កីឡា

ឱកាសសម្រាប់ស្ត្រីចូលរួមរត់ Pink Run ដើម្បីយល់ពីជំងឺមហារីកសុដន់

បានផុស

២ years មុន

នៅ

ថ្ងៃសុក្រ ៦ កញ្ញា ២០២៤

ដោយ

ព្រឹត្តិការណ៍រត់ប្រណាំង AIA Pink Run ឆ្នាំ២០២៤ នឹងធ្វើនៅថ្ងៃអាទិត្យ ទី១៣ ខែតុលា នៅឧទ្យានវត្តបទុមវត្តី រាជធានីភ្នំពេញដែលផ្តោតលើស្ត្រី និងក្រុមគ្រួសារសម្រាប់ការចូលរួមដើម្បីសុខភាព។

ក្នុងសន្និសីទសារព័ត៌មាននៅរសៀល ថ្ងៃទី៥ ខែកញ្ញា ឆ្នាំ២០២៤ លោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការនៃគណៈកម្មាធិការជាតិអូឡាំពិកកម្ពុជា បានលើកឡើងថា គោលបំណងសំខាន់នៃព្រឹត្តិការណ៍រត់ប្រណាំងប្រចាំឆ្នាំនេះគឺដើម្បីអបអរសាទរដល់គម្រោងអភិវឌ្ឍព្រែកជីកហ្វូណនតេជោដែលត្រូវបានបើកការដ្ឋានសាងសង់កាលពីពេលថ្មីៗកន្លងទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបន្តថា គោលបំណងទីពីរគឺដើម្បីលើកកម្ពស់ការយល់ដឹង និងទប់ស្កាត់ អំពីជំងឺមហារីកសុដន់របស់ស្ត្រី ដូច្នេះនេះជាឱកាសដ៏ល្អសម្រាប់ស្ត្រី និងក្រុមគ្រួសារចូលរួមរត់ប្រណាំងដើម្បីសុខភាព។ ក្រុមហ៊ុនជាម្ចាស់ឧបត្ថម្ភបានផ្តល់ការពិនិត្យសុដន់ដើម្បីស្វែងរកមេរោគដោយឥតគិតថ្លៃដល់ស្ត្រី និងការផ្សព្វផ្សាយអំពីជំងឺដ៏កាចសាហាវនេះ។ សូមអញ្ជើញបងប្អូនស្ត្រីចូលរួមឲ្យបានច្រើនកុះករ។ ក្រៅពីគោលបំណងសំខាន់២ខាងលើ ក៏មានគោលដៅដើម្បីកិច្ចការសប្បុរសធម៌ផងដែរ។

លោកស្រី ខៀវ វរៈច័ន្ទ ប្រធានផ្នែកទីផ្សារ AIA បានឲ្យដឹងថា មានរៀបចំក្រុមការងារដើម្បីពិភាក្សា និងជជែកពីជំងឺមហាសុដន់ ព្រមទាំងធ្វើតេស្តបឋមដោយឥតគិតថ្លៃចាប់ពីថ្ងៃទី១១ ដល់ទី១៣ ខែតុលា ឆ្នាំ២០២៤ នៅឧទ្យានវត្តបទុមវត្តី។ លោកស្រីបានលើកទឹកចិត្តឲ្យស្ត្រីចូលរួម និងពិភាក្សាជុំវិញសុខភាពដែលផ្តោតលើជំងឺដ៏កាចសាហាវនេះដើម្បីទប់ស្កាត់ឲ្យទាន់ពេលវេលា។

តាមការឲ្យដឹងពីលោក វ៉ាត់ ចំរើន រហូតដល់ពេលនេះមានអ្នកចុះឈ្មោះចូលរួមរត់ប្រមាណ២០០០នាក់ហើយ ដូច្នេះទម្រាំដល់ថ្ងៃបិទការចុះឈ្មោះនៅថ្ងៃទី១១ ខែកញ្ញា ឆ្នាំ២០២៤ រំពឹងទទួលបានការចុះឈ្មោះចូលរួមប្រមាណពី៣០០០ទៅ៤០០០នាក់។ ព្រឹត្តិការណ៍រត់ប្រណាំងនេះមាន៣ វិញ្ញាសាគឺរត់ចម្ងាយ១០គីឡូម៉ែត្រ រត់ចម្ងាយ៥គីឡូម៉ែត្រ និងរត់ចម្ងាយ៣គីឡូម៉ែត្រ៕