ព័ត៌មានអន្ដរជាតិ

អ៊ុយក្រែន ប្រើដ្រូនវាយកម្ទេចឃ្លាំងស្តុកប្រេងនៅទីក្រុង Rostov របស់រុស្ស៊ី

បានផុស

២ years មុន

នៅ

ថ្ងៃពុធ ២៨ សីហា ២០២៤

ដោយ

Chheang

អ៊ុយក្រែន បានប្រើដ្រូនវាយប្រហារទៅលើតំបន់ Kamersky ក្នុងទីក្រុង Rostov ភាគខាងត្បូងប្រទេសរុស្ស៊ី ដែលបង្កឲ្យមានការឆាបឆេះឃ្លាំងស្តុកប្រេងមួយកន្លែង និងរថក្រោះអស់ប៉ុន្មានគ្រឿង។ នេះបើយោងតាមការប្រកាសរបស់អភិបាលក្រុង Rostov លោក Vasily Golubev នៅថ្ងៃទី២៨ខែសីហា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Golubev បានបង្ហោះសារនៅលើបណ្ដាញសង្គម Telegram ថា៖ «មិនមានអ្នកស្លាប់ទេ។ ក្រុមអ្នកពន្លត់អគ្គិភ័យកំពុងពន្លត់ភ្លើង»។ ចំណែកឯក្រសួងការពារជាតិរុស្ស៊ី បានប្រកាសថា អង្គភាពការពារដែនអាកាសរបស់ខ្លូនបានបំផ្លាញដ្រូនចំនួន៤គ្រឿងកាលពីយប់មិញ ដោយមិនបាននិយាយអំពីការវាយប្រហារលើឃ្លាំងស្តុកប្រេងនោះឡើយ។

ប៉ុន្មានម៉ោងមុននេះ គ្រុប Baza នៅលើ Telegram ដែលជិតស្និទ្ធជាមួយទីភ្នាក់ងារសន្តិសុខរុស្ស៊ី បានប្រកាសថា រថក្រោះចំនួន៣គ្រឿងកំពុងឆេះនៅឃ្លាំងស្តុកប្រេង Kamensky បន្ទាប់ពីដ្រូន២គ្រឿងបានធ្លាក់មកលើតំបន់នោះ។

កាលពីដើមខែសីហា ឃ្លាំងស្តុកប្រេងមួយកន្លែងផ្សេងទៀតនៅក្នុងតំបន់ Kamensky ក៏ធ្លាប់ត្រូវរងការវាយប្រហារផងដែរ។

ពាក់ព័ន្ធនឹងការលុកលុយលើកនេះ ភាគីអ៊ុយក្រែនមិនទាន់មានសេចក្ដីអត្ថាធិប្បាយអ្វីនៅឡើយទេ។

ជារឿយៗ មន្ត្រីរុស្ស៊ីមិនសូវបង្ហាញអំពីទំហំពិតប្រាកដនៃការខូចខាតដែលបណ្ដាលមកពីការវាយប្រហារពីអ៊ុយក្រែននោះទេ។

យ៉ាងណា ភាគីទាំង២តែងប្រកាសរៀងៗខ្លួនថាមិនបានកំណត់គោលដៅលើជនស៊ីវិលនៅក្នុងសង្គ្រាមដែលមានអាយុកាល៣០ខែនេះឡើយ។ ទីក្រុងកៀវ ធ្លាប់ប្រកាសថា ការវាយប្រហារតាមអាកាសរបស់ខ្លួន មានគោលបំណងបំផ្លាញប្រភពថាមពល ការដឹកជញ្ជូន និងហេដ្ឋារចនាសម្ព័ន្ធយោធា ដែលជាគន្លឹះដ៏សំខាន់នៃកិច្ចប្រឹងប្រែងក្នុងសង្គ្រាមរបស់ទីក្រុងមូស្គូ៕

ដោយ៖ ឈាង

Related Topics:សង្គ្រាមរុស្ស៊ី-អ៊ុយក្រែន