កូរ៉េ​ខាងជើង រៀបចំ​កិច្ច​ប្រជុំ​សន្ដិសុខពិសេស ជុំវិញ​រឿងបង្ហោះដ្រូន​ពី​កូរ៉េ​ខាងត្បូង

កូរ៉េខាងជើង បាន​រៀបចំ​កិច្ច​ប្រជុំ​សន្តិសុខ​​ពិសេស​មួយ​ ដើម្បីពិភាក្សាពីអ្វីដែល​​ខ្លួន​អះអាងថា​ជាការជ្រៀតចូលនៃដ្រូនរបស់កូរ៉េខាងត្បូង និងផែនការយោធា ដើម្បីឆ្លើយតបទៅ​នឹង​​សកម្មភាព​​​របស់​ទីក្រុង​សេអ៊ូល។ កិច្ច​ប្រជុំ​នេះ មាន​វត្តមាន​របស់​លោក គីម ជុងអ៊ុន មេដឹក​នាំ​កូរ៉េ​ខាងជើង ព្រម​ទាំង​មន្ត្រីយោធា និងចារកម្មសំខាន់ៗ ដូចជា លោក Ri Yong-gil ប្រធានអគ្គសេនាធិការនៃកងទ័ពប្រជាជនកូរ៉េ និងលោក Ri Chang-ho ប្រធាន​ចារកម្ម។

បើ​យោង​តាម​​សារព័ត៌មាន KCNA កិច្ចប្រជុំ​សន្ដិសុខ​នេះ​ ធ្វើឡើងកាលពីថ្ងៃចន្ទ ដោយ​កូរ៉េខាងជើង​បាន​បញ្ជាក់​ថា វា​គឺ​ជា​ការ​ស្វែង​រក​ដំណោះ​ស្រាយ​តទល់​នឹង​ «ការបង្កហេតុដ៏ធ្ងន់ធ្ងររបស់សត្រូវ» ដែល​​រួម​មាន​ទាំងផែនការប្រឆាំងរបស់យោធា និងស្ថានភាពដែលទាក់ទងនឹងប្រតិបត្តិការចារកម្មរបស់កូរ៉េខាងជើង។

នៅក្នុងកិច្ចប្រជុំ លោក គីម បានដាក់ផែនការអនុវត្ត «សកម្មភាពយោធាជាបន្ទាន់» និងស្នើ «កិច្ចការសំខាន់ៗដែលត្រូវបំពេញក្នុងប្រតិបត្តិការរារាំងសង្គ្រាម និងការអនុវត្តសិទ្ធិការពារខ្លួនឯង ដើម្បីការពារអធិបតេយ្យភាពជាតិ»។ លោក គីម ក៏បាន «បង្ហាញពីជំហរនយោបាយ និងយោធាដ៏តឹងតែង» នៃគណបក្សពលករកូរ៉េដែលកំពុងកាន់អំណាច និងរដ្ឋាភិបាលកូរ៉េខាងជើង នៅក្នុងកិច្ចប្រជុំនេះ​ផង​ដែរ។

កូរ៉េខាងជើង បានអះអាងកាលពីថ្ងៃសុក្រថា ដ្រូន​របស់កូរ៉េខាងត្បូងដែលដឹកខិត្តប័ណ្ណឃោសនាប្រឆាំងកូរ៉េខាងជើង ត្រូវបានរកឃើញនៅលើមេឃ​នា​ពេលយប់លើទីក្រុងព្យុងយ៉ាងចំនួន៣​ដងក្នុងខែ​តុលា​នេះ ហើយបានគំរាមឆ្លើយតបដោយកម្លាំងប្រសិនបើការហោះហើរបែបនេះកើតឡើងម្តងទៀត។ យោធាកូរ៉េខាងជើង បាននិយាយកាលពីថ្ងៃអាទិត្យថា ខ្លួនបានបញ្ជាឲ្យអង្គភាពកាំភ្លើងធំជួរមុខត្រៀមខ្លួនជាស្រេច ដើម្បីបើកការបាញ់ប្រហារ។

ភាពតានតឹងកំពុងកើនឡើងខ្ពស់នៅលើឧបទ្វីបកូរ៉េ ខណៈដែលកូរ៉េខាងជើងបានព្រមានពី «គ្រោះមហន្តរាយដ៏អាក្រក់» ប្រសិនបើកូរ៉េខាងត្បូងបញ្ជូនដ្រូន​បន្ថែម​ហោះ​ពីលើរដ្ឋធានីព្យុងយ៉ាង។

ជាការឆ្លើយតបទៅនឹងការគំរាមកំហែងផ្នែកយោធារបស់កូរ៉េខាងជើង ក្រសួងការពារជាតិកូរ៉េខាងត្បូង បានព្រមានថា ក្រុង​ព្យុងយ៉ាង​នឹងប្រឈមមុខនឹង «ការបញ្ចប់នៃរបបរបស់ខ្លួន» បើហ៊ាន​បង្កគ្រោះថ្នាក់ដល់ប្រជាជនកូរ៉េខាងត្បូង។ អគ្គសេនាធិការចម្រុះរបស់កូរ៉េខាងត្បូង បានប្រាប់​ថា ខ្លួនមិនអាចបញ្ជាក់​បាន​​ទេ​ថា​តើការអះអាងរបស់​កូរ៉េ​ខាង​ជើង​អំពី​ដ្រូន​​ជាការពិតឬ​ក៏​យ៉ាងណានោះទេ៕

ដោយ៖ ឈាង