ប្រទះឃើញចម្លាក់បដិមាទ្វារបាលចំនួន ១២ នៅខ្លោង​ទ្វារខាងជើងព្រះបរមរាជវាំងក្រុងអង្គរធំ

ចម្លាក់បដិមាទ្វារបាលចំនួន ១២ ធ្វើពីថ្មភក់ ត្រូវបានប្រទះឃើញដោយ​ក្រុមបុរាណវិទ្យា នៃអាជ្ញាធរជាតិអប្សរា សហការជាមួយក្រុមការងាររដ្ឋាភិបាលចិន-កម្ពុជា ដើម្បីថែរក្សារមណីយដ្ឋានអង្គរ(CCSA) កំឡុងពេលធ្វើកំណាយស្រាវជ្រាវនៅខ្លោងទ្វារខាងជើង ជ្រុងខាងលិចនៃព្រះបរមរាជវាំង នៃក្រុងអង្គរធំ កាលពីថ្មីៗនេះ។

បុរាណវិទ្យា លោក សន ចាន់ថន បានឱ្យដឹងថា ចម្លាក់ទ្វារបាលធ្វើពីថ្មភក់ចំនួន ១២ នេះ ត្រូវបានក្រុម​អ្នក​បុរាណវិទ្យា ធ្វើកំណាយ​ស្រាវជ្រាវ​នៅខ្លោងទ្វារខាងជើង​ព្រះបរមរាជវាំងនៃក្រុងអង្គរធំ ដើម្បីសិក្សា​ស្រាវជ្រាវ​រចនាសម្ព័ន្ធ​នៃខ្លោងទ្វារ និងស្វែងរកថ្ម ដែលជ្រុះធ្លាក់ដើម្បីជួសជុលខ្លោងទ្វារនេះឡើងវិញ។

បុរាណវិទ្យារូបនេះ ឱ្យដឹងទៀតថា«ចម្លាក់បដិមាទ្វារបាលទី១២ ដែលទើបរកឃើញនេះ ស្ថិតនៅក្នុងដី​ជម្រៅ ១៤០​សង់ទីម៉ែត្រ  គឺស្រទាប់ដីគ្រឹះសម័យកាលកសាង គឺអាចថាចម្លាក់នេះ បានធ្លាក់​អស់រយៈ​ពេលជាយូរមកហើយ ចម្លាក់បដិមាទ្វារបាលទាំង១២ មួយចំនួនធ្លាក់នៅរាយប៉ាយលើដីក្បែរខ្លោងទ្វារ  គឺមានទំហំ និង​ទម្រង់ខុសៗគ្នា​ទៅតាម​ជាន់នីមួយៗ»។

ចម្លាក់ទ្វារបាលនៅជាន់ទី១ មានកម្ពស់ ១១០ សង់ទីម៉ែត្រ និងជាន់ទី២ មានកម្ពស់ ១០០ សង់ទីម៉ែត្រ មួយចំនួននៅមានរូបរាងនៅល្អពេញលេញ ខ្លះទៀតខូចខាតដោយអន្លើ ដោយសារធ្លាក់ពី​កម្ពស់ខ្ពស់។ ចំណែក រូបចម្លាក់ទ្វារបាលនីមួយៗមានលម្អគ្រឿងអលង្ការ សក់ ផ្ទៃមុខខុសៗគ្នា។

លោក ចាន់ថន បញ្ជាក់ថា ក្រោយពីបានរកឃើញ​ចម្លាក់ទ្វារបាល​ទាំងអស់នេះ ក្រុម​ការងារបាន​កំណត់​ទីតាំង​ដើម ចុះបញ្ជី ថតរូប រៀប​ចំ​ឯកសារ មុនឈាន​ដល់​ការលើក​មកសម្អាត និងជួសជុល ដើម្បីយកទៅដាក់នៅទីតាំងដើម។

ក្រុមអ្នកជំនាញសន្និដ្ឋានថា ចម្លាក់បដិមាទ្វារបាលដែលប្រទះឃើញ គឺស្ថិតក្នុងរចនាប័ទ្មឃ្លាំង ស្រប​ពេលជាមួយ​គ្នានៃ​ការកសាងព្រះបរមរាជវាំងស្ថិតនៅសតវត្សរ៍ទី១១៕