ព័ត៌មានជាតិ

ប.ស.ស ៖ កម្មករចុះឈ្មោះចូលជាសមាជិក ប.ស.ស នឹងទទួលបាន របបធានារ៉ាប់រងសន្តិសុខសង្គមចំនួន ៣

បានផុស

១ year មុន

នៅ

ថ្ងៃព្រហស្បតិ៍ ២១ វិច្ឆិកា ២០២៤

ដោយ

បេឡាជាតិសន្តិសុខសង្គម(ប.ស.ស.)បានអះអាងថា នៅពេលថៅកែរបស់កម្មករ-និយោជិត បានចុះឈ្មោះអ្នកចូលជាសមាជិក ប.ស.ស. នោះ លោកអ្នកនឹងទទួលបានរបបធានារ៉ាប់រងសន្តិសុខសង្គមចំនួន ៣ រួមមាន ទី១.របបសន្តិសុខសង្គមផ្នែកហានិភ័យការងារ ,ទី២.របបសន្តិសុខសង្គមផ្នែកថែទាំសុខភាព និងទី៣.របបសន្តិសុខសង្គមផ្នែកប្រាក់សោធន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាម ប.ស.ស. ក្រៅនេះ សម្រាប់សមាជិក ប.ស.ស. ជាស្ត្រីសម្រាលកូន នឹងទទួលបានអត្ថប្រយោជន៍ជាច្រើនបន្ថែមទៀតដូចជា សេវាសម្រាល សេវាថែទាំមុន និងក្រោយពេលសម្រាល ដោយឥតគិតថ្លៃប្រាក់បំណាច់ប្រចាំថ្ងៃ ៧០% នៃប្រាក់ឈ្នួលជាប់ភាគទានប្រចាំថ្ងៃចំនួន ៩០ ថ្ងៃ នៃការឈប់សម្រាក មុន និងក្រោយសម្រាលកូន។ ប៉ុន្តែតម្រូវឱ្យបង់ភាគទានមក ប.ស.ស. បានយ៉ាងតិច ៩ ខែ ក្នុងអំឡុងពេល ១២ ខែចុងក្រោយ គិតមកដល់ខែសម្រាលកូន និងទទួលបានប្រាក់ឧបត្ថម្ភបន្ថែមពីរាជរដ្ឋាភិបាល។

ប.ស.ស. បានអំពាវនាវដល់ថៅកែគ្រឹះស្ថានសហគ្រាសទាំងអស់ នាំបុគ្គលិកកម្មករ-និយោជិត ទៅចុះឈ្មោះចូលជាសមាជិក ប.ស.ស. ឱ្យបានគ្រប់ៗ គ្នា ដើម្បីឱ្យពួកគេទទួលបានអត្ថប្រយោជន៍ជាច្រើនពីរាជរដ្ឋាភិបាល ពិសេសការទៅពិនិត្យ និងព្យាបាលជំងឺនៅតាមមន្ទីរពេទ្យជាដៃគូរបស់ ប.ស.ស។

ប្រសិនបើមានចម្ងល់ពាក់ព័ន្ធនឹងការចុះឈ្មោះចូលជាសមាជិក ប.ស.ស. លោកអ្នកទំនាក់ទំនងមកកាន់លេខ ១២៩៧ ឬ ១២៨៦ ដោយឥតគិតថ្លៃ ឬតាមរយៈបណ្ដាញសង្គមរបស់ ប.ស.ស។

លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍ថា គិតត្រឹមថ្ងៃទី ៣ ខែវិច្ឆិកា ឆ្នាំ ២០២៤ នេះ ប.ស.ស. មានសមាជិកសរុបចំនួន ២ ៦៣៦ ៩៦២ នាក់ នៅទូទាំងប្រទេស។ ក្នុងនោះមានសមាជិក ប.ស.ស. ផ្នែកថែទាំសុខភាព វិស័យសាធារណៈ ចំនួន ៤៩៣ ៤២៣ នាក់ សមាជិក ប.ស.ស. វិស័យឯកជន ចំនួន ១ ៦០២ ២៩៣ នាក់ សមាជិក ប.ស.ស. ជាបុគ្គលស្វ័យនិយោជន៍ ៤០៨ ៦៦៨ នាក់ និងសមាជិក ប.ស.ស. ជាអ្នកក្នុងបន្ទុកសមាជិក ប.ស.ស. (សហព័ទ្ធ និងកូន) ចំនួន ១៣២ ៥៧៨ នាក់៕

អត្ថបទ ៖ សំអឿន