ធនាគារជាតិស្នើជួបសមាគមស្វាយចន្ទី ពិភាក្សាជុំវិញវឌ្ឍនភាពស្វាយចន្ទីកម្ពុជា

ធនាគារជាតិ នៃកម្ពុជា បានស្នើជួបពិភាក្សាការងារ ស្ដីពីវឌ្ឍនភាព និងទស្សនវិស័យ​ស្វាយ​ចន្ទី​កម្ពុជា និងសកម្មភាពនាំចេញគ្រាប់ស្វាយចន្ទី សម្រាប់ឆ្នាំ ២០២៤ និទស្សនវិស័យ​នៅពេល​ខាង​មុខ។

ធនាគារជាតិ នៃកម្ពុជា កំពុងប្រមូលធាតុចូលនានាពាក់ព័ន្ធនឹងស្ថានភាព ការវាយតម្លៃ និង​ទស្សន​​វិស័យលើវិស័យចម្បងៗ នៃសេដ្ឋកិច្ច ដើម្បីធ្វើការវាយតម្លៃ និងព្យាករណ៍សេដ្ឋកិច្ច​នៅឆ្នាំ ២០២៤ និងឆ្នាំ ២០២៥។

យោងតាមសមាគមស្វាយចន្ទីកម្ពុជា គិតត្រឹមរយៈពេល ១០ ខែ (មករា-តុលា) ឆ្នាំ ២០២៤ កម្ពុជាផលិតស្វាយចន្ទីបានចំនួន ៨៤ ម៉ឺនតោន កើនឡើង ២៦% បើធៀប​នឹងរយៈពេលដូចគ្នានៅឆ្នាំ ២០២៣ ក្នុងនោះកម្ពុជាបាននាំចេញគ្រាប់ស្វាយចន្ទីឆៅ ទៅកាន់ទី​ផ្សារ​វៀត​​ណាម បានជាង ៧៩ ម៉ឺនតោន កើនឡើង ៣១% គិតជាទឹកប្រាក់ ១ ពាន់ ១០០ លាន​ដុល្លារ​ កើនឡើង៩%។

យោងតាមក្រសួងកសិកម្ម កម្ពុជាមានផ្ទៃដីប្រមូលផលស្វាយចន្ទីសរុបចំនួនជាង ៥៨ ម៉ឺនហិកតា (៥៨០ ១១៧) ក្នុងនោះ​ខេត្ត​ចំនួន ១០ របស់កម្ពុជា មានផ្ទៃដី​ដាំដុះ​ស្វាយ​​​​​ចន្ទីច្រើនជាងគេរួមាន ខេត្តកំពង់ធំជិត ១៥ ម៉ឺន​ហិកតា (១៤៧ ៧០៣) ខេត្តក្រចេះ ជាង ១០ ម៉ឺនហិកតា (១០២ ៥២០) រតនគិរី ៩៧ ២៥៨ ហិកតា កំពង់ចាម ៤៦ ៥៨២ ហិកតា ស្ទឹងត្រែង ៤៤ ២៥០ ហិកតា ខេត្ត​ត្បូងឃ្មុំ ៣៦ ៤០៣ ហិកតា ខេត្តសៀមរាប ៣៥ ៩១៤ ហិកតា ខេត្តព្រះវិហារ ២៨ ៩៦៥ ហិកតា ឧត្តរមានជ័យ ១៣ ៨១៨ ហិកតា និងមណ្ឌលគិរី ៩ ៨៥៨ ហិកតា៕

អត្ថបទ៖ ឡេង ដេត