ខ្យល់កន្ត្រាក់វាយប្រហារផ្ទះពលរដ្ឋ៦០ខ្នង នៅស្រុកចំនួន២ ក្នុងខេត្តត្បូងឃ្មុំ

នៅរសៀលថ្ងៃទី១៣ ខែតុលា ឆ្នាំ២០២៤ ភ្លៀងមួយមេយ៉ាងធំលាយឡំដោយខ្យល់កន្ត្រាក់បានបក់បោកមកលើស្រុកចំនួន២ គឺមានពញាក្រែក និងស្រុកអូររាំងឪ នៃខេត្តត្បូងឃ្មុំ បណ្ដាលឱ្យលំនៅឋានរបស់ប្រជាពលរដ្ឋតូចធំប្រមាណជា៦០ខ្នងបានទទួលរងខូចខាតរបើកដំបូលបាក់សំយាបផ្ទះ តែសំណាងល្អមិនមានអ្នកណាម្នាក់រងរបួសក្នុងហេតុការណ៍នេះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមរបាយការណ៍របស់ប៉ុស្តិ៍រដ្ឋបាលមូលដ្ឋានឃុំដូនតី ប្រាប់ឲ្យដឹងនារសៀលថ្ងៃទី១៣តុលា ឆ្នាំ២០២៤ មានភ្លៀង១មេធំបានបង្អុរធ្លាក់លាយឡំដោយខ្យល់កន្ត្រាក់ មកលើភូមិដ្ឋានរបស់ប្រជាពលរដ្ឋក្នុងនោះរួមមាន ឃុំដូនតី មានគ្រោះធម្មជាតិខ្យល់កន្ត្រាក់ បណ្ដាលឲ្យខូចខាតផ្ទះប្រជាពលរដ្ឋ ចំនួនសរុប៤៨ខ្នងផ្ទះ ក្នុងនោះរងការខូចខាតកម្រិតស្រាល ចំនួន២៤ខ្នងផ្ទះស្ថិតនៅក្នុងភូមិអង្គលើ២៧ខ្នងផ្ទះ ភូមិអង្គក្នុង៩ខ្នងផ្ទះ ភូមិអង្គក្រៅ១២ខ្នងផ្ទះ។

សមត្ថកិច្ចមូលដ្ឋានប្រាប់បន្តឲ្យដឹងទៀតថា ភ្លៀងដែលបានធ្លាក់នេះ គឺពិតជាកម្រជួបប្រទះនាពេលកន្លងទៅ ដោយលាយឡំខ្យល់កន្ត្រាក់ខុសប្លែកពីធម្មតា គឺភ្លៀងប្រហែលមួយម៉ោងឯណោះ។

លោក ជា ណារ៉ុន អភិបាលស្រុកអូរាំងឪ ប្រាប់ឲ្យដឹងថា កាលពីល្ងាចថ្ងៃទី១២ ខែតុលា ឆ្នាំ២០២៤ ខ្យល់កន្រ្តាក់​បានធ្វើឲ្យខូចខាតផ្ទះពលរដ្ឋចំនួន ១២ខ្នងផ្ទះ និងសួនកីឡារបស់សាលារៀន។ ជាមួយគ្នានេះ អាជ្ញាធរក៏បានណែនាំដល់ពលរដ្ឋ​ដែលមានផ្ទះតូចមិនធានាសុវត្ថិភាព ត្រូវរកកន្លែងជ្រកកោននៅផ្ទះអ្នកជិតខាងនៅពេលដែលមានភ្លៀងធ្លាក់ ជៀសវាងបង្ការកុំឲ្យមានគ្រោះថ្នាក់កើតឡើងជាយថាហេតុ៕

អត្ថបទ៖ សាន វិឡែម