កម្ពុជានឹងចូលរួមពិព័រណ៍ទេសចរណ៍អន្តរជាតិ នៅប្រទេសឥណ្ឌានាដំណាច់ខែនេះ

ក្រសួងទេសចរណ៍កម្ពុជានឹងចូលរួមព្រឹត្តិការណ៍ពិព័រណ៍ទេសចរណ៍អន្តរជាតិ BLTM 2024 នៅទីក្រុងញ៉ូដេលី ប្រទេស​ឥណ្ឌា រយៈពេល ៣ ថ្ងៃ គឺចាប់ពីថ្ងៃទី ២៩-៣១ ខែសីហា ឆ្នាំ២០២៤។

យោងតាមសេចក្ដីប្រកាសរបស់ក្រសួងទេសចរណ៍ ព្រឹត្តិការណ៍នេះ មានអតិថិជនអ្នកទិញចំនួនជាង ៦០០​ក្រុមហ៊ុន អ្នកលក់ចំនួនជាង ៥០០ក្រុមហ៊ុន មកពីជាង២០ ​ប្រទេសលើពិភពលោក និងអ្នកចូលទស្សនាប្រមាណជាង ១ ម៉ឺននាក់។

ក្រសួងទេសចរណ៍បញ្ជាក់ថា៖ «ការចូលរួមក្នុងពិព័រណ៍ទេសចរណ៍នេះ មានគោលបំណងផ្សព្វផ្សាយអំពីសក្តានុពលវិស័យ​ទេសចរណ៍កម្ពុជា ដើម្បីជំរុញ “ឆ្នាំទេសចរណ៍កម្ពុជា-ឥណ្ឌា លើកទី១ ២០២៤” ក៏ដូចជាពង្រឹងកិច្ចសហប្រតិបត្តិការ រវាងកម្ពុជា-ឥណ្ឌា ស្របតាមគំ​និត​ផ្តួចផ្តើមយុទ្ធសាស្ត្រ “បង្កើន៥ អភិវឌ្ឍ៣” របស់ក្រសួងទេសចរណ៍ ព្រមទាំង ចូលរួមជំរុញយុទ្ធនាការ “ឆ្នាំទស្សនាសៀមរាប ២០២៤” សំដៅទាក់ទាញទេសចរ និងវិនិយោគិនឥណ្ឌាមកទស្សនា និងវិនិយោគនៅកម្ពុជាកាន់តែច្រើនថែមទៀត»៕

ក្រសួងទេសចរណ៍ក៏បានអំពាវនាវដល់គ្រប់សមាគមទេសចរណ៍ ប្រតិបត្តិករទេសចរណ៍ និងដៃគូ ពាក់ព័ន្ធឱ្យចូលរួមឱ្យ ដើម្បីចាប់យកឱកាសក្នុងការលក់កញ្ចប់ទស្សនកិច្ចទេសចរណ៍កម្ពុជាទៅកាន់ទីផ្សារឥណ្ឌា និងអន្តរជាតិ៕