សាលាតិចណូ ច្រានចោលព័ត៌មានដែលចុះផ្សាយថា លក់ទៅឱ្យឈ្មួញក្រោមរូបភាពដោះដូរដី

នៅព្រឹកថ្ងៃទី៨ ខែវិច្ឆិកា ឆ្នាំ២០២៤ វិទ្យាស្ថានបច្ចេកវិទ្យាកម្ពុជា ឬហៅថា សាលាតិចណូ បានចេញសេចក្តីប្រកាសបដិសេធចំពោះការផ្សាយរបស់ VOD Khmer ដែលថាវិទ្យាស្ថាននេះត្រូវបានលក់ទៅឱ្យឈ្មួញក្នុងរូបភាពដោះដូរដី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការច្រានចោលនេះ​ធ្វើឡើងបន្ទាប់ពី កាលពីថ្ងៃទី៧ ខែវិច្ឆិកា VOD Khmer បានផ្សាយលើហ្វេសប៊ុក តិកតុ និងយូធូបថា «វិទ្យាស្ថានបច្ចេកវិទ្យាកម្ពុជា ឬហៅកាត់ថាសាលាតិចណូ ត្រូវ គេលក់ឱ្យឈ្មួញហើយក្រោមរូបភាពដោះដូរដី»។ ជុំវិញករណីនេះ សាលាតិចណូបានច្រានចោល និងបដិសេធទាំងស្រុង និងចាត់ទុកថាការផ្សាយនេះមិនពិត មិនមានមូលដ្ឋានច្បាស់លាស់ បង្ខូចកេរ្តិ៍ឈ្មោះរបស់វិទ្យាស្ថាន បំពុលសង្គម និងមានបំណងឱ្យមហាជនមានការភាន់ច្រឡំ។

ប្រភពខាងលើបានបកស្រាយថា វិទ្យាស្ថានបច្ចេកវិទ្យាកម្ពុជា បាននិងកំពុងអភិវឌ្ឍហេដ្ឋារចនាសម្ព័ន្ធ មន្ទីរពិសោធន៍ និងសាស្ត្រាចារ្យ អ្នកស្រាវជ្រាវពូកែៗជាបន្តបន្ទាប់ ដើម្បីបណ្តុះបណ្តាលធនធានមនុស្សលើការស្រាវជ្រាវជំនាញវិស្វកម្ម វិទ្យាសាស្ត្រ និងបច្ចេកវិទ្យាដែលត្រូវបានទទួលស្គាល់ទាំងថ្នាក់ជាតិ និងអន្តរជាតិ។ ជាមួយគ្នានេះ វិទ្យាស្ថានបច្ចេកវិទ្យាកម្ពុជា ក៏បានពង្រីកសាខារបស់ខ្លួនបន្ថែមទៀត ដោយកំពុងសាងសង់សាខារបស់វិទ្យាស្ថានមួយទៀតនៅតាមបណ្តោយមហាវិថីវិមានឈ្នះឈ្នះផងដែរ។

ជាមួយនឹងការច្រានចោលទាំងស្រុងនេះ វិទ្យាស្ថានបច្ចេកវិទ្យាកម្ពុជា ក៏បានស្នើទៅកាន់ VOD Khmer ត្រួតពិនិត្យ និងកែតម្រូវការផ្សព្វផ្សាយព័ត៌មានមិនពិតខាងលើផងដែរ៕