ប្រាក់ចំណូលរបស់ GTI កើនឡើងខ្ពស់ក្នុងត្រីមាសទី៣កន្លងមកនេះ ជម្រុញដោយការងើបឡើងវិញនៃតម្រូវការលើផលិតផលសម្លៀកបំពាក់កាត់ដេរ

ក្រុមហ៊ុនរោងចក្រកាត់ដេរ Grand Twins International (GTI) បានរាយការណ៍ពីការកើនឡើងនៃចំណូល​អាជីវកម្ម​​របស់ខ្លួនក្នុងត្រី​មាសទី៣ឆ្នាំ២០២៤ សម្រេចបានចំនួនជាង ៧៩ពាន់លានរៀល កើនឡើង​ជាង១៩% ធៀបនឹងត្រីមាសទី២ឆ្លុះបញ្ចាំងអំពីការសន្ទុះងើបឡើងវិញនៃតម្រូវការសកលលើផលិតផលសម្លៀក​បំពាក់កាត់ដេរ​។​

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមរបាយការណ៍របស់ក្រុមហ៊ុនផ្ញើរទៅកាន់ផ្សារមូលបត្រកម្ពុជាកាលពីថ្ងៃទី២៥ ខែវិច្ឆិកា សម្រាប់ត្រីមាសទី៣នេះដែរ ក្រុមហ៊ុនក៏ទទួលបាននូវប្រាក់ចំណូលដ៏ខ្ពស់ដែលមានចំនួន ១,៣៧៤ ពាន់លានរៀល ដោយកើនឡើងជាង៥៨៨%ធៀបនឹងត្រីមាសទី២ដែលមានការខាតបង់នូវប្រាក់ចំណេញរហូតដល់ជាង២៨១ លានរៀល។

លោក Chen Tsung Chi អភិបាលរបស់ក្រុមហ៊ុនបានថ្លែងនៅក្នុងរបាយការណ៍នោះថា  ការកើនឡើងប្រាក់ចំណូល ១៩.១៣%​ ដោយសារការកើនឡើងនូវការបញ្ជាទិញរបស់អតិថិជន​ និង ការកើនឡើងនូវសេវា កាត់ដេរសំលៀកបំពាក់​ សម្រាប់ត្រីមាស​ទី៣ ឆ្នាំ២០២៤។

លោកបានថ្លែងបញ្ជាក់ទៀតថា៖« ការកើនឡើងចំណេញប្រតិបត្តិការ ដោយសារការកើនឡើងនៃប្រាក់ចំណូល ក្នុងត្រីមាស​ទី៣ ឆ្នាំ២០២៤ បើធៀបនឹងត្រីមាសទី៣ ឆ្នាំ២០២៣។​ ការកើនឡើងចំណេញសុទ្ធ ដោយសារការកើនឡើងនៃប្រាក់ចំណូល និង​ការបម្រែបម្រួលលើការគណនាពន្ធពន្យា ក្នុងត្រីមាស​ទី៣ ឆ្នាំ២០២៤ បើធៀបនឹងត្រីមាសទី៣ ឆ្នាំ២០២៣»៕