ព័ត៌មានជាតិ

៦ ខែ ដើម ឆ្នាំ ២០២៤ កម្ពុជាទទួលទុនវិនិយោគប្រមាណ ២,៦ ពាន់លានដុល្លារលើវិស័យសំណង់

បានផុស

១ year មុន

នៅ

ថ្ងៃព្រហស្បតិ៍ ២៨ វិច្ឆិកា ២០២៤

ដោយ

ក្នងរយៈពេល ៦ ខែ ដើមអាណត្តិទី ៧ គម្រោងសំណង់នៅទូទាំងប្រទេសមានចំនួន ១ ៦៤២ គម្រោង មានតម្លៃទុនវិនិយោគប្រមាណជាង ២,៦ ពាន់លានដុល្លារ។

បើទោះបីស្ថានភាពសេដ្ឋកិច្ចក្នុងតំបន់និងពិភពលោក នៅពុំទាន់ប្រសើរឡើងវិញដូចស្ថានភាពមុនការរីករាលដាលនៃជំងឺកូវីដ-១៩ ក្ដី វិស័យសំណង់កម្ពុជានៅតែមានកំណើនជាប្រចាំជាពិសេស គម្រោងថ្មីៗដែលបានស្នើសុំក្នុងរយៈពេល ៦ ខែ ឆ្នាំ២០២៤ មានកំណើនខ្ពស់ជាងរយៈពេលដូចគ្នាកាលពីឆ្នាំ២០២៣។ នេះបើតាមលោក សាយ សំអាល់ រដ្ឋមន្រ្តីក្រសួងរៀបចំដែនដី នគរោបនីយកម្ម និងសំណង់ ថ្លែងនៅក្នុងពិធីបិទសន្និបាតបូកសរុបលទ្ធផលការងារឆ្នាំ ២០២៤ និងលើកទិសដៅការងារបន្តឆ្នាំ ២០២៥។

លោករដ្ឋមន្រ្តីរំពឹងទុកថា វិស័យសំណង់នឹងប្រែក្លាយទៅជាឧស្សាហកម្ម ដែលនឹងចូលរួមបង្កើនចំណូលថវិកាជាតិ និងកំណើនសេដ្ឋកិច្ចកម្ពុជា។

យ៉ាងណាមិញ អ្នកជំនាញសេដ្ឋកិច្ចមើលឃើញថា ស្ថានភាពវិស័យសំណង់ក្នុងប្រទេសកម្ពុជានៅតែប្រឈមវិបត្តិ ដោយសារការប្រែប្រួលស្ថានភាពភូមិសាស្ត្រនយោបាយ ខណៈវិស័យសាងសង់របស់ប្រទេសកម្ពុជារំពឹងលំហូរទុនវិនិយោគពីក្រៅប្រទេសជាពិសេសប្រទេសចិន ដែលកំពុងជួបសម្ពាធសេដ្ឋកិច្ចដែរនោះក្រោយវិបត្តិជំងឺកូវីដ១៩។

លោក ហុង វណ្ណៈ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជាបានឲ្យកម្ពុជាថ្មីដឹងថា ការរីករាលដាលនៃជំងឺកូវីដ១៩ បានធ្វើឱ្យស្ថានភាពពិភពលោកមានការប្រែប្រួល ហើយបញ្ហាវិបត្តិសង្គ្រាមរុស្ស៊ី-អ៊ុយក្រែន វិបត្តិនៅមជ្ឈិមបូព៌ា រួមទាំងបញ្ហារ៉ាំរ៉ៃនៅសមុទ្រចិនខាងត្បូង ក៏ដូចជាបញ្ហាជាច្រើនទៀតបានធ្វើឱ្យស្ថានភាពពិភពលោកទាំងមូល និងប្រទេសនានាជួបបញ្ហាវិបត្តិផ្សេងៗគ្នា។

លោកថា វិស័យសំណង់របស់ប្រទេសកម្ពុជាដែលរំពឹងការបង្ហូរទុនវិនិយោគពីប្រទេសចិន ក៏ទទួលរងវិបត្តិជាមួយគម្រោងសាងសង់មួយចំនួនក៏ផ្អាកដំណើរការឬជាប់គាំង។

លោកលើកឡើង ពាក់ព័ន្ធអគារជាប់គាំងនៅក្នុងខេត្តព្រះសីហនុ ដែលរដ្ឋាភិបាលបានខិតខំដាក់ចេញគោលនយោបាយ និងការលើកទឹកចិត្តជាច្រើន ប៉ុន្តែផែនការជំរុញលើកទឹកចិត្តដល់វិនិយោគិនអភិវឌ្ឍបន្តនៅតែជួបការលំបាក ដោយសារអ្នកអភិវឌ្ឍមិនមានលទ្ធភាពគ្រប់គ្រាន់ ឬជួបវិបត្តិជាក់ស្ដែងដែលមិនអាចដោះស្រាយបាន។

ដើម្បីដោះស្រាយវិបត្តិ បើតាមលោកបណ្ឌិត ហុង វណ្ណៈ លុះត្រាតែមានការបង្កើតយន្តការថ្មីបន្ថែមទៀត ដោយបង្កើនល្បឿននូវការដោះស្រាយ ស្វែងរកហេតុផលនៃបញ្ហានីមួយៗ យកមកសិក្សាឱ្យបានច្បាស់ និងឆាប់រហ័សថាតើមុខសញ្ញានៃអគារនីមួយៗជាប់គាំងដោយសារបញ្ហាអ្វី ហើយយកបញ្ហាទាំងនោះមកស្រាយទៅតាមដំណាក់កាលនីមួយៗ។ បញ្ហាខ្លះ ត្រូវបង្កើនភាគីទី៣ ឬ ទី៤ ដើម្បីជំរុញលើកទឹកចិត្តក្នុងការរួមគ្នាដោះស្រាយបញ្ហា ដោយត្រូវចាប់ផ្តើមពីចំណុចណាមួយទើបអាចដោះស្រាយបាន។

លោក ឡុង ឌីម៉ង់ អភិបាលរងខេត្តព្រះសីហនុបានប្រាប់កម្ពុជាថ្មីតាមតេលេក្រាមថា ក្រុមការងារជំរុញការវិនិយោគក្នុងខេត្តព្រះសីហនុបានសម្រួលនីតិវិធីក្នុងក្របខ័ណ្ឌ “កម្មវិធីពិសេសជំរុញការវិនិយោគក្នុងខេត្តព្រះសីហនុ ឆ្នាំ២០២៤” ដើម្បីជំរុញដំណើរការសកម្មភាពសាងសង់ឡើងវិញ។

លោកបានលើកពីគម្រោងអគារជាប់គាំងចំនួន ៨៥ នៅខេត្តព្រះសីហនុ បច្ចុប្បន្នបានទទួលការលើកទឹកចិត្តពិសេសដើម្បីអភិវឌ្ឍបន្ត។

លោក សាយ សំអាល់ បានបន្ថែមថា ក្រសួងបានកំពុងធ្វើការងារជាមួយវិស័យឯកជន រួមមាន ស្ថានទូត សភាពាណិជ្ជកម្ម អង្គការ សមាគម និងក្រុមហ៊ុន ក្នុងនាមក្រសួងផង និងក្នុងនាមសហប្រធានក្រុមការងារផ្នែកសំណង់និងអចលនទ្រព្យនៃវេទិការាជរដ្ឋាភិបាល-ផ្នែកឯកជនផង ដើម្បីដោះស្រាយនូវកង្វល់ និងបញ្ហាប្រឈមនានា ដើម្បីអាចសហការរួមគ្នាដោះបញ្ហាកកស្ទះពាក់ព័ន្ធវិស័យសំណង់៕