នាដការីរបាំ កូនអាន រំឭកស្មារតីកូនខ្មែរគ្រប់រូប ត្រូវចេះស្រលាញ់និងចូលរួមថែរក្សាសម្បត្តិបេតិកភណ្ឌ

កញ្ញា សុគា គីមលាង ឬ កូនអាន បានធ្វើការដាស់តឿន និងរំឭកស្មារតីដល់កូនខ្មែរគ្រប់រូបឱ្យចេះស្រលាញ់និងចូលរួមថែរក្សាបេតិកភណ្ឌដែលដូនតា បុព្វបុរសខ្មែរបានបន្សល់ទុកឱ្យសម្រាប់ក្មេងៗជំនាន់ក្រោយ។ កញ្ញាបានលើកឡើងបែបនេះ កំឡុងពេលអបអរសាទរខួបលើកទី ៣២ឆ្នាំ នៃការដាក់បញ្ចូលតំបន់រមណីយដ្ឋានអង្គរ ក្នុងបញ្ជីសម្បត្តិបេតិកភណ្ឌពិភពលោក របស់អង្គការយូណេស្កូ កាលពីថ្មីៗនេះ។

នាដការីរបាំរូបនេះ បានចាត់ទុកព្រឹត្តិការណ៍នេះ គឺជាការរំឭកស្មារតីកូនខ្មែរគ្រប់រូបឱ្យចេះស្រលាញ់ និងចូលរួមថែរក្សាបេតិកភណ្ឌ ជាពិសេសគឺសម្តែងនូវការដឹងគុណដ៏ជ្រាលជ្រៅដល់បុព្វបុរសខ្មែរ ដែលបានពលិកម្ម ដើម្បីបុព្វហេតុអារ្យធម៌ដ៏រុងរឿងរបស់ខ្មែរ នាសម័យអតីតកាល និងការតស៊ូជាបន្តបន្ទាប់របស់ថ្នាក់ដឹកនាំប្រទេស ក្នុងការជម្នះរាល់ឧបសគ្គទាំងឡាយការពារឱ្យបាន នូវសម្បត្តិបេតិកភណ្ឌដ៏មានតម្លៃរបស់ជាតិ និងពិភពលោកទាំងមូល។

កញ្ញាបន្តថា បច្ចុប្បន្នអង្គរវត្តបានក្លាយជាគោលដៅទេសចរណ៍ដ៏សំខាន់ ដោយបានទាក់ទាញភ្ញៀវទេសចរអន្តរជាតិរាប់លាននាក់មកទស្សនា និងបានស្គាល់ពីសម្បតិ្តវប្បធម៌ប្រទេសកម្ពុជា។ ប្រាសាទអង្គរ ត្រូវបានចុះបញ្ចូលក្នុងបញ្ជីសម្បត្តិបេតិកភណ្ឌពិភពលោករបស់អង្គការយូណេស្កូ កាលពីថ្ងៃទី១៤ ខែធ្នូ ឆ្នាំ១៩៩២ ។

កញ្ញា សុគា គីមលាង ក៏បានបេ្តជ្ញាតាំងចិត្តខ្ពស់ក្នុងការចូលរួមថែរក្សាសម្បត្តិវប្បធម៌-អរិយធម៌ ខណ:កន្លងមក ក៏ត្រូវបានទស្សនិកជនដឹងថា នាងតែងតែមានភាពលេចធ្លោលើសកម្មភាពផ្សព្វផ្សាយវប្បធម៌សិល្ប:ខ្មែរ។ សកម្មភាពនេះ តែងទទួលបានការកោតសរសើរនិងគាំទ្រពីសំណាក់មហាជនខ្មែរគ្រប់វ័យ៕ អត្ថបទ៖ ចាន់រ៉ា