លើកដំបូង ស្រ្តីកែភេទឡើងដល់វគ្គផ្ដាច់ព្រ័ត្រក្នុងកម្មវិធីបវរកញ្ញាចក្រវាល សិង្ហបុរី (MUS)

យោងតាមប្រព័ន្ធផ្សព្វផ្សាយបរទេស Straits Times រាជនិនីសម្រស់ចំនួន ១៥រូប បានឈានដល់វគ្គផ្តាច់ព្រ័ត្រក្នុងកម្មវិធីប្រកួតបវរកញ្ញាចក្រវាលសិង្ហបុរី (MUS) កាលពីសប្តាហ៍មុន ហើយជាលើកដំបូងក្នុងប្រវត្តិសាស្ត្រ ៧០ ឆ្នាំនៃព្រឹត្តិការណ៍សិង្ហបុរី ស្ត្រីកែភេទត្រូវបានបញ្ចូលទៅក្នុងបញ្ជី។

តួអង្គសំខាន់គឺ Katricia Jairiya អាយុ ៣៣ ឆ្នាំ​ ដែលធ្វើការនៅក្នុងឧស្សាហកម្មម៉ូដ។ កន្លង​មក​នាង​បាន​ជាប់​ចំណាត់​ថ្នាក់​លេខ​២ ​ក្នុង​ការ​ប្រកួត​បវរកញ្ញា​អន្តរជាតិ Miss International Queen នៅ​ប៉ាតាយ៉ា​ប្រទេស​ថៃ ​កាល​ពី​ឆ្នាំ​មុន។

ស្រ្តីកែភេទ Zaireia ​មានកម្ពស់ ១៨០ សង់ទីម៉ែត្រ គឺជាស្ត្រីដែលរៀបការ ហើយដែលបានទទួលការវះកាត់កែភេទក្នុងឆ្នាំ ២០១៧ ហើយបានរៀបការជាមួយស្វាមីជនជាតិសិង្ហបុរី។ បេក្ខនារីរូបនេះនិយាយថា នាងបានស្គាល់ស្វាមីជាលើកដំបូងនៅពេលខ្លួនមានអាយុ ២០ ឆ្នាំ ក្នុងពេលកំពុងបម្រើក្នុងជួរកងទ័ព ហើយប្ដីបាននៅជាមួយនាងពេញមួយការផ្លាស់ប្តូរពីក្មេងប្រុសទៅជាមនុស្សស្រីពេញលក្ខណៈ។

មិនត្រឹមប៉ុណ្ណឹងទេ ស្រ្តីកែភេទវ័យ៣៣ឆ្នាំបានបញ្ចាក់បានបន្ថែមទៀតថា នាងពិតជាមានមោទនភាពក្នុងការតំណាងឲ្យអ្នកកែភេទក្នុងកម្មវិធីប្រកួតបវរកញ្ញាចក្រវាលសិង្ហបុរីនេះជាខ្លាំង។ វាជាឱកាសរបស់នាងក្នុងការសម្រេចក្តីសុបិនរបស់នាងក្នុងការក្លាយជានារីកែភេទដ៏ជោគជ័យម្នាក់ ក្នុងការប្រយុទ្ធប្រឆាំងនឹងការភ័យខ្លាច និងការរើសអើងនាបច្ចប្បន្ន។

Zaireia បាននិយាយថា «បវរកញ្ញាចក្រវាលសិង្ហបុរីគឺជាឱកាសដ៏ល្អមួយដើម្បីចែករំលែកពីរបៀបដែលអ្នកកំពុងសម្រេចបាននូវក្តីសុបិនរបស់អ្នក ក្នុងការក្លាយជាស្ត្រីកែភេទដ៏ជោគជ័យម្នាក់។ ខ្ញុំប្រាថ្នាថាខ្ញុំអាចក្លាយជាស្ត្រីកែភេទដំបូងគេដែលតំណាងឲ្យប្រទេសសិង្ហបុរីនៅលើឆាកពិភពលោក។ គាត់បានបង្ហាញការរំពឹងទុករបស់ខ្លួនដោយនិយាយថា ប្រហែលជាខ្ញុំនឹងក្លាយជាអ្នកប្តូរភេទដំបូងគេដែលតំណាងឲ្យអាស៊ី​»។

ដោយឡែក​ ងាកមកកាន់អ្នកទទួលបន្ទុករៀបចំការប្រកួតបវរកញ្ញាចក្រវាលសិង្ហបុរីក៏បាននិយាយថាដែរថា បន្ទាប់កម្មវិធី បវរកញ្ញាចក្រវាលបន្ធូរបន្ថយសិទ្ធិទទួលបានយ៉ាងសំខាន់ចាប់តាំងពីឆ្នាំមុន​ បានសម្រេចអនុញ្ញាតឲ្យស្ត្រីរៀបការ និងសម្រាលកូនចូលរួម ហើយស្ត្រីទាំងអស់ដែលមានអាយុលើសពី ១៨ ឆ្នាំ អាចដាក់ពាក្យបានដោយដកចេញការកំណត់អាយុ មានស្រ្តីជាច្រើនបានដាក់ពាក្យក្នុងប៉ុន្មានឆ្នាំថ្មីៗនេះ ហើយមានអ្នកដាក់ពាក្យជាស្ត្រីដែលមានអាយុ ៦៥ ឆ្នាំ៕

អត្ថបទ៖ សាង ស្រីល័ក្ខ

ចុចអាន៖គ្រងឈុតអប្សរាលើទឹកដី កម្ពុជា ម្ចាស់មកុដ MU ទទួលការសរសើរយ៉ាងគគ្រឹកគគ្រេង