UN៖ ប្រជាជន​ស៊ូដង់ខាង​ត្បូង​​ជិត​៨​លាន​នាក់​ប្រឈម​​​អសន្តិសុខ​ស្បៀង​នៅឆ្នាំក្រោយ

ស្ទើរតែ​៦០ភាគរយនៃចំនួនប្រជាជនស៊ូដង់ខាងត្បូងនឹង​ប្រឈម​​អសន្តិសុខស្បៀងយ៉ាងធ្ងន់ធ្ងរនៅឆ្នាំក្រោយ ដោយមានកុមារជាង២​លាននាក់ប្រឈមនឹងកង្វះអាហារូបត្ថម្ភ​​ ខណៈប្រទេស​​នៅ​តំបន់​អាហ្វ្រិក​មួយ​នេះ​​កំពុង​​ហែកហួរ​ដោយសារ​សង្គ្រាម​ស៊ីវិល​​។

សារព័ត៌មាន ​Al Jazeera ផ្សាយ​នៅថ្ងៃទី១៩ខែវិច្ឆិកានេះឱ្យ​ដឹងថា ការពិនិត្យឡើងវិញចុងក្រោយបំផុតនៃដំណាក់កាលសន្តិសុខស្បៀងអាហារ (IPC) ដែលត្រូវបានចេញផ្សាយកាលពីថ្ងៃចន្ទបានប៉ាន់ប្រមាណថា ចាប់ពីខែមេសា ៥៧%នៃចំនួនប្រជាជននឹងទទួលរងពីអសន្តិសុខស្បៀងអាហារធ្ងន់ធ្ងរដែលអង្គការសហប្រជាជាតិកំណត់ថាជាពេលដែល«អសមត្ថភាពរបស់មនុស្សម្នាក់ក្នុងការទទួលទានអាហារគ្រប់គ្រាន់ដើម្បីរស់»។

យោងតាម ​​IPC ប្រជាជនស្ទើរតែ ៧,៧លាននាក់នឹងត្រូវបានចាត់ថ្នាក់ថាប្រឈមនឹងអសន្តិសុខស្បៀងធ្ងន់ធ្ងរ។

អ្នកស្រី Mary-Ellen McGroarty នាយកប្រទេសសម្រាប់កម្មវិធីស្បៀងអាហារពិភពលោករបស់អង្គការសហប្រជាជាតិ (WFP) បាននិយាយថា «ពីមួយឆ្នាំទៅមួយឆ្នាំ យើងឃើញភាពអត់ឃ្លានឈានដល់កម្រិតខ្ពស់បំផុតនៅក្នុងប្រទេស​ស៊ូដង់ខាងត្បូង»។

អ្នកស្រីបន្ថែមថា «នៅពេលដែលយើងក្រឡេកមើលតំបន់ដែលមានកម្រិតអសន្តិសុខអាហារខ្ពស់បំផុត វាច្បាស់ណាស់ថា ភាពអស់សង្ឃឹម ជម្លោះ និងវិបត្តិអាកាសធាតុ គឺជាកត្តាជំរុញដ៏សំខាន់»​។

ប្រទេសស៊ូដង់ខាងត្បូង ដែលជាប្រទេសក្មេងជាងគេបំផុតរបស់ពិភពលោក ស្ថិតក្នុងចំណោមប្រទេសក្រីក្របំផុតរបស់ពិភពលោក ហើយកំពុងប្រឈមមុខនឹងទឹកជំនន់ដ៏អាក្រក់បំផុតរបស់ខ្លួនក្នុងរយៈពេលជាច្រើនទសវត្សរ៍ ក៏ដូចជាលំហូរជនភៀសខ្លួនយ៉ាងច្រើនដែលភៀសខ្លួនចេញពីសង្រ្គាមនៅស៊ូដង់ទៅភាគខាងជើង។

ជាង៨៥%​នៃអ្នកត្រឡប់មកវិញពីការភៀសខ្លួនចេញពីសង្រ្គាមនៅស៊ូដង់នឹងមានភាពអសន្តិសុខស្បៀងយ៉ាងធ្ងន់ធ្ងរចាប់ពីខែមេសា ក្នុងនោះកុមារ ២.១ លាននាក់មានហានិភ័យកង្វះអាហារូបត្ថម្ភដែលផ្សំឡើងដោយកង្វះទឹកស្អាត និងអនាម័យ។

កាលពីខែតុលា ធនាគារពិភពលោកបានព្រមានថា ទឹកជំនន់ដែលកំពុងរីករាលដាលកំពុង «កាន់តែអាក្រក់ទៅៗលើស្ថានភាពមនុស្សធម៌ដ៏ធ្ងន់ធ្ងររួចទៅហើយ»។ ការិយាល័យសម្របសម្រួលកិច្ចការមនុស្សធម៌របស់អង្គការសហប្រជាជាតិ (OCHA) បាននិយាយនៅដើមខែនេះថា មនុស្ស ១.៤ លាននាក់ត្រូវបានរងផលប៉ះពាល់ដោយទឹកជំនន់ ដែលបានធ្វើឱ្យមនុស្សជិត ៣៨០០០០ ផ្លាស់ទីលំនៅ។

ចាប់តាំងពីទទួលបានឯករាជ្យក្នុងឆ្នាំ២០១១ ស៊ូដង់ខាងត្បូងនៅតែញាំញីដោយអស្ថិរភាពរ៉ាំរ៉ៃ អំពើហិង្សា និងការជាប់គាំងសេដ្ឋកិច្ច ក៏ដូចជាគ្រោះមហន្តរាយអាកាសធាតុដូចជាគ្រោះរាំងស្ងួត និងទឹកជំនន់។ ប្រទេសក៏ប្រឈមមុខនឹងភាពខ្វិនផ្នែកនយោបាយមួយទៀត បន្ទាប់ពីរដ្ឋាភិបាលបានពន្យារពេលការបោះឆ្នោតរយៈពេលពីរឆ្នាំដល់ខែធ្នូ ឆ្នាំ ២០២៦ ដែលធ្វើឲ្យដៃគូអន្តរជាតិមានការខឹងសម្បារ។

ប្រទេសស៊ូដង់ខាងត្បូងក៏ជាប្រទេសមានធនធានប្រេងដ៏ច្រើន ប៉ុន្តែប្រភពចំណូលដ៏សំខាន់មួយត្រូវបានកាត់បន្ថយនៅក្នុងខែកុម្ភៈ នៅពេលដែលការបូមប្រេងនាំចេញត្រូវបានខូចខាតនៅក្នុងប្រទេសស៊ូដង់ដែលហែកហួរដោយសង្រ្គាម៕

អត្ថបទ៖ ប៊ុន សុភាព