អ្នកនាង ខាត់ សុឃីម ឆ្ងល់ថាហេតុអ្វីរដូវបុណ្យភ្ជុំមានអ្នកលេងផាវ និងស្នើឲ្យមានការទប់ស្កាត់

តារាស្រីពហុជំនាញអ្នកនាង ខាត់ សុឃីម បានបង្ហាញអារម្មណ៍ហួសចិត្ត ជាមួយនឹងចម្ងល់ដែរថា ហេតុអ្វីក្នុងរដូវពិធីបុណ្យភ្ជុំមានអ្នកលេងអុចផាវ និងស្នើឲ្យមានការទប់ស្កាត់ផងដែរ។ ការលើកឡើងនេះ គឺបន្ទាប់ពីបានមើលឃើញការចែករំលែកនូវវីដេអូរបស់ក្មេងប្រុសមា្នក់ ដែលលេងផាវបណ្តាលឲ្យគ្រោះថ្នាក់ដាច់ម្រៀមដៃ បង្កការចាប់អារម្មណ៍លើបណ្តាញទំនាក់ទំនងសង្គមហ្វេសប៊ុក កាលពីពេលថ្មីៗកន្លងមកនេះ។

ដោយបង្ហោះខ្លឹមសារភ្ជាប់ជាមួយវីដេអូរបស់ក្មេងប្រុសនោះ អ្នកនាង ខាត់ សុឃីម បានរៀបរាប់ថា តាំងពីខ្លួនចាប់កំណើតមក គឺមិនដែលមាការលេងផាវ អំឡុងពេលបុណ្យភ្ជុំនោះឡើយ។ ជាមួយនឹងការហួសចិត្តនេះ អ្នកនាងបានស្នើដល់ អាជ្ញាធរពាក់ព័ន្ធពិសេសខណ្ឌសង្កាត់ ជួយរកដំណោះស្រាយយ៉ាងណាដើម្បីទប់ស្កាត់បញ្ហានេះ។

តាមរយ:ការលើកឡើងរបស់តារាពហុជំនាញ ខាត់សុ ឃីម គេឃើញមានការបញ្ចេញមតិ ដោយស្នើឲ្យក្មេងៗមានការប្រុងប្រយ័ត្ន និងកុំគួរនាំគ្នាលេងល្បែងបែបនេះ ដែលអាចបង្កគ្រោះថ្នាក់។ ទោះបីយ៉ាងណា ចំពោះករណីរបស់ក្មេងប្រុសដែលត្រូវបានចែករំលែកនៅលើបណ្តាញសង្គមនោះ ពុំមានការបញ្ជាក់ទេថាក្មេងប្រុសរូបនោះរស់នៅភូមិ ឃុំណាឡើយ។

គួរបញ្ជាក់ថា កាលពីថ្ងៃទី ២២ ខែកញ្ញ ឆ្នាំ២០២៤ តាមរយៈគណនីហ្វេសប៊ុកឈ្មោះ នុប សុវណ្ណា បានណែនាំដល់អាណាព្យាបាលកូនតូចៗឲ្យមានការប្រុងប្រយ័ត្ន ដោយសារតែលោកបានជួបករណីកូនលោកផ្ទាល់លេងផាវគ្រាប់បែកបណ្តាលឲ្យរបួសដាច់ម្រាមដៃ និងរបួសកន្លែងផ្សេងទៀត៕ អត្ថបទ៖ ចាន់រ៉ា