តារាស្រីដើរតួជាម្តាយក្មេក Baifern ក្នុងរឿង «Thicha» មានប្រវត្តិការងារមិនធម្មតាឡើយ

ទទួលបានតំណែងជាម្តាយក្មេករបស់ Baifern Pimchanok ក្នុងរឿងភាគទូរទស្សន៍ក្រោមចំណងជើងថា Thicha នៅលើប៉ុស្ត៍ one 31 តារាម៉ូដែលនិងសម្ដែង Lukkade Metinee បង្កការភ្ញាក់ផ្អើលដោយសារតែសមត្ថភាពសម្តែងរបស់នាងបានល្អខ្លាំងសឹងតែមិនគួរឲ្យជឿ។

នៅក្នុងខ្សែភាពយន្តនេះ តារាស្រីវ័យ៥២ឆ្នាំបានដើរតួជា ប៊ុត សារ៉ា ដែលជាស្ត្រីឃោរឃៅ និងព្យាបាទ ហើយក៏ចូលចិត្តជាន់ឈ្លីមនុស្សម្នាក់ជុំវិញខ្លួនតាមអំពើចិត្ត ដោយសារតែអំណាច និងលុយ ។

ទស្សនាភាពយន្តនេះ ទស្សនិកជនទប់អារម្មណ៍មិនជាប់ ក្នុងឈុតដែលនាងប៊ុត សារ៉ា យកអ្នកបំរើទៅប្រគល់ឲ្យមនុស្សម្នាក់ទៀតដែលជាមិត្តនិងជាអ្នករកស៊ីខុសច្បាប់។ បន្ទាប់មកទៀត តួម្ដាយក៏បានដាក់ថ្នាំពុលកណ្តុរនៅក្នុងភេសជ្ជៈរបស់កូនប្រសាគឺ Thicha ដែលជាតួអង្គ Baifern នាំឲ្យនាងត្រូវសម្រាកនៅមន្ទីរពេទ្យក្នុងបន្ទប់សង្គ្រោះបន្ទាន់។ មិនឈប់នោះនាងក៏បានដាក់អំបែងកែវចូលទៅក្នុងបង្អែមកូនប្រសា រហូតដល់ថ្នាក់់ក្អួតឈាមថែមទៀតផង។

យ៉ាងណាក៏ដោយ ដោយសារតែសមត្ថភាពសម្ដែងដ៏ប៉ិនប្រសប់ក្នុងសាច់រឿងមួយនេះឈ្មោះរបស់Lukkadeត្រូវទស្សនិកជនជាច្រើនតាមស្វែងរកនិងចង់ដឹងអំពីជីវប្រវត្តិពិតរបស់នាងថាតើជានរណានិងមានអាជីពអ្វីនាសព្វថ្ងៃនេះ។

មានឈ្មោះពិតថា​ លូកកេត មេធីនី គីងផៈយោម​ (Lukkade Metinee ) នាងកើត​នៅ​ឆ្នាំ ១៩៧២ ដោយបាន​គ្រង​មកុដ​បវរកញ្ញា​ថៃ​នាឆ្នាំ ១៩៩២ និង​ជា​តំណាង​ប្រទេស​ថៃ​ទៅប្រកួតនៅ​ក្នុងកម្មវិធីបវរកញ្ញា​ពិភពលោកក្នុងឆ្នាំដដែល។

បើទោះជារូបនាងមិនបានជាប់ក្នុង Top 10 ក៏លូកកេតនៅតែទទួលបានពានរង្វាន់ Asia Pacific Beauty Queen ដដែល។ ក្រៅ​ពី​អាជីព​ជា​តារា​ម៉ូដែលនាងក៏​ចូល​រួម​ក្នុង​កម្មវិធី​ពិត និង​ភាពយន្ត​ជា​ច្រើន​ទៀត។ នាងបានបង្ហាញខ្លួននៅក្នុងខ្សែភាពយន្តដូចជា Hua jai sila television show,Dok Soke, Battles of the Stars និង Beauty and the Bitches ដែលសុទ្ធសឹងតែជាភាពយន្តល្បីល្បាញខ្លាំង។

នៅក្នុងកម្មវិធី Thai showbiz តារាម៉ូដែលរូបនេះមានភាពល្បីល្បាញដោយសារភាពត្រង់ និងគំនិតប្លែកពីគេ។ ពេល​ធ្វើ​ការ​ជា​គ្រូ​បង្វឹកឲ្យកម្មវិធី​បង្ហាញ​ម៉ូដ​ លូកកេតមិន​ខ្លាច​នឹងការ​ប្រកែក​ឡើយ សូម្បី​តែ​ខឹង​មិត្ត​រួម​ការងារ​ក៏​ដោយ។

មិនតែប៉ុណ្ណោះ ចាប់ពីផ្លូវដែលនាងដើរ និយាយ ដល់ការបញ្ចេញទឹកមុខរបស់គាត់ លូកកេតតែងតែបញ្ចេញសិទ្ធិអំណាចដែលធ្វើឱ្យមនុស្សគ្រប់គ្នានៅក្បែរហាក់មានអាម្មណ៍ភ័យខ្លាច។ ទោះជាយ៉ាងណាក៏ដោយ រឿងមួយដែលពិបាកនឹងបដិសេធគឺថា នាងគឺជាមនុស្សស្រីដែលមានចំណេះដឹង បទពិសោធន៍ជីវិត និងអាកប្បកិរិយាទំនើបលើសគេ។

អ្វីដែលកាន់តែចាប់អារម្មណ៍ខ្លាំងបំផុតដែលទស្សនិកចងដឹងបំផុតនោះគឺថា ក្រៅពីអាជីពម៉ូដែលនិងសម្ដែងជាតួកាចឆ្នាស់តារាស្រីលូកកេត មានទ្រព្យសម្បត្តិដ៏ធំមួយជាច្រើនឆ្នាំដែលបានមកពីវិស័យសិល្បៈ។ នៅលើទំព័រផ្ទាល់ខ្លួនរបស់នាង លូកកេតបានបង្ហោះផ្នែកមួយនៃផ្ទះវីឡាដែលគ្រួសារនាងរស់នៅ និងធ្វើឱ្យទស្សនិកជនកោតសរសើរ ព្រោះថាវាមានទំហំធំទូលាយ និងស្រស់ស្អាតមិនអាចគណនាបានឡើយ។

អាស្រ័យហេតុនេះ ផ្ទះវីឡារបស់លូកកេត ប្តី និងកូន មានទីតាំងនៅខេត្ត Phang Nga ភាគខាងត្បូងប្រទេសថៃ។ គេដឹងថាផ្ទះរបស់តារាស្រីត្រូវបានរចនាឡើងដោយប្តីរបស់នាង និងសាច់ញាតិដែលមានគោលបំណងដើមគឺសាងសង់ជារមណីយដ្ឋានចូលនិវត្តន៍ ឬសម្រាប់ជួល។ ប៉ុន្តែ នៅពេលសាងសង់រួចរាល់ ដោយសារតែគាត់ចូលចិត្តកន្លែងនេះខ្លាំងទើបបានសម្រេចចិត្តផ្លាស់ទៅផ្ទះ ហើយដាក់ឈ្មោះវីឡារបស់គាត់ថា «White Skies House»មកទល់សព្វថ្ងៃនេះ.

យ៉ាងណាមិញ ជារឿងដ៏ភ្ញាក់ផ្អើលបំផុតសម្រាប់តារាម៉ូដែលដ៏ល្បីល្បាញ លូកកេត មេធីនី ដែលបានបញ្ចប់ទំនាក់ទំនងស្នេហារយៈពេល១៧ ឆ្នាំ ដោយនាងសារភាពថា នាងបានបែកបាក់ជាមួយស្វាមីបរទេស Edward។ ប៉ុន្តែការបែកគ្នារបស់អ្នកទាំងពីរ ក៏មិនបានពន្យល់លម្អិតនោះទេ ដោយសារតែការព្រួយបារម្ភអំពីឯកជនភាព និងព្រួយបារម្ភអំពីកូនប្រុសរបស់ពួកគេ៕

អត្ថបទ៖ សាង ស្រីល័ក្ខ

ចុចអាន៖អបអរបុណ្យណូអែលឆ្នាំនេះ Janie បញ្ចេញឈុតក្នុងមួយទំហឹង មិន​ខ្វល់ឈានចូលវ័យ៤៣ឆ្នាំ