោះស្រាយ” ។

រលកទី ២ នៃករណីឆ្លងជំងឺកូវីដ ១៩ ដែលកំពុងហក់ឡើងរបស់ប្រទេសប្រេស៊ីលបានបង្កឲ្យមានការរឹតត្បិតថ្មីៗនៅក្នុងរដ្ឋធានី Brasilia និងទីក្រុងធំបំផុតរបស់ខ្លួនគឺ Sao Paulo ខណៈទីក្រុងទេសចរណ៍ Rio de Janeiro កាលពីថ្ងៃព្រហស្បតិ៍បានប្រកាសបំរាមគោចរនៅទូទាំងទីក្រុង និងពេលវេលាបិទភោជនីយដ្ឋានជាដើម ។

ក្រសួងសុខាភិបាលបាននិយាយកាលពីថ្ងៃពុធថា ប្រទេសប្រេស៊ីលមានការស្លាប់ថ្មីដោយសារជំងឺកូវីដ ១៩ ចំនួន ១,៩១០ នាក់ និងឆ្លង ៧១,៧០៤ ករណីក្នុងរយៈពេល ២៤ ម៉ោងចុងក្រោយ ។

គួរបញ្ជាក់ថា ប្រទេសប្រេស៊ីលមានចំនួនអ្នកស្លាប់ដោយសារជំងឺកូវីដ ១៩ ខ្ពស់បំផុតទី ២ លើពិភពលោកក្នុងរយៈពេលមួយឆ្នាំចុងក្រោយនេះ បន្ទាប់ពីសហរដ្ឋអាមេរិកពោលរហូតមកដល់ពេលមានអ្នកស្លាប់សរុបចំនួន ២៦១,១៨៨ នាក់ និងមានអ្នកឆ្លង ១០,៧៩៦,៥០៦ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ ធ្ងន់ធ្ងរបំផុត! មួយថ្ងៃ ប្រេស៊ីល មានអ្នកស្លាប់ដោយសារកូវីដជិត ២ ពាន់នាក់ និងឆ្លងជាង ៧ ម៉ឺនករណី

ចុចអាន ៖ ប្រេស៊ីល មានអ្នកស្លាប់ដោយសារកូវីដលើស ២៥ម៉ឺននាក់