ព័ត៌មានអន្ដរជាតិ

ពលរដ្ឋអ៊ីស្រាអែល៧៥ម៉ឺននាក់ ធ្វើបាតុកម្ម ដើម្បីទាមទារបទឈប់បាញ់ និងដោះលែងចំណាប់ខ្មាំង

បានផុស

១០ ខែ មុន

នៅ

ថ្ងៃចន្ទ ៩ កញ្ញា ២០២៤

ដោយ

Chheang

ជនជាតិអ៊ីស្រាអែលប្រមាណ ៧៥ម៉ឺននាក់បាននាំគ្នាធ្វើបាតុកម្មដ៏ធំមិនធ្លាប់មាន ខណៈដែលពួកគេទាមទារឲ្យរដ្ឋាភិបាលរបស់លោកនាយករដ្ឋមន្ត្រី Benjamin Netanyahu ធ្វើកិច្ចព្រមព្រៀងមួយដើម្បីដោះលែងចំណាប់ខ្មាំងដែលនៅសេសសល់ក្នុងតំបន់ហ្គាហ្សា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បាតុកម្មដ៏ធំនេះបានកើតឡើងមួយសប្តាហ៍បន្ទាប់ពីកងទ័ពអ៊ីស្រាអែលបានប្រកាសថា ខ្លួនបានរកឃើញសាកសពចំណាប់ខ្មាំង៦នាក់ពីផ្លូវរូងក្រោមដីមួយកន្លែងនៅភាគខាងត្បូងតំបន់ហ្គាហ្សា។

ក្រុមអ្នកតំណាង និងសមាជិកគ្រួសារនៃចំណាប់ខ្មាំងអ៊ីស្រាអែល បានស្តីបន្ទោសលោក Netanyahu និងរដ្ឋាភិបាលរបស់លោកចំពោះការបរាជ័យក្នុងការទទួលបានកិច្ចព្រមព្រៀងបទឈប់បាញ់ដែលនឹងធានាការដោះលែងចំណាប់ខ្មាំងដែលក្រុមហាម៉ាសចាប់ខ្លួនកាលពីឆ្នាំមុន។

យោងតាមយោធាអ៊ីស្រាអែលបានឲ្យដឹងថា ចំណាប់ខ្មាំងជាង ១០០នាក់នៅតែស្ថិតក្នុងតំបន់ហ្គាហ្សា ប៉ុន្តែប្រហែលមួយភាគបីនៃអ្នកទាំងនោះត្រូវបានគេជឿថាបានបាត់បង់ជីវិតទៅហើយ។ ចំណាប់ខ្មាំងសរុបចំនួន ១០៥នាក់ត្រូវបានដោះលែងដោយក្រុមហាម៉ាសជាថ្នូរនឹងអ្នកទោសប៉ាឡេស្ទីនចំនួន ២៤០នាក់ដែលត្រូវបានឃុំខ្លួននៅក្នុងពន្ធនាគារអ៊ីស្រាអែល ដែលការដោះដូរនេះជាផ្នែកមួយនៃកិច្ចព្រមព្រៀងកាលពីខែវិច្ឆិកា។

ក្រុមសកម្មប្រយុទ្ធហាម៉ាសបានចាប់មនុស្សប្រហែល ២៤០នាក់ធ្វើជាឈ្លើយសឹកបន្ទាប់ពីការវាយប្រហារនៅភាគខាងត្បូងអ៊ីស្រាអែលកាលពីថ្ងៃទី៧ខែតុលា។ យ៉ាងហោចណាស់មនុស្ស ១១៣៩នាក់បានស្លាប់នៅក្នុងការវាយប្រហារនេះ។

ចាប់តាំងពីពេលនោះមក អ៊ីស្រាអែលបានវាយប្រហារសងសឹក និងសម្លាប់ជនជាតិប៉ាឡេស្ទីនជាង ៤ម៉ឺននាក់នៅក្នុងតំបន់ហ្គាហ្សា ដែលបណ្តាលឲ្យមានការថ្កោលទោសជាសកល។ អ៊ីស្រាអែលក៏បានសម្លាប់មនុស្សជាង ៦០០នាក់នៅតំបន់ West Bank ដែលខ្លួនកាន់កាប់ និងឃុំខ្លួនជនជាតិប៉ាឡេស្ទីនជិត ១ម៉ឺននាក់៕

ដោយ៖ ឈាង