Leverkusen ត្រៀមផ្ដល់កិច្ចសន្យា​ថ្មី​ជា​មួយ​ប្រាក់ឈ្នួល​កើន​ឡើងដើម្បីរក្សា Wirtz

កីឡាករ Florian Wirtz កំពុងស្ថិតក្នុងការពិភាក្សាកម្រិតខ្ពស់ជាមួយក្លិប Bayer Leverkusen ជុំវិញការចុះកុងត្រាថ្មី ខណៈក្លិបចង់រក្សា​រូប​គេ​ទុករហូតដល់ឆ្នាំ២០២៨។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសារព័ត៌មាន Sky Sport នៅប្រទេសអាឡឺម៉ង់បានចុះផ្សាយថា តារាឆ្នើមរបស់ Bayer Leverkusen Florian Wirtz មិនទាន់យល់ព្រមជាផ្លូវការលើការចុះកុងត្រាថ្មីនៅឡើយទេ ប៉ុន្តែក្លិបកំពុងដុតដៃដុតជើង ធ្វើយ៉ាងណាដើម្បីអាចរក្សាទុករូបគេ ឲ្យស្នាក់បន្តទៀត។ កិច្ចសន្យាថ្មីរបស់គាត់ទំនងជាមានសុពលភាពរហូតដល់ឆ្នាំ២០២៨ ហើយរូបគេអាចទទួលបានការដំឡើងប្រាក់ឈ្នួល​ដល់១១លានដុល្លារក្នុងមួយរដូវកាល។

Wirtz ត្រូវបានគេមើលឃើញ​ពីការ​រួម​ចំណែកសំខាន់មួយក្នុងក្រុម Leverkusen និងបានជួយលោក Xabi Alonso ឈ្នះជើងឯក Bundesliga ជាលើកដំបូងក្នុងប្រវត្តិសាស្ត្ររបស់ពួកគេកាលពីរដូវកាលមុន។ កាលពីប៉ុន្មានខែមុន ក្លិបកំពូលៗនៅអឺរ៉ុបដូចជា Bayern Munich, Manchester City និង Real Madrid មានទំនាក់ទំនងយ៉ាងជិតស្និទ្ធជាមួយកីឡាករជម្រើសជាតិអាឡឺម៉ង់ ប៉ុន្តែយោងតាមរបាយការណ៍បន្ថែមចំពោះការផ្ទេរទៅក្លិបមួយក្នុងចំណោមក្លិបទាំងនោះទំនងជាមិនអាចកើតឡើងទេ ដោយសារគាត់អាចនឹងបន្ដស្នាក់នៅជាមួយក្លិបយ៉ាងហោចណាស់ដល់ព្រឹត្តិការណ៍ World Cup ឆ្នាំ២០២៦។

នៅក្នុងយុទ្ធនាការប្រកួតនៅរដូវកាលឆ្នាំ ២០២៤-២៥ ខ្សែបម្រើវ័យ២១ឆ្នាំរូបនេះបានបង្ហាញទម្រង់លេងដ៏អស្ចារ្យ ក្រោយស៊ុតបញ្ចូលទីបាន១១គ្រាប់ និងបានបញ្ជូនបាល់ឱ្យមិត្តរួមក្រុមចំនួន៥ដងក្នុងការបង្ហាញខ្លួន២៤ប្រកួត៕

ប្រែសម្រួល៖ ផា រតនា